৭-১০. অসপ্পুৰিসদানসুত্তাদিৱণ্ণনা

১৪৭-১৫০. সত্তমে অসক্কচ্চন্তি অনাদৰং কত্ৱা. দেয্যধম্মস্স অসক্কচ্চকৰণং নাম অসম্পন্নং কৰোতীতি আহ ‘‘ন সক্কৰিত্ৱা সুচিং কত্ৱা দেতী’’তি, উত্তণ্ডুলাদিদোসৱিৰহিতং সুচিসম্পন্নং কত্ৱা ন দেতীতি অত্থো. অচিত্তীকত্ৱাতি ন চিত্তে কত্ৱা, ন পূজেত্ৱাতি অত্থো. পূজেন্তো হি পূজেতব্বৱত্থুং চিত্তে ঠপেতি, ন ততো বহি কৰোতি. চিত্তং ৱা অচ্ছৰিযং কত্ৱা পটিপত্তিৱিকৰণং সম্ভাৱনকিৰিযা, তপ্পটিক্খেপতো অচিত্তীকৰণং অসম্ভাৱনকিৰিযা. অগাৰৱেন দেতীতি পুগ্গলে অগৰুং কৰোন্তো নিসীদনট্ঠানে অসম্মজ্জিত্ৱা যত্থ ৱা তত্থ ৱা নিসীদাপেত্ৱা যং ৱা তং ৱা আধাৰকং ঠপেত্ৱা দানং দেতি. অসহত্থাতি ন অত্তনো হত্থেন দেতি, দাসকম্মকৰোদীহি দাপেতি. অপৱিদ্ধং দেতীতি অন্তৰা অপৱিদ্ধং ৱিচ্ছেদং কত্ৱা দেতি. তেনাহ ‘‘ন নিৰন্তৰং দেতী’’তি. অথ ৱা অপৱিদ্ধং দেতীতি উচ্ছিট্ঠাদিছড্ডনীযধম্মং ৱিয অৱক্খিত্তকং কত্ৱা দেতি. তেনাহ ‘‘ছড্ডেতুকামো ৱিয দেতী’’তি. ‘‘অদ্ধা ইমস্স দানস্স ফলমেৱ আগচ্ছতী’’তি এৱং যস্স কম্মস্সকতাদিট্ঠি অত্থি, সো আগমনদিট্ঠিকো, অযং পন ন তাদিসোতি অনাগমনদিট্ঠিকো. তেনাহ ‘‘কতস্স নাম ফলং আগমিস্সতী’’তিআদি. অট্ঠমাদীসু নত্থি ৱত্তব্বং.

অসপ্পুৰিসদানসুত্তাদিৱণ্ণনা নিট্ঠিতা.

তিকণ্ডকীৱগ্গৱণ্ণনা নিট্ঠিতা.

ততিযপণ্ণাসকং নিট্ঠিতং.