৭. কামসুত্তৱণ্ণনা

৭. সত্তমে অসন্তি লূনন্তি তেনাতি অসিতং, দাত্তং. ৱিৱিধা আভঞ্জন্তি ভাৰং ওলম্বেন্তি তেনাতি ব্যাভঙ্গী, ৱিধং. কুলপুত্তোতি এত্থ দুৱিধো কুলপুত্তো জাতিকুলপুত্তো, আচাৰকুলপুত্তো চ. তত্থ ‘‘তেন খো পন সমযেন ৰট্ঠপালো নাম কুলপুত্তো তস্মিংযেৱ থুল্লকোট্ঠিকে অগ্গকুলিকস্স পুত্তো’’তি (ম. নি. ২.২৯৪) এৱং আগতো উচ্চকুলপ্পসুতো জাতিকুলপুত্তো নাম. ‘‘যে তে কুলপুত্তা সদ্ধা অগাৰস্মা অনগাৰিযং পব্বজিতা’’তি (ম. নি. ১.৩৪) এৱং আগতা পন যত্থ কত্থচি কুলে পসুতাপি আচাৰসম্পন্না আচাৰকুলপুত্তো নাম. ইধ পন আচাৰকুলপুত্তো অধিপ্পেতো. তেনাহ ‘‘কুলপুত্তোতি আচাৰকুলপুত্তো’’তি. যুত্তন্তি অনুচ্ছৱিকং, এৱং ৱত্তব্বতং অৰহতীতি অত্থো. সেসমেত্থ উত্তানমেৱ.

কামসুত্তৱণ্ণনা নিট্ঠিতা.