৯. ধম্মপদসুত্তৱণ্ণনা

২৯. নৱমে ঝানাদিভেদো ধম্মো পজ্জতি এতেনাতি ধম্মপদং, অনভিজ্ঝাৱ ধম্মপদং অনভিজ্ঝাধম্মপদং, অনভিজ্ঝাপধানো ৱা ধম্মকোট্ঠাসো অনভিজ্ঝাধম্মপদং. এৱং সেসেসুপি. অত্থতো পন অনভিজ্ঝাধম্মপদং নাম অলোভো ৱা অলোভসীসেন অধিগতজ্ঝানৱিপস্সনামগ্গফলনিব্বানানি ৱা. অব্যাপাদো ধম্মপদং নাম মেত্তা ৱা মেত্তাসীসেন অধিগতজ্ঝানাদীনি ৱা. সম্মাসতিধম্মপদং নাম সূপট্ঠিতস্সতি ৱা সতিসীসেন অধিগতজ্ঝানাদীনি ৱা. সম্মাসমাধিধম্মপদং নাম অট্ঠসমাপত্তি ৱা অট্ঠসমাপত্তিসীসেন অধিগতজ্ঝানৱিপস্সনামগ্গফলনিব্বানানি ৱা. দসঅসুভৱসেন ৱা অধিগতজ্ঝানাদীনি অনভিজ্জা ধম্মপদং. চতুব্ৰহ্মৱিহাৰৱসেন অধিগতানি অব্যাপাদো ধম্মপদং. দসানুস্সতি আহাৰেপটিকূলসঞ্ঞাৱসেন অধিগতানি সম্মাসতিধম্মপদং. দসকসিণআনাপানৱসেন অধিগতানি সম্মাসমাধিধম্মপদং. অনভিজ্ঝালূতি অনভিজ্ঝাযনসীলো. অভিপুব্বো ঝেসদ্দো অভিজ্ঝাযনট্ঠো. তেনেৱাহ ‘‘নিত্তণ্হো হুত্ৱা’’তি. পকতিভাৱং অৱিজহন্তেনাতি পৰিসুদ্ধভাৱং সভাৱসঙ্খাতঅনৱজ্জসঙ্খাতং পকতিভাৱং অৱিজহন্তেন. সাৱজ্জধম্মসমুপ্পত্তিযা হি চিত্তস্স অনৱজ্জভাৱো জহিতো হোতীতি.

ধম্মপদসুত্তৱণ্ণনা নিট্ঠিতা.