(১৮) ৩. উপাসকৱগ্গো

১-৬. সাৰজ্জসুত্তাদিৱণ্ণনা

১৭১-১৭৬. ততিযস্স পঠমদুতিযততিযচতুত্থে নত্থি ৱত্তব্বং. পঞ্চমে উপাসকপচ্ছিমকোতি উপাসকনিহীনো. ‘‘ইমিনা দিট্ঠাদিনা ইদং নাম মঙ্গলং ভৱিস্সতী’’তি এৱং বালজনপৰিকপ্পিতকোতূহলসঙ্খাতেন দিট্ঠসুতমুতমঙ্গলেন সমন্নাগতো কোতূহলমঙ্গলিকো. তেনাহ ‘‘ইমিনা ইদং ভৱিস্সতী’’তিআদি. মঙ্গলং পচ্চেতীতি দিট্ঠমঙ্গলাদিভেদং মঙ্গলমেৱ পত্থিযাযতি. নো কম্মন্তি কম্মস্সকতং নো পত্থিযাযতি. ইমম্হা সাসনাতি ইতো সব্বঞ্ঞুবুদ্ধসাসনতো. বহিদ্ধাতি বাহিৰকসমযে. দক্খিণেয্যং পৰিযেসতীতি ‘‘দুপ্পটিপন্না দক্খিণেয্যা’’তি সঞ্ঞী গৱেসতি. এত্থ দক্খিণপৰিযেসনপুব্বকাৰে একং কত্ৱা পঞ্চ ধম্মা ৱেদিতব্বা. ছট্ঠং উত্তানমেৱ.

সাৰজ্জসুত্তাদিৱণ্ণনা নিট্ঠিতা.

৭-৮. ৱণিজ্জাসুত্তাদিৱণ্ণনা

১৭৭-৮. সত্তমে সত্থৱণিজ্জাতি আৱুধভণ্ডং কত্ৱা ৱা কাৰেত্ৱা ৱা কতং ৱা পটিলভিত্ৱা তস্স ৱিক্কযো. আৱুধভণ্ডং কাৰেত্ৱা তস্স ৱিক্কযোতি ইদং পন নিদস্সনমত্তং. সূকৰমিগাদযো পোসেত্ৱা তেসং ৱিক্কযোতি সূকৰমিগাদযো পোসেত্ৱা তেসং মংসং সম্পাদেত্ৱা ৱিক্কযো. এত্থ চ সত্থৱণিজ্জা পৰোপৰাধনিমিত্ততায অকৰণীযা ৱুত্তা, সত্তৱণিজ্জা অভুজিস্সভাৱকৰণতো, মংসৱিসৱণিজ্জা ৱধহেতুতো, মজ্জৱণিজ্জা পমাদট্ঠানতো. অট্ঠমং উত্তানমেৱ.

ৱণিজ্জাসুত্তাদিৱণ্ণনা নিট্ঠিতা.

৯. গিহিসুত্তৱণ্ণনা

১৭৯. নৱমে আভিচেতসিকানন্তি অভিচেতোতি অভিক্কন্তং ৱিসুদ্ধচিত্তং ৱুচ্চতি অধিচিত্তং ৱা, অভিচেতসি জাতানি আভিচেতসিকানি, অভিচেতো সন্নিস্সিতানীতি ৱা আভিচেতসিকানি. তেনেৱাহ ‘‘উত্তমচিত্তনিস্সিতান’’ন্তি. দিট্ঠধম্মসুখৱিহাৰানন্তি দিট্ঠধম্মে সুখৱিহাৰানং. দিট্ঠধম্মোতি পচ্চক্খো অত্তভাৱো ৱুচ্চতি, তত্থ সুখৱিহাৰানন্তি অত্থো. ৰূপাৱচৰজ্ঝানানমেতং অধিৱচনং. তানি হি অপ্পেত্ৱা নিসিন্না ঝাযিনো ইমস্মিংযেৱ অত্তভাৱে অসংকিলিট্ঠং নেক্খম্মসুখং ৱিন্দন্তি, তস্মা ‘‘দিট্ঠধম্মসুখৱিহাৰানী’’তি ৱুচ্চন্তি.

চতুব্বিধমেৰযন্তি পুপ্ফাসৱো, ফলাসৱো, গুড়াসৱো, মধ্ৱাসৱোতি এৱং চতুপ্পভেদং মেৰযং. পঞ্চৱিধঞ্চ সুৰন্তি পূৱসুৰা, পিট্ঠসুৰা, ওদনসুৰা, কিণ্ণপক্খিত্তা, সম্ভাৰসংযুত্তাতি এৱং পঞ্চপ্পভেদং সুৰং. পুঞ্ঞং অত্থো এতস্সাতি পুঞ্ঞত্থো. যস্মা পনেস পুঞ্ঞেন অত্থিকো নাম হোতি, তস্মা ৱুত্তং ‘‘পুঞ্ঞেন অত্থিকস্সা’’তি. সেসমেত্থ উত্তানমেৱ.

গিহিসুত্তৱণ্ণনা নিট্ঠিতা.

১০. গৱেসীসুত্তৱণ্ণনা

১৮০. দসমে সুকাৰণন্তি বোধিপৰিপাচনস্স একন্তিকং সুন্দৰং কাৰণং. মন্দহসিতন্তি ঈসকং হসিতং. কহং কহন্তি হাসসদ্দস্স অনুকৰণমেতং. হট্ঠপ্পহট্ঠাকাৰমত্তন্তি হট্ঠস্স পহট্ঠাকাৰমত্তং. যথা গহিতসঙ্কেতা ‘‘পহট্ঠো ভগৱা’’তি সঞ্জানন্তি, এৱং আকাৰনিদস্সনমত্তং.

