(৮) ৩. অপণ্ণকৱগ্গো

১-২. পধানসুত্তাদিৱণ্ণনা

৭১-৭২. ততিযৱগ্গস্স পঠমে যৱতি তেন ফলং মিস্সিতং ৱিয হোতীতি যোনি, একন্তিকং কাৰণং. অস্সাতি যথাৱুত্তস্স ভিক্খুনো. পৰিপুণ্ণন্তি অৱিকলং অনৱসেসং. আসৱে খেপেতীতি আসৱক্খযো, অগ্গমগ্গো. ইধ পন অৰহত্তফলং অধিপ্পেতন্তি আহ ‘‘অৰহত্তত্থাযা’’তি. দুতিযং উত্তানমেৱ.

পধানসুত্তাদিৱণ্ণনা নিট্ঠিতা.

৩-৫. সপ্পুৰিসসুত্তাদিৱণ্ণনা

৭৩-৭৫. ততিযে পঞ্হত্থায অভিনীতোতি পঞ্হকৰণত্থায অভিমুখং নীতো. অলম্বিতং কত্ৱাতি অলম্বং কত্ৱা, অযমেৱ ৱা পাঠো, ৱিপলম্বং অকত্ৱাতি অত্থো. অৱজানাতীতি অৱঞ্ঞং কৰোতি, নিন্দতীতি অত্থো. চতুত্থপঞ্চমে নত্থি ৱত্তব্বং.

সপ্পুৰিসসুত্তাদিৱণ্ণনা নিট্ঠিতা.

৬. কুসিনাৰসুত্তৱণ্ণনা

৭৬. ছট্ঠে নগৰং পৱিসিতুকামা উয্যানতো উপেচ্চ ৱত্তন্তি গচ্ছন্তি এতেনাতি উপৱত্তনং. যথেৱ হি কলম্বনদিতীৰতো ৰাজমাতুৱিহাৰদ্ৱাৰেন থূপাৰামং গন্তব্বং হোতি, এৱং হিৰঞ্ঞৱতিকায পাৰিমতীৰতো সালৱনং উয্যানং, যথা অনুৰাধপুৰস্স থূপাৰামো দক্খিণপচ্ছিমদিসায, এৱং তং উয্যানং কুসিনাৰায দক্খিণপচ্ছিমদিসায হোতি. যথা থূপাৰামতো দক্খিণদ্ৱাৰেন নগৰং পৱিসনমগ্গো পাচীনমুখো গন্ত্ৱা উত্তৰেন নিৱত্ততি, এৱং উয্যানতো সালপন্তি পাচীনমুখা গন্ত্ৱা উত্তৰেন নিৱত্তা, তস্মা তং ‘‘উপৱত্তন’’ন্তি ৱুচ্চতি. অন্তৰেতি দ্ৱিন্নং সালৰুক্খানং ৱেমজ্ঝে. তত্থ হি পঞ্ঞাপিযমানস্স মঞ্চস্স একা সালপন্তি সীসভাগে হোতি, একা পাদভাগে. তত্ৰপি একো তৰুণসালো সীসভাগস্স আসন্নো হোতি, একো পাদভাগস্স. অপিচ যমকসালা নাম মূলখন্ধৱিটপপত্তেহি অঞ্ঞমঞ্ঞং সংসিব্বিত্ৱা ঠিতসালাতিপি ৱদন্তি.

দ্ৱেড়্হকন্তি দ্ৱিধাগাহো, অনেকংসগ্গাহোতি অত্থো. ৱিমতীতি সংসযাপত্তীতি আহ ‘‘ৱিনিচ্ছিতুং অসমত্থতা’’তি. তং ৱো ৱদামীতি তং সংসযৱন্তং ভিক্খুং সন্ধায ৱো তুম্হে ৱদামীতি. নিক্কঙ্খভাৱপচ্চক্খকৰণন্তি বুদ্ধাদীসু তেসং ভিক্খূনং নিক্কঙ্খভাৱস্স পচ্চক্খকাৰিযা যাথাৱতো তমত্থং পটিৱিজ্ঝিত্ৱা ঠিতং সব্বঞ্ঞুতঞ্ঞাণমেৱ. এত্থাতি এতস্মিং অত্থে.

কুসিনাৰসুত্তৱণ্ণনা নিট্ঠিতা.

