১-৬. সাৰজ্জসুত্তাদিৱণ্ণনা

১৭১-১৭৬. ততিযস্স পঠমদুতিযততিযচতুত্থে নত্থি ৱত্তব্বং. পঞ্চমে উপাসকপচ্ছিমকোতি উপাসকনিহীনো. ‘‘ইমিনা দিট্ঠাদিনা ইদং নাম মঙ্গলং ভৱিস্সতী’’তি এৱং বালজনপৰিকপ্পিতকোতূহলসঙ্খাতেন দিট্ঠসুতমুতমঙ্গলেন সমন্নাগতো কোতূহলমঙ্গলিকো. তেনাহ ‘‘ইমিনা ইদং ভৱিস্সতী’’তিআদি. মঙ্গলং পচ্চেতীতি দিট্ঠমঙ্গলাদিভেদং মঙ্গলমেৱ পত্থিযাযতি. নো কম্মন্তি কম্মস্সকতং নো পত্থিযাযতি. ইমম্হা সাসনাতি ইতো সব্বঞ্ঞুবুদ্ধসাসনতো. বহিদ্ধাতি বাহিৰকসমযে. দক্খিণেয্যং পৰিযেসতীতি ‘‘দুপ্পটিপন্না দক্খিণেয্যা’’তি সঞ্ঞী গৱেসতি. এত্থ দক্খিণপৰিযেসনপুব্বকাৰে একং কত্ৱা পঞ্চ ধম্মা ৱেদিতব্বা. ছট্ঠং উত্তানমেৱ.

সাৰজ্জসুত্তাদিৱণ্ণনা নিট্ঠিতা.