ইদানি ইমিনা পসঙ্গেন হাসসমুট্ঠানং ৱিভাগতো দস্সেতুং ‘‘হসিতঞ্চ নামেত’’ন্তিআদি আৰদ্ধং. তত্থ অজ্ঝুপেক্খনৱসেনপি হাসো ন সম্ভৱতি, পগেৱ দোমনস্সৱসেনাতি আহ ‘‘তেৰসহি সোমনস্সসহগতচিত্তেহী’’তি. ননু চ কেচি কোধৱসেনপি হসন্তীতি? ন, তে সম্পিযন্তি কোধৱত্থুং তত্থ ‘‘মযং দানি যথাকামকাৰিতং আপজ্জিস্সামা’’তি দুৱিঞ্ঞেয্যন্তৰেন সোমনস্সচিত্তেনেৱ হাসস্স উপ্পজ্জনতো. তেসূতি পঞ্চসু সোমনস্সসহগতকিৰিযচিত্তেসু. বলৱাৰম্মণেতি উড়াৰতমে আৰম্মণে যমকপাটিহাৰিযসদিসে. দুব্বলাৰম্মণেতি অনুড়াৰআৰম্মণে.

‘‘ইমস্মিং পন ঠানে…পে… উপ্পাদেতী’’তি ইদং পোৰাণট্ঠকথাযং তথা আগতত্তা ৱুত্তং, ন সহেতুকসোমনস্সসহগতচিত্তেহি ভগৱতো সিতং ন হোতীতি দস্সনত্তং. অভিধম্মটীকাযং (ধ. স. মূলটী. ৯৬৮) পন ‘‘অতীতংসাদীসু অপ্পটিহতং ঞাণং ৱত্ৱা ‘ইমেহি ধম্মেহি সমন্নাগতস্স বুদ্ধস্স ভগৱতো সব্বং কাযকম্মং ঞাণপুব্বঙ্গমং ঞাণানুপৰিৱত্তী’তিআদিৱচনতো (মহানি. ১৫৬; পটি. ম. ৩.৫) ‘ভগৱতো ইদং চিত্তং উপ্পজ্জতী’তি ৱুত্তৱচনং ৱিচাৰেতব্ব’’ন্তি ৱুত্তং. তত্থ ইমিনা হসিতুপ্পাদচিত্তেন পৱত্তিযমানম্পি ভগৱতো সিতকৰণং পুব্বেনিৱাসঅনাগতংসসব্বঞ্ঞুতঞ্ঞাণানং অনুৱত্তকত্তা ঞাণানুপৰিৱত্তিযেৱাতি এৱং পন ঞাণানুপৰিৱত্তিভাৱে সতি ন কোচি পাড়িঅট্ঠকথানং ৱিৰোধো. তথা হি অভিধম্মট্ঠকথাযং (ধ. স. অট্ঠ. ৫৬৮) ‘‘তেসং ঞাণানং চিণ্ণপৰিযন্তে ইদং চিত্তং উপ্পজ্জতী’’তি ৱুত্তং. অৱস্সঞ্চেতং এৱং ইচ্ছিতব্বং, অঞ্ঞথা আৱজ্জনচিত্তস্সপি ভগৱতো তথাৰূপে কালে ন যুজ্জেয্য. তস্সপি হি ৱিঞ্ঞত্তিসমুট্ঠাপকভাৱস্স নিচ্ছিতত্তা. তথা হি ৱুত্তং ‘‘এৱঞ্চ কত্ৱা মনোদ্ৱাৰাৱজ্জনস্সপি ৱিঞ্ঞত্তিসমুট্ঠাপকত্তং উপপন্নং হোতী’’তি (ধ. স. মূলটী. ১ কাযকম্মদ্ৱাৰকথাৱণ্ণনা) ন চ ৱিঞ্ঞত্তিসমুট্ঠাপকত্তে তংসমুট্ঠানকাযৱিঞ্ঞত্তিযা কাযকম্মাদিভাৱং আপজ্জনভাৱো ৱিস্সজ্জতীতি.

হসিতন্তি সিতমেৱ সন্ধায ৱদতি. তেনাহ ‘‘এৱং অপ্পমত্তকম্পী’’তি. সমোসৰিতা ৱিজ্জুলতা. সা হি ইতৰৱিজ্জুলতা ৱিয খণট্ঠিতিযা সীঘনিৰোধা চ ন হোতি, অপিচ খো দন্ধনিৰোধা, ন চ সব্বকালিকা. দীধিতি পাৱকমহামেঘতো ৱা চাতুদ্দীপিকমহামেঘতো ৱা নিচ্ছৰতি. তেনাহ ‘‘চাতুদ্দীপিকমহামেঘমুখতো’’তি. অযং কিৰ তাসং ৰস্মীনং ধম্মতা, যদিদং তিক্খত্তুং সীসং পদক্খিণং কত্ৱা দাঠগ্গেসুযেৱ অন্তৰধানং. সেসমেত্থ সুৱিঞ্ঞেয্যমেৱ.

গৱেসীসুত্তৱণ্ণনা নিট্ঠিতা.

উপাসকৱগ্গৱণ্ণনা নিট্ঠিতা.