(১৯) ৪. অৰঞ্ঞৱগ্গো

১. আৰঞ্ঞিকসুত্তৱণ্ণনা

১৮১. চতুত্থস্স পঠমে অপ্পীচ্ছতংযেৱ নিস্সাযাতিআদীসু ‘‘ইতি অপ্পিচ্ছো ভৱিস্সামী’’তি ইদং মে আৰঞ্ঞিকঙ্গং অপ্পিচ্ছতায সংৱত্তিস্সতি, ‘‘ইতি সন্তুট্ঠো ভৱিস্সামী’’তি ইদং মে আৰঞ্ঞিকঙ্গং সন্তুট্ঠিযা সংৱত্তিস্সতি, ‘‘ইতি কিলেসে সল্লিখিস্সামী’’তি ইদং মে আৰঞ্ঞিকঙ্গং কিলেসসল্লিখনত্থায সংৱত্তিস্সতীতি আৰঞ্ঞিকো হোতি. অগ্গোতি জেট্ঠকো. সেসানি তস্সেৱ ৱেৱচনানি.

গৱা খীৰন্তি গাৱিতো খীৰং নাম হোতি, ন গাৱিযা দধি. খীৰম্হা দধীতিআদীসুপি এসেৱ নযো. এৱমেৱন্তি যথা এতেসু পঞ্চসু গোৰসেসু সপ্পিমণ্ডো অগ্গো, এৱমেৱং ইমেসু পঞ্চসু আৰঞ্ঞিকেসু যো অযং অপ্পিচ্ছতাদীনি নিস্সায আৰঞ্ঞিকো হোতি, অযং অগ্গো চেৱ সেট্ঠো চ মোক্খো চ পৱৰো চ. ইমেসু আৰঞ্ঞিকেসু জাতিআৰঞ্ঞিকা ৱেদিতব্বা, ন আৰঞ্ঞিকনামমত্তেন আৰঞ্ঞিকাতি ৱেদিতব্বা. পংসুকূলিকাদীসুপি এসেৱ নযো.

আৰঞ্ঞিকসুত্তৱণ্ণনা নিট্ঠিতা.

অৰঞ্ঞৱগ্গৱণ্ণনা নিট্ঠিতা.