(৬) ১. পুঞ্ঞাভিসন্দৱগ্গো

১. পঠমপুঞ্ঞাভিসন্দসুত্তৱণ্ণনা

৫১. দুতিযস্স পঠমে পুঞ্ঞাভিসন্দাতি ৱা পুঞ্ঞনদিযো. অৱিচ্ছেদেন নিচ্চং পৱত্তিযমানানি হি পুঞ্ঞানি অভিসন্দনট্ঠেন ‘‘পুঞ্ঞাভিসন্দা’’তি ৱুত্তা. অপৰিমিতন্তি আড়্হকগণনায অপৰিমিতং, যোজনৱসেন পনস্স পৰিমাণং অত্থি. তথা হি হেট্ঠা মহাপথৱিযা উপৰি আকাসেন পৰতো চক্কৱাড়পব্বতেন মজ্ঝে তত্থ তত্থ ঠিতেহি দীপপব্বতপৰিযন্তেহি পৰিচ্ছিন্নত্তা যোজনতো সক্কা পমাণং কাতুং. ভেৰৱাৰম্মণেহীতি সৱিঞ্ঞাণকাৱিঞ্ঞাণকেহি ভেৰৱাৰম্মণেহি. তথা হি তং মহাসৰীৰমচ্ছকুম্ভীলযক্খৰক্খসমহানাগদানৱাদীনং সৱিঞ্ঞাণকানং ৱড়ৱামুখপাতালাদীনং অৱিঞ্ঞাণকানঞ্চ ভেৰৱাৰম্মণানং ৱসেন ‘‘বহুভেৰৱ’’ন্তি ৱুচ্চতি. সেসমেত্থ উত্তানমেৱ.

পঠমপুঞ্ঞাভিসন্দসুত্তৱণ্ণনা নিট্ঠিতা.

২. দুতিযপুঞ্ঞাভিসন্দসুত্তৱণ্ণনা

৫২. দুতিযে সোতাপন্নস্স সদ্ধা অধিপ্পেতাতি সোতাপন্নস্স মগ্গেনাগতা সদ্ধা অধিপ্পেতা.

দুতিযপুঞ্ঞাভিসন্দসুত্তৱণ্ণনা নিট্ঠিতা.

৩-৪. পঠমসংৱাসসুত্তাদিৱণ্ণনা

৫৩-৫৪. ততিযে যথাকম্মং তা তা গতিযো অৰন্তি উপগচ্ছন্তীতি অৰিযা, সত্তা. ইমে পন কুচ্ছিতা অৰিযাতি কদৰিযা. থদ্ধমচ্ছৰিনো, থদ্ধেন মচ্ছৰেন সমন্নাগতাতি অত্থো. থদ্ধমচ্ছৰিযসদিসঞ্হি কুচ্ছিতং সব্বদা নিহীনং নত্থি সব্বগুণানং আদিভূতস্স ভোগসম্পত্তিআদিসব্বসম্পত্তীনং মূলভূতস্স দানস্স নিসেধনতো. তেনাহ ‘‘কদৰিযাতি থদ্ধমচ্ছৰিনো’’তি. একচ্চো হি অত্তনো ৱসনট্ঠানে ভিক্খূ হত্থং পসাৰেত্ৱাপি ন ৱন্দতি. অঞ্ঞত্থ গতো ৱিহাৰং পৱিসিত্ৱা সক্কচ্চং ৱন্দিত্ৱা মধুৰপ্পটিসন্থাৰং কৰোতি ‘‘কিং, ভন্তে, অম্হাকং ৱসনট্ঠানং নাগচ্ছথ, সম্পন্নো পদেসো, পটিবলাহং অয্যানং যাগুভত্তাদীহি উপট্ঠানং কাতু’’ন্তি. ভিক্খু ‘‘সদ্ধো অযং উপাসকো’’তি যাগুভত্তাদীহি সঙ্গণ্হাতি.

