(১৭) ২. আঘাতৱগ্গো

১-৫. পঠমআঘাতপটিৱিনযসুত্তাদিৱণ্ণনা

১৬১-১৬৫. দুতিযস্স পঠমে নত্থি ৱত্তব্বং. দুতিযে আঘাতো পটিৱিনযতি এত্থ, এতেহীতি ৱা আঘাতপটিৱিনযা. তেনাহ ‘‘আঘাতো এতেহি পটিৱিনেতব্বো’’তিআদি.

নন্তকন্তি অনন্তকং, অন্তৱিৰহিতং ৱত্থখণ্ডং. যদি হি তস্স অন্তো ভৱেয্য, ‘‘পিলোতিকা’’তি সঙ্খং ন গচ্ছেয্য.

সেৱালেনাতি বীজকণ্ণিককেসৰাদিভেদেন সেৱালেন. উদকপপ্পটকেনাতি নীলমণ্ডূকপিট্ঠিৱণ্ণেন উদকপিট্ঠিং ছাদেত্ৱা নিব্বত্তেন উদকপিট্ঠিকেন. ঘম্মেন অনুগতোতি ঘম্মেন ফুট্ঠো অভিভূতো. চিত্তুপ্পাদন্তি পটিঘসম্পযুত্তচিত্তুপ্পাদং.

ৱিসভাগৱেদনুপ্পত্তিযা ককচেনেৱ ইৰিযাপথপৱত্তিনিৱাৰণেন ছিন্দন্তো আবাধতি পীড়েতীতি আবাধো, সো অস্স অত্থীতি আবাধিকো. তংসমুট্ঠানেন দুক্খিতো সঞ্জাতদুক্খো. বাড়্হগিলানোতি অধিমত্তগিলানো. গামন্তনাযকস্সাতি গামন্তসম্পাপকস্স.

পসন্নভাৱেন উদকস্স অচ্ছভাৱো ৱেদিতব্বোতি আহ ‘‘অচ্ছোদকাতি পসন্নোদকা’’তি. সাদুৰসতায সাততাতি আহ ‘‘মধুৰোদকা’’তি. তনুকমেৱ সলিলং ৱিসেসতো সীতলং, ন বহলাতি আহ ‘‘তনুসীতসলিলা’’তি. সেতকাতি নিক্কদ্দমা. সচিক্খল্লাদিৱসেন হি উদকস্স ৱিৱণ্ণতা. সভাৱতো পন তং সেতৱণ্ণমেৱ. ততিযাদীনি উত্তানত্থানেৱ.

পঠমআঘাতপটিৱিনযসুত্তাদিৱণ্ণনা নিট্ঠিতা.

৬. নিৰোধসুত্তৱণ্ণনা

১৬৬. ছট্ঠে অমৰিসনত্থেতি অসহনত্থে. অনাগতৱচনং কতন্তি অনাগতসদ্দপ্পযোগো কতো, অত্থো পন ৱত্তমানকালিকোৱ. অক্খৰচিন্তকা (পাণিনি. ৩.৩.১৪৫-১৪৬) হি ঈদিসেসু ঠানেসু অনোকপ্পনামৰিসনত্থৱসেন অত্থিসদ্দে উপপদে ৱত্তমানকালেপি অনাগতৱচনং কৰোন্তি.

নিৰোধসুত্তৱণ্ণনা নিট্ঠিতা.

৭-৯. চোদনাসুত্তাদিৱণ্ণনা

১৬৭-৯. সত্তমে ৱত্থুসন্দস্সনাতি যস্মিং ৱত্থুস্মিং আপত্তি, তস্স সৰূপতো দস্সনং. আপত্তিসন্দস্সনাতি যং আপত্তিং সো আপন্নো, তস্সা দস্সনং. সংৱাসপ্পটিক্খেপোতি উপোসথপ্পৱাৰণাদিসংৱাসস্স পটিক্খিপনং অকৰণং. সামীচিপ্পটিক্খেপোতি অভিৱাদনাদিসামীচিকিৰিযায অকৰণং. চোদযমানেনাতি চোদেন্তেন. চুদিতকস্স কালোতি চুদিতকস্স চোদেতব্বকালো. পুগ্গলন্তি চোদেতব্বপুগ্গলং. উপপৰিক্খিত্ৱাতি ‘‘অযং চুদিতকলক্খণে তিট্ঠতি, ন তিট্ঠতী’’তি ৱীমংসিত্ৱা. অযসং আৰোপেতীতি ‘‘ইমে মং অভূতেন অব্ভাচিক্খন্তা অযসং ব্যসনং উপ্পাদেন্তী’’তি ভিক্খূনং অযসং উপ্পাদেতি. অট্ঠমনৱমানি উত্তানত্থানেৱ.

চোদনাসুত্তাদিৱণ্ণনা নিট্ঠিতা.

১০. ভদ্দজিসুত্তৱণ্ণনা

১৭০. দসমে অভিভৱিত্ৱা ঠিতো ইমে সত্তেতি অধিপ্পাযো. যস্মা পন সো ‘‘পাসংসভাৱেন উত্তমভাৱেন চ তে সত্তে অভিভৱিত্ৱা ঠিতো’’তি অত্তানং মঞ্ঞতি, তস্মা ৱুত্তং ‘‘জেট্ঠকো’’তি. অঞ্ঞদত্থু দসোতি দস্সনে অন্তৰাযাভাৱৱচনেন ঞেয্যৱিসেসপৰিগ্গাহিকভাৱেন চ অনাৱৰণদস্সাৱিতং পটিজানাতীতি আহ ‘‘সব্বং পস্সতীতি অধিপ্পাযো’’তি.

ভদ্দজিসুত্তৱণ্ণনা নিট্ঠিতা.

আঘাতৱগ্গৱণ্ণনা নিট্ঠিতা.