৫-৬. ৰোহিতস্সসুত্তাদিৱণ্ণনা

৪৫-৪৬. পঞ্চমে (সং. নি. টী. ১.১.১০৭) একোকাসেতি চক্কৱাড়স্স পৰিযন্তসঞ্ঞিতে একস্মিং ওকাসে. ভুম্মন্তি ‘‘যত্থা’’তি ইদং ভুম্মৱচনং. সামঞ্ঞতো ৱুত্তম্পি ‘‘সো লোকস্স অন্তো’’তি ৱচনতো ৱিসিট্ঠৱিসযমেৱ হোতি. ‘‘ন জাযতি, ন মীযতী’’তি ৱত্ৱা পুন ‘‘ন চৱতি, ন উপপজ্জতী’’তি কস্মা ৱুত্তন্তি আহ ‘‘ইদং অপৰাপৰং…পে… গহিত’’ন্তি. পদগমনেনাতি পদসা গমনেন. সত্থা সঙ্খাৰলোকস্স অন্তং সন্ধায ৱদতি উপৰি সব্বানি পকাসেতুকামো. সঙ্খাৰলোকস্স হি অন্তো নিব্বানং.

দড়্হং থিৰং ধনু এতস্সাতি দড়্হধন্ৱা, সো এৱ ‘‘দড়্হধম্মা’’তি ৱুত্তো. তেনাহ ‘‘দড়্হধনূ’’তি. উত্তমপ্পমাণং নাম সহস্সথামধনু. ধনুগ্গণ্হনসিপ্পচিত্তকতায ধনুগ্গহো, ন ধনুগ্গহণমত্তেনাতি আহ ‘‘ধনুগ্গহোতি ধনুআচৰিযো’’তি. ‘‘ধনুগ্গহো’’তি ৱত্ৱা ‘‘সিক্খিতো’’তি ৱুত্তে ধনুসিক্খায সিক্খিতোতি ৱিঞ্ঞাযতি. সিক্খা চ এত্তকেন কালেন সিক্খন্তস্স উক্কংসগতা হোতীতি আহ ‘‘দ্ৱাদস ৱস্সানি ধনুসিপ্পং সিক্খিতো’’তি. উসভপ্পমাণেতি ৱীসতি যট্ঠিযো উসভং, তস্মিং উসভপ্পমাণে পদেসে. ৱালগ্গন্তি ৱালকোটিং. কতহত্থোতি পৰিচিতহত্থো. কতসৰক্খেপোতি থিৰলক্খে চ চললক্খে চ পৰেসং দস্সনৱসেন সৰক্খেপস্স কতাপী. তেনাহ ‘‘দস্সিতসিপ্পো’’তি, ‘‘কতযোগ্গো’’তি কেচি. অসন্তি এতেনাতি অসনং, কণ্ডো. তালচ্ছাদিন্তি তালচ্ছাযং. সা পন ৰতনমত্তা ৱিদত্থিচতুৰঙ্গুলা.

পুৰত্থিমা সমুদ্দাতি একস্মিং চক্কৱাড়ে পুৰত্থিমা সমুদ্দা. সমুদ্দসীসেন পুৰত্থিমচক্কৱাড়মুখৱট্টিং ৱদতি. পচ্ছিমসমুদ্দোতি এত্থাপি এসেৱ নযো. নিপ্পপঞ্চতন্তি অদন্তকাৰিতং. সম্পত্তেতি তাদিসেন জৱেন গচ্ছন্তেন সম্পত্তে. অনোতত্তেতি এত্থাপি ‘‘সম্পত্তে’’তি পদং আনেত্ৱা সম্বন্ধো, তথা ‘‘নাগলতাদন্তকট্ঠ’’ন্তি এত্থাপি. তদাতি যদা সো লোকন্তগৱেসকো অহোসি, তদা. দীঘাযুককালোতি অনেকৱস্সসহস্সাযুককালো. চক্কৱাড়লোকস্সাতি সামঞ্ঞৱসেন একৱচনং, চক্কৱাড়লোকানন্তি অত্থো. ইমস্মিংযেৱ চক্কৱাড়ে নিব্বত্তিপুব্বপৰিচযসিদ্ধায নিকন্তিযা.

সসঞ্ঞিম্হি সমনকেতি ন ৰূপধম্মমত্তকে, অথ খো পঞ্চক্খন্ধসমুদাযেতি দস্সেতি. সমিতপাপোতি সমুচ্ছিন্নসংকিলেসধম্মো. ছট্ঠং উত্তানমেৱ.

ৰোহিতস্সসুত্তাদিৱণ্ণনা নিট্ঠিতা.