(১১) ১. ফাসুৱিহাৰৱগ্গো

১-৪. সাৰজ্জসুত্তাদিৱণ্ণনা

১০১-৪. ততিযস্স পঠমে নত্থি ৱত্তব্বং. দুতিযে পিণ্ডপাতাদিঅত্থায উপসঙ্কমিতুং যুত্তট্ঠানং গোচৰো, ৱেসিযা গোচৰো অস্সাতি ৱেসিযাগোচৰো, মিত্তসন্থৱৱসেন উপসঙ্কমিতব্বট্ঠানন্তি অত্থো. ৱেসিযা নাম ৰূপূপজীৱিনিযো, তা মিত্তসন্থৱৱসেন ন উপসঙ্কমিতব্বা সমণভাৱস্স অন্তৰাযকৰত্তা, পৰিসুদ্ধাসযস্সপি গৰহাহেতুতো, তস্মা দক্খিণাদানৱসেন সতিং উপট্ঠপেত্ৱা উপসঙ্কমিতব্বং. ৱিধৱা ৱুচ্চন্তি মতপতিকা, পৱুত্থপতিকা ৱা. থুল্লকুমাৰিযোতি মহল্লিকা অনিৱিদ্ধা কুমাৰিযো. পণ্ডকাতি নপুংসকা. তে হি উস্সন্নকিলেসা অৱূপসন্তপৰিড়াহা লোকামিসনিস্সিতকথাবহুলা, তস্মা ন উপসঙ্কমিতব্বা. ভিক্খুনিযো নাম উস্সন্নব্ৰহ্মচৰিযা. তথা ভিক্খূপি. অঞ্ঞমঞ্ঞং ৱিসভাগৱত্থুভাৱতো সন্থৱৱসেন উপসঙ্কমনে কতিপাহেনেৱ ব্ৰহ্মচৰিযন্তৰাযো সিযা, তস্মা ন উপসঙ্কমিতব্বা, গিলানপুচ্ছনাদিৱসেন উপসঙ্কমনে সতোকাৰিনা ভৱিতব্বং. ততিযচতুত্থানি উত্তানত্থানেৱ.

সাৰজ্জসুত্তাদিৱণ্ণনা নিট্ঠিতা.

৫. ফাসুৱিহাৰসুত্তৱণ্ণনা

১০৫. পঞ্চমে মেত্তা এতস্স অত্থীতি মেত্তং, তংসমুট্ঠানং কাযকম্মং মেত্তং কাযকম্মং. এস নযো সেসদ্ৱযেপি. আৱীতি পকাসনং. পকাসভাৱো চেত্থ যং উদ্দিস্স তং কাযকম্মং কৰীযতি, তস্স সম্মুখভাৱতোতি আহ ‘‘সম্মুখা’’তি. ৰহোতি অপ্পকাসং. অপ্পকাসতা চ যং উদ্দিস্স তং কাযকম্মং কৰীযতি, তস্স অপচ্চক্খভাৱতোতি আহ ‘‘পৰম্মুখা’’তি. ইমানি মেত্তকাযকম্মাদীনি ভিক্খূনং ৱসেন আগতানি তেসং সেট্ঠপৰিসভাৱতো, গিহীসুপি লব্ভন্তিযেৱ. ভিক্খূনঞ্হি মেত্তচিত্তেন আভিসমাচাৰিকপূৰণং মেত্তং কাযকম্মং নাম. গিহীনং চেতিযৱন্দনত্থায বোধিৱন্দনত্থায সঙ্ঘনিমন্তনত্থায গমনং গামং পিণ্ডায পৱিট্ঠে ভিক্খূ দিস্ৱা পচ্চুগ্গমনং পত্তপ্পটিগ্গহণং আসনপঞ্ঞাপনং অনুগমনন্তি এৱমাদিকং মেত্তং কাযকম্মং নাম. ভিক্খূনং মেত্তচিত্তেন আচাৰপঞ্ঞত্তিসিক্খাপনং কম্মট্ঠানকথনং ধম্মদেসনা তেপিটকম্পি বুদ্ধৱচনং মেত্তং ৱচীকম্মং নাম. গিহীনং ‘‘চেতিযৱন্দনায গচ্ছাম, বোধিৱন্দনায গচ্ছাম, ধম্মস্সৱনং কৰিস্সাম, দীপমালং পুপ্ফপূজং কৰিস্সাম, তীণি সুচৰিতানি সমাদায ৱত্তিস্সাম, সলাকভত্তাদীনি দস্সাম, ৱস্সাৱাসিকং দস্সাম, অজ্জ সঙ্ঘস্স চত্তাৰো পচ্চযে দস্সাম, সঙ্ঘং নিমন্তেত্ৱা খাদনীযাদীনি সংৱিদহথ, আসনানি পঞ্ঞপেথ, পানীযং উপট্ঠপেথ, সঙ্ঘং পচ্চুগ্গন্ত্ৱা আনেথ, পঞ্ঞত্তাসনে নিসীদাপেথ, ছন্দজাতা উস্সাহজাতা ৱেয্যাৱচ্চং কৰোথা’’তিআদিকথনকালে মেত্তং ৱচীকম্মং নাম. ভিক্খূনং পাতোৱ উট্ঠায সৰীৰপ্পটিজগ্গনং কত্ৱা চেতিযঙ্গণং গন্ত্ৱা ৱত্তাদীনি কত্ৱা ৱিৱিত্তসেনাসনে নিসীদিত্ৱা ‘‘ইমস্মিং ৱিহাৰে ভিক্খূ সুখী হোন্তু অৱেৰা অব্যাপজ্জা’’তি চিন্তনং মেত্তং মনোকম্মং নাম, গিহীনং ‘‘অয্যা সুখী হোন্তু অৱেৰা অব্যাপজ্জা’’তি চিন্তনং মেত্তং মনোকম্মং নাম.