৭. অচিন্তেয্যসুত্তৱণ্ণনা

৭৭. সত্তমে লোকচিন্তাতি লোকসন্নিৱেসপ্পটিসংযুত্তা ৱীমংসা. তেনাহ ‘‘কেন নু খো চন্দিমসূৰিযা’’তিআদি. নাড়িকেৰাদযোতি আদি-সদ্দেন অৱুত্তানং ওসধিতিণৱনপ্পতিআদীনং সঙ্গহো. এৱৰূপা লোকচিন্তাতি এদিসা ৱুত্তসদিসা অঞ্ঞাপি সা লোকচিন্তা.

অচিন্তেয্যসুত্তৱণ্ণনা নিট্ঠিতা.

৮. দক্খিণসুত্তৱণ্ণনা

৭৮. অট্ঠমে দানসঙ্খাতায দক্খিণাযাতি দেয্যধম্মসঙ্খাতায দক্খিণায. ৱিসুদ্ধি নাম মহাজুতিকতা. সা পন মহপ্ফলতায ৱেদিতব্বাতি আহ ‘‘মহপ্ফলভাৱেনা’’তি. ৱিসুজ্ঝতীতি ন কিলিস্সতি, অমলিনা মহাজুতিকা মহাৱিপ্ফাৰা হোতীতি অত্থো. সুচিধম্মোতি ৰাগাদিঅসুচিৱিধমনেন সুচিসভাৱো. লামকধম্মোতি হীনসভাৱো পাপকিৰিযায. অকুসলধম্মা হি একন্তনিহীনা. জূজকো সীলৱা কল্যাণধম্মো ন হোতি, তস্স মহাবোধিসত্তস্স অত্তনো পুত্তদানং দানপাৰমিযা মত্থকং গণ্হন্তং মহাপথৱিকম্পনসমত্থং জাতং. স্ৱাযং দাযকগুণোতি আহ ‘‘ৱেস্সন্তৰমহাৰাজা কথেতব্বো’’তিআদি. উদ্ধৰতীতি বহুলং পাপকম্মৱসেন লদ্ধব্বৱিনিপাততো উদ্ধৰতি, তস্মা নত্থি ময্হং কিঞ্চি চিত্তস্স অঞ্ঞত্থত্তন্তি অধিপ্পাযো.

পেতদক্খিণন্তি পেতে উদ্দিস্স দাতব্বদক্খিণং. পাপিতকালেযেৱাতি ‘‘ইদং দানং অসুকস্স পেতস্স হোতূ’’তি তংউদ্দিসনৱসেন পত্তিযা পাপিতকালেযেৱ. অস্সাতি পেতস্স. পাপুণীতি ফলসম্পত্তিলভাপনৱসেন পাপুণি. অযঞ্হি পেতে উদ্দিস্স দানে ধম্মতা. তদা কোসলৰঞ্ঞো পৰিচ্চাগৱসেন অতিৱিয দানজ্ঝাসযতং বুদ্ধপ্পমুখস্স চ সঙ্ঘস্স উক্কংসগতগুণৱিসিট্ঠতং সন্ধাযাহ ‘‘অসদিসদানং কথেতব্ব’’ন্তি.

দক্খিণসুত্তৱণ্ণনা নিট্ঠিতা.

৯-১০. ৱণিজ্জসুত্তাদিৱণ্ণনা

৭৯-৮০. নৱমে তংসদিসাতি যাদিসা ৱণিজ্জা পযুত্তা অযথাধিপ্পাযা অঞ্ঞা ৱা সম্পজ্জতি, তাদিসাৱাতি অত্থো. ছেদং গচ্ছতীতি ৱিনাসং পাপুণাতি. অধিপ্পাযতো পৰা ৱিসিট্ঠাতি পৰাধিপ্পাযো. তেনেৱাহ ‘‘অজ্ঝাসযতো অধিকতৰফলা হোতী’’তি. চীৱৰাদিনা পচ্চযেন ৱদেয্যাসীতি চীৱৰাদিপচ্চযহেতু মং ৱদেয্যাসি পত্থেয্যাসি. অথ ৱা যদা চীৱৰাদিনা পচ্চযেন অত্থো হোতি, তদা মং যাচেয্যাসীতি অত্থো. সেসং সুৱিঞ্ঞেয্যমেৱ. দসমং উত্তানমেৱ.

ৱণিজ্জসুত্তাদিৱণ্ণনা নিট্ঠিতা.

অপণ্ণকৱগ্গৱণ্ণনা নিট্ঠিতা.