অথেকো থেৰো তস্স গামং গন্ত্ৱা পিণ্ডায চৰতি. সো তং দিস্ৱা অঞ্ঞেন ৱা গচ্ছতি, ঘৰং ৱা পৱিসতি. সচেপি সম্মুখীভাৱং আগচ্ছতি, হত্থেন ৱন্দিত্ৱা ‘‘অয্যস্স ভিক্খং দেথ, অহং একেন কম্মেন গচ্ছামী’’তি পক্কমতি. থেৰো সকলগামং চৰিত্ৱা তুচ্ছপত্তোৱ নিক্খমতি. ইদং তাৱ মুদুমচ্ছৰিযং নাম. যেন অদাযকোপি দাযকো ৱিয পঞ্ঞাযতি. ইধ পন থদ্ধমচ্ছৰিযং অধিপ্পেতং. যেন সমন্নাগতো ভিক্খূসু পিণ্ডায পৱিট্ঠেসু ‘‘থেৰা ঠিতা’’তি ৱুত্তে ‘‘কিং ময্হং পাদা ৰুজ্জন্তী’’তিআদীনি ৱত্ৱা সিলাথম্ভো ৱিয খাণুকো ৱিয চ থদ্ধো হুত্ৱা তিট্ঠতি, সামীচিম্পি ন কৰোতি, কুতো দানং. অযমিধ অধিপ্পেতো. তেন ৱুত্তং ‘‘থদ্ধমচ্ছৰিনোতি থদ্ধেন মচ্ছৰেন সমন্নাগতাতি অত্থো’’তি. মচ্ছৰং মচ্ছেৰং মচ্ছৰিযন্তি অত্থতো একং.

পৰিভাসকাতি ভিক্খূ ঘৰদ্ৱাৰে ঠিতে দিস্ৱা ‘‘কিং তুম্হে কসিত্ৱা আগতা ৱপিত্ৱা লাযিত্ৱা, মযং অত্তনোপি ন লভাম, কুতো তুম্হাকং, সীঘং নিক্খমথা’’তিআদীহি সন্তজ্জকা. যাচকানং ৱচনস্স অত্থং জানন্তীতি এত্থ কিঞ্চাপি ভিক্খূ ঘৰদ্ৱাৰে ঠিতা তুণ্হী হোন্তি, অত্থতো পন ‘‘ভিক্খং দেথা’’তি ৱদন্তি নাম অৰিযায যাচনায. ৱুত্তঞ্হেতং ‘‘উদ্দিস্স অৰিযা তিট্ঠন্তি, এসা অৰিযান যাচনা’’তি (মি. প. ৪.৫.৯). তত্ৰ যে ‘‘মযং পচাম, ইমে ন পচন্তি, পচমানে পত্ৱা অলভন্তা কুহিং লভিস্সতী’’তি দেয্যধম্মং সংৱিভজন্তি, তে ৱদঞ্ঞূ যাচকানং ৱচনস্স অত্থং জানন্তি নাম ঞত্ৱা কত্তব্বকৰণতো. চতুত্থং উত্তানমেৱ.

পঠমসংৱাসসুত্তাদিৱণ্ণনা নিট্ঠিতা.

৫-৬. সমজীৱীসুত্তাদিৱণ্ণনা

৫৫-৫৬. পঞ্চমে অনুগ্গণ্হনত্থন্তি নকুলমাতা নকুলপিতাতি ইমেসং দ্ৱিন্নং সঙ্গহত্থায. নকুলস্স দাৰকস্স পিতা নকুলপিতা. নকুলমাতাতি এত্থাপি এসেৱ নযো. সেসমেত্থ উত্তানমেৱ. ছট্ঠে নত্থি ৱত্তব্বং.

সমজীৱীসুত্তাদিৱণ্ণনা নিট্ঠিতা.

৭-১০. সুপ্পৱাসাসুত্তাদিৱণ্ণনা

৫৭-৬০. সত্তমে আযুভাগপটিলাভিনী হোতীতি আযুকোট্ঠাসস্স পটিলাভিনী হোতি. তিৱিধলোকন্তি সত্তসঙ্খাৰভাজনসঙ্খাতং তিৱিধং লোকং. ৱিদিতং কত্ৱাতি ৱিভূতং কত্ৱা. লোকৱিদূনন্তি কৰণত্থে সামিৱচনন্তি আহ ‘‘বুদ্ধেহি পসত্থা’’তি. অট্ঠমনৱমদসমানি উত্তানত্থানেৱ.

সুপ্পৱাসাসুত্তাদিৱণ্ণনা নিট্ঠিতা.

পুঞ্ঞাভিসন্দৱগ্গৱণ্ণনা নিট্ঠিতা.