(১২) ২. অন্ধকৱিন্দৱগ্গো

১-৪. কুলূপকসুত্তাদিৱণ্ণনা

১১১-১১৪. দুতিযস্স পঠমে অসন্থৱেসু কুলেসু ৱিস্সাসো এতস্সাতি অসন্থৱৱিস্সাসী. অনিস্সৰো হুত্ৱা ৱিকপ্পেতি সংৱিদহতি সীলেনাতি অনিস্সৰৱিকপ্পী. ৱিস্সট্ঠানি ৱিসুং খিত্তানি ভেদেন অৱত্থিতানি কুলানি ঘটনত্থায উপসেৱতি সীলেনাতি ৱিস্সট্ঠুপসেৱী. দুতিযাদীনি উত্তানত্থানেৱ.

কুলূপকসুত্তাদিৱণ্ণনা নিট্ঠিতা.

৫-১৩. মচ্ছৰিনীসুত্তাদিৱণ্ণনা

১১৫-১২৩. পঞ্চমে আৱাসমচ্ছৰিযাদীনি পঞ্চ ইধ ভিক্খুনিযা ৱসেন আগতানি, ভিক্খুস্স ৱসেনপি তানি ৱেদিতব্বানি. আৱাসমচ্ছৰিযেন হি সমন্নাগতো ভিক্খু আগন্তুকং দিস্ৱা ‘‘এত্থ চেতিযস্স ৱা সঙ্ঘস্স ৱা পৰিক্খাৰো ঠপিতো’’তিআদীনি ৱত্ৱা সঙ্ঘিকআৱাসং ন দেতি. কুলমচ্ছৰিযেন সমন্নাগতো ভিক্খু তেহি তেহি কাৰণেহি আদীনৱং দস্সেত্ৱা অত্তনো উপট্ঠাকে কুলে অঞ্ঞেসং পৱেসম্পি নিৱাৰেতি. লাভমচ্ছৰিযেন সমন্নাগতো সঙ্ঘিকম্পি লাভং মচ্ছৰাযন্তো যথা অঞ্ঞে ন লভন্তি, এৱং কৰোতি অত্তনা ৱিসমনিস্সিততায বলৱনিস্সিততায চ. ৱণ্ণমচ্ছৰিযেন সমন্নাগতো অত্তনো ৱণ্ণং ৱণ্ণেতি, পৰেসং ৱণ্ণে ‘‘কিং ৱণ্ণো এসো’’তি তং তং দোসং ৱদতি. ৱণ্ণোতি চেত্থ সৰীৰৱণ্ণোপি, গুণৱণ্ণোপি ৱেদিতব্বো.

ধম্মমচ্ছৰিযেন সমন্নাগতো – ‘‘ইমং ধম্মং পৰিযাপুণিত্ৱা এসো মং অভিভৱিস্সতী’’তি অঞ্ঞস্স ন দেতি. যো পন – ‘‘অযং ইমং ধম্মং উগ্গহেত্ৱা অঞ্ঞথা অত্থং ৱিপৰিৱত্তেত্ৱা নাসেস্সতী’’তি ধম্মনুগ্গহেন ৱা – ‘‘অযং ইমং ধম্মং উগ্গহেত্ৱা উদ্ধতো উন্নড়ো অৱূপসন্তচিত্তো অপুঞ্ঞং পসৱিস্সতী’’তি পুগ্গলানুগ্গহেন ৱা ন দেতি, ন তং মচ্ছৰিযং. ধম্মোতি চেত্থ পৰিযত্তিধম্মো অধিপ্পেতো. পটিৱেধধম্মো হি অৰিযানংযেৱ হোতি, তে চ নং ন মচ্ছৰাযন্তি মচ্ছৰিযস্স সব্বসো পহীনত্তাতি তস্স অসম্ভৱো এৱ. তত্থ আৱাসমচ্ছৰিযেন লোহগেহে পচ্চতি, যক্খো ৱা পেতো ৱা হুত্ৱা তস্সেৱ আৱাসস্স সঙ্কাৰং সীসেন উক্খিপিত্ৱা চৰতি. কুলমচ্ছৰিযেন অপ্পভোগো হোতি. লাভমচ্ছৰিযেন গূথনিৰযে নিব্বত্ততি, সঙ্ঘস্স ৱা গণস্স ৱা লাভং মচ্ছৰাযিত্ৱা পুগ্গলিকপৰিভোগেন ৱা পৰিভুঞ্জিত্ৱা যক্খো ৱা পেতো ৱা মহাঅজগৰো ৱা হুত্ৱা নিব্বত্ততি. ৱণ্ণমচ্ছৰিযেন ভৱেসু নিব্বত্তস্স ৱণ্ণো নাম ন হোতি. ধম্মমচ্ছৰিযেন কুক্কুড়নিৰযে নিব্বত্ততি. ছট্ঠাদীনি উত্তানত্থানেৱ.

মচ্ছৰিনীসুত্তাদিৱণ্ণনা নিট্ঠিতা.

অন্ধকৱিন্দৱগ্গৱণ্ণনা নিট্ঠিতা.