(২১) ১. কিমিলৱগ্গো

১-৪. কিমিলসুত্তাদিৱণ্ণনা

২০১-৪. পঞ্চমস্স পঠমদুতিযানি উত্তানত্থানেৱ. ততিযে অধিৱাসনং খমনং, পৰেসং দুক্কটং দুৰুত্তঞ্চ পটিৱিৰোধাকৰণেন অত্তনো উপৰি আৰোপেত্ৱা ৱাসনং অধিৱাসনং, তদেৱ খন্তীতি অধিৱাসনক্খন্তি. সুভে ৰতোতি সূৰতো, সুট্ঠু ৱা পাপতো ওৰতো ৱিৰতো সোৰতো, তস্স ভাৱো সোৰচ্চং. তেনাহ ‘‘সোৰচ্চেনাতি সুচিসীলতাযা’’তি. সা হি সোভনকম্মৰততা, সুট্ঠু ৱা পাপতো ওৰতভাৱো ৱিৰততা. চতুত্থে নত্থি ৱত্তব্বং.

কিমিলসুত্তাদিৱণ্ণনা নিট্ঠিতা.

৫. চেতোখিলসুত্তৱণ্ণনা

২০৫. পঞ্চমে চেতোখিলা নাম অত্থতো ৱিচিকিচ্ছা কোধো চ. তে পন যস্মিং সন্তানে উপ্পজ্জন্তি, তস্স খৰভাৱো কক্খড়ভাৱো হুত্ৱা উপতিট্ঠন্তি, পগেৱ অত্তনা সম্পযুত্তচিত্তস্সাতি আহ ‘‘চিত্তস্স থদ্ধভাৱা’’তি. যথা লক্খণপাৰিপূৰিযা গহিতায সব্বা সত্থু ৰূপকাযসিৰী গহিতা এৱ নাম হোতি এৱং সব্বঞ্ঞুতায সব্বধম্মকাযসিৰী গহিতা এৱ নাম হোতীতি তদুভযৱত্থুকমেৱ কঙ্খং দস্সেন্তো ‘‘সৰীৰে কঙ্খমানো’’তিআদিমাহ. ৱিচিনন্তোতি ধম্মসভাৱং ৱীমংসন্তো. কিচ্ছতীতি কিলমতি. ৱিনিচ্ছেতুং ন সক্কোতীতি সন্নিট্ঠাতুং ন সক্কোতি. আতপতি কিলেসেতি আতপ্পং, সম্মাৱাযামোতি আহ ‘‘আতপ্পাযাতি কিলেসসন্তাপনৱীৰিযকৰণত্থাযা’’তি. পুনপ্পুনং যোগাযাতি ভাৱনং পুনপ্পুনং যুঞ্জনায. সততকিৰিযাযাতি ভাৱনায নিৰন্তৰপ্পযোগায.

পটিৱেধধম্মে কঙ্খমানোতি এত্থ কথং লোকুত্তৰধম্মে কঙ্খা পৱত্তীতি? ন আৰম্মণকৰণৱসেন, অনুস্সুতাকাৰপৰিৱিতক্কলদ্ধে পৰিকপ্পিতৰূপে কঙ্খা পৱত্ততীতি দস্সেন্তো আহ ‘‘ৱিপস্সনা…পে… ৱদন্তি, তং অত্থি নু খো নত্থীতি কঙ্খতী’’তি. সিক্খাতি চেত্থ পুব্বভাগসিক্খা ৱেদিতব্বা. কামঞ্চেত্থ ৱিসেসুপ্পত্তিযা মহাসাৱজ্জতায চেৱ সংৱাসনিমিত্তং ঘটনাহেতু অভিণ্হুপ্পত্তিকতায চ সব্ৰহ্মচাৰীসূতি কোপস্স ৱিসযো ৱিসেসেত্ৱা ৱুত্তো, অঞ্ঞত্থাপি কোপো ন চেতোখিলোতি ন সক্কা ৱিঞ্ঞাতুন্তি কেচি. যদি এৱং ৱিচিকিচ্ছাযপি অযং নযো আপজ্জতি, তস্মা যথাৰুতৱসেন গহেতব্বং.

চেতোখিলসুত্তৱণ্ণনা নিট্ঠিতা.

৬-৮. ৱিনিবন্ধসুত্তাদিৱণ্ণনা

২০৬-৮. ছট্ঠে পৱত্তিতুং অপ্পদানৱসেন কুসলচিত্তং ৱিনিবন্ধন্তীতি চেতসোৱিনিবন্ধা. তং পন ৱিনিবন্ধন্তা মুট্ঠিগ্গাহং গণ্হন্তা ৱিয হোন্তীতি আহ ‘‘চিত্তং ৱিনিবন্ধিত্ৱা’’তিআদি. কামগিদ্ধো পুগ্গলো ৱত্থুকামেপি কিলেসকামেপি অস্সাদেতি অভিনন্দতীতি ৱুত্তং ‘‘ৱত্থুকামেপি কিলেসকামেপী’’তি. অত্তনো কাযেতি অত্তনো নামকাযে, অত্তভাৱে ৱা. বহিদ্ধাৰূপেতি পৰেসং কাযে অনিন্দ্ৰিযবদ্ধৰূপে চ. উদৰং অৱদিহতি উপচিনোতি পূৰেতীতি উদৰাৱদেহকং. সেয্যসুখন্তি সেয্যায সযনৱসেন উপ্পজ্জনকসুখং. সম্পৰিৱত্তকন্তি সম্পৰিৱত্তিত্ৱা. পণিধাযাতি তণ্হাৱসেনেৱ পণিদহিত্ৱা. ইতি পঞ্চৱিধোপি লোভৱিসেসো এৱ ‘‘চেতোৱিনিবন্ধো’’তি ৱুত্তোতি ৱেদিতব্বো. সত্তমট্ঠমেসু নত্থি ৱত্তব্বং.

ৱিনিবন্ধসুত্তাদিৱণ্ণনা নিট্ঠিতা.

৯-১০. গীতস্সৰসুত্তাদিৱণ্ণনা

২০৯-২১০. নৱমে আযতকো নাম গীতস্সৰো তং তং ৱত্তং ভিন্দিত্ৱা অক্খৰানি ৱিনাসেত্ৱা পৱত্তোতি আহ ‘‘আযতকেনা’’তিআদি. ধম্মেহি সুত্তৱত্তং নাম অত্থি, গাথাৱত্তং নাম অত্থি, তং ৱিনাসেত্ৱা অতিদীঘং কাতুং ন ৱট্টতি. ধম্মঞ্হি ভাসন্তেন চতুৰস্সেন ৱত্তেন পৰিমণ্ডলানি পদব্যঞ্জনানি দস্সেতব্বানি. ‘‘অনুজানামি, ভিক্খৱে, সৰভঞ্ঞ’’ন্তি (চূড়ৱ. ২৪৯) চ ৱচনতো সৰেন ধম্মং ভণিতুং ৱট্টতি. সৰভঞ্ঞে কিৰ তৰঙ্গৱত্তধোতকৱত্তভাগগ্গহকৱত্তাদীনি দ্ৱত্তিংস ৱত্তানি অত্থি. তেসু যং ইচ্ছতি, তং কাতুং লভতীতি. দসমে নত্থি ৱত্তব্বং.

গীতস্সৰসুত্তাদিৱণ্ণনা নিট্ঠিতা.

কিমিলৱগ্গৱণ্ণনা নিট্ঠিতা.