৬. কুসিনাৰসুত্তৱণ্ণনা

৭৬. ছট্ঠে নগৰং পৱিসিতুকামা উয্যানতো উপেচ্চ ৱত্তন্তি গচ্ছন্তি এতেনাতি উপৱত্তনং. যথেৱ হি কলম্বনদিতীৰতো ৰাজমাতুৱিহাৰদ্ৱাৰেন থূপাৰামং গন্তব্বং হোতি, এৱং হিৰঞ্ঞৱতিকায পাৰিমতীৰতো সালৱনং উয্যানং, যথা অনুৰাধপুৰস্স থূপাৰামো দক্খিণপচ্ছিমদিসায, এৱং তং উয্যানং কুসিনাৰায দক্খিণপচ্ছিমদিসায হোতি. যথা থূপাৰামতো দক্খিণদ্ৱাৰেন নগৰং পৱিসনমগ্গো পাচীনমুখো গন্ত্ৱা উত্তৰেন নিৱত্ততি, এৱং উয্যানতো সালপন্তি পাচীনমুখা গন্ত্ৱা উত্তৰেন নিৱত্তা, তস্মা তং ‘‘উপৱত্তন’’ন্তি ৱুচ্চতি. অন্তৰেতি দ্ৱিন্নং সালৰুক্খানং ৱেমজ্ঝে. তত্থ হি পঞ্ঞাপিযমানস্স মঞ্চস্স একা সালপন্তি সীসভাগে হোতি, একা পাদভাগে. তত্ৰপি একো তৰুণসালো সীসভাগস্স আসন্নো হোতি, একো পাদভাগস্স. অপিচ যমকসালা নাম মূলখন্ধৱিটপপত্তেহি অঞ্ঞমঞ্ঞং সংসিব্বিত্ৱা ঠিতসালাতিপি ৱদন্তি.

দ্ৱেড়্হকন্তি দ্ৱিধাগাহো, অনেকংসগ্গাহোতি অত্থো. ৱিমতীতি সংসযাপত্তীতি আহ ‘‘ৱিনিচ্ছিতুং অসমত্থতা’’তি. তং ৱো ৱদামীতি তং সংসযৱন্তং ভিক্খুং সন্ধায ৱো তুম্হে ৱদামীতি. নিক্কঙ্খভাৱপচ্চক্খকৰণন্তি বুদ্ধাদীসু তেসং ভিক্খূনং নিক্কঙ্খভাৱস্স পচ্চক্খকাৰিযা যাথাৱতো তমত্থং পটিৱিজ্ঝিত্ৱা ঠিতং সব্বঞ্ঞুতঞ্ঞাণমেৱ. এত্থাতি এতস্মিং অত্থে.

কুসিনাৰসুত্তৱণ্ণনা নিট্ঠিতা.