তত্থ নৱকানং চীৱৰকম্মাদীসু সহাযভাৱগমনং সম্মুখা কাযকম্মং নাম, থেৰানং পন পাদধোৱনসিঞ্চনবীজনদানাদিভেদম্পি সব্বং সামীচিকম্মং সম্মুখা কাযকম্মং নাম, উভযেহিপি দুন্নিক্খিত্তানং দাৰুভণ্ডাদীনং তেসু অৱঞ্ঞং অকত্ৱা অত্তনা দুন্নিক্খিত্তানং ৱিয পটিসামনং পৰম্মুখা মেত্তং কাযকম্মং নাম. ‘‘দেৱত্থেৰো তিস্সত্থেৰো’’তি ৱুত্তং এৱং পগ্গয্হৱচনং সম্মুখা মেত্তং ৱচীকম্মং নাম, ৱিহাৰে অসন্তং পন পটিপুচ্ছন্তস্স ‘‘কুহিং অম্হাকং দেৱত্থেৰো, কুহিং অম্হাকং তিস্সত্থেৰো, কদা নু খো আগমিস্সতী’’তি এৱং পিযৱচনং পৰম্মুখা মেত্তং ৱচীকম্মং নাম. মেত্তাসিনেহসিনিদ্ধানি পন নযনানি উম্মীলেত্ৱা পসন্নেন মুখেন ওলোকনং সম্মুখা মেত্তং মনোকম্মং নাম, ‘‘দেৱত্থেৰো তিস্সত্থেৰো অৰোগো হোতু অব্যাপজ্জো’’তি সমন্নাহৰণং পৰম্মুখা মেত্তং মনোকম্মং নাম. কামঞ্চেত্থ মেত্তাসিনেহসিনিদ্ধানং নযনানং উম্মীলনং, পসন্নেন মুখেন ওলোকনঞ্চ মেত্তং কাযকম্মমেৱ. যস্স পন চিত্তস্স ৱসেন নযনানং মেত্তাসিনেহসিনিদ্ধতা, মুখস্স চ পসন্নতা, তং সন্ধায ৱুত্তং ‘‘মেত্তং মনোকম্মং নামা’’তি. সমাধিসংৱত্তনপ্পযোজনানি সমাধিসংৱত্তনিকানি.

সমানসীলতং গতোতি তেসু তেসু দিসাভাগেসু ৱিহৰন্তেহি ভিক্খূহি সদ্ধিং সমানসীলতং গতো. যাযন্তি যা অযং ময্হঞ্চেৱ তুম্হাকঞ্চ পচ্চক্খভূতা. দিট্ঠীতি সম্মাদিট্ঠি. অৰিযাতি নিদ্দোসা. নিয্যাতীতি ৱট্টদুক্খতো নিস্সৰতি নিগ্গচ্ছতি. সযং নিয্যন্তীযেৱ হি তংসমঙ্গিপুগ্গলং ৱট্টদুক্খতো নিয্যাপেতীতি ৱুচ্চতি. যা সত্থু অনুসিট্ঠি, তং কৰোতীতি তক্কৰো, তস্স, যথানুসিট্ঠং পটিপজ্জকস্সাতি অত্থো. দুক্খক্খযাযাতি সব্বদুক্খক্খযত্থং. দিট্ঠিসামঞ্ঞগতোতি সমানদিট্ঠিভাৱং উপগতো.

ফাসুৱিহাৰসুত্তৱণ্ণনা নিট্ঠিতা.

৬-১০. আনন্দসুত্তাদিৱণ্ণনা

১০৬-১১০. ছট্ঠে অধিসীলেতি নিমিত্তত্থে ভুম্মং, সীলনিমিত্তং ন উপৱদতি ন নিন্দতীতি অত্থো. অত্তনি কম্মে চ অনু অনু পেক্খতি সীলেনাতি অত্তানুপেক্খী. সত্তমাদীনি উত্তানত্থানেৱ.

আনন্দসুত্তাদিৱণ্ণনা নিট্ঠিতা.

ফাসুৱিহাৰৱগ্গৱণ্ণনা নিট্ঠিতা.