(২৫) ৫. আপত্তিভযৱগ্গো

১. সঙ্ঘভেদকসুত্তৱণ্ণনা

২৪৩. পঞ্চমস্স পঠমে ৱিৱাদাধিকৰণাদীসূতি ৱিৱাদাধিকৰণং অনুৱাদাধিকৰণং আপত্তাধিকৰণং কিচ্চাধিকৰণন্তি ইমেসু চতূসু. তত্থ ধম্মোতি ৱা অধম্মোতি ৱা অট্ঠাৰসহি ৱত্থূহি ৱিৱদন্তানং ভিক্খূনং যো ৱিৱাদো, ইদং ৱিৱাদাধিকৰণং নাম. সীলৱিপত্তিযা ৱা আচাৰদিট্ঠিআজীৱৱিপত্তিযা ৱা অনুৱদন্তানং যো অনুৱাদো উপৱদনা চেৱ চোদনা চ, ইদং অনুৱাদাধিকৰণং নাম. মাতিকায আগতা পঞ্চ, ৱিভঙ্গে দ্ৱেতি সত্তপি আপত্তিক্খন্ধা, ইদং আপত্তাধিকৰণং নাম. সঙ্ঘস্স অপলোকনাদীনং চতুন্নং কম্মানং কৰণং, ইদং কিচ্চাধিকৰণং নাম. সেসমেত্থ উত্তানমেৱ.

সঙ্ঘভেদকসুত্তৱণ্ণনা নিট্ঠিতা.

২-৩. আপত্তিভযসুত্তাদিৱণ্ণনা

২৪৪-৫. দুতিযে ভস্সতি নিৰত্থকভাৱেন খিপীযতীতি ভস্মং, ছাৰিকা. তস্স পুটং ভণ্ডিকা ভস্মপুটং. তেনাহ ‘‘ভস্মপুটন্তি ছাৰিকাভণ্ডিক’’ন্তি. ততিযং উত্তানত্থমেৱ.

আপত্তিভযসুত্তাদিৱণ্ণনা নিট্ঠিতা.

৪-৭. সেয্যাসুত্তাদিৱণ্ণনা

২৪৬-৯. চতুত্থে পেতাতি পেচ্চভাৱং গতা. তে পন যস্মা ইধ কতকালকিৰিযা কালেন কতজীৱিতুচ্ছেদা হোন্তি, তস্মা ৱুত্তং ‘‘কালকতা ৱুচ্চন্তী’’তি, মতাতি অত্থো. অথ ৱা পেচ্চভৱং গতা, পেতূপপত্তিৱসেন নিব্বত্তিং উপগতাতি অত্থো. তেনাহ ‘‘অথ ৱা পেতৱিসযে নিব্বত্তা পেতা নামা’’তি. একেন পস্সেন সযিতুং ন সক্কোন্তি দুক্খুপ্পত্তিতো.

তেজুস্সদত্তাতি ইমিনা সীহস্স অভীৰুকভাৱং দস্সেতি. ভীৰুকা সেসমিগা অত্তনো আসযং পৱিসিত্ৱা সন্তাসপুব্বকং যথা তথা সযন্তি, সীহো পন অভীৰুকো সভাৱতো সতোকাৰী ভিক্খু ৱিয সতিং উপট্ঠপেত্ৱাৱ সযতি. তেনাহ ‘‘দ্ৱে পুৰিমপাদে’’তিআদি. দক্খিণে পুৰিমপাদে ৱামস্স পুৰিমপাদস্স ঠপনৱসেন দ্ৱে পুৰিমপাদে একস্মিং ঠানে ঠপেত্ৱা. পচ্ছিমপাদে ৱুত্তনযেনেৱ ইধাপি একস্মিং ঠানে ঠপনং ৱেদিতব্বং, ঠিতোকাসসল্লক্খণং অভীৰুকৱসেনেৱ. সীসং পন উক্খিপিত্ৱাতিআদিনা ৱুত্তসীহকিৰিযা অনুত্ৰস্তপ্পবুজ্ঝনা ৱিয অভীৰুভাৱসিদ্ধধম্মতাৱসেনেৱাতি ৱেদিতব্বা. সীহৱিজম্ভনং অতিৱেলং একাকাৰে ঠপিতানং সৰীৰাৱযৱানং গমনাদিকিৰিযাসু যোগ্যভাৱাপাদনত্থং. তিক্খত্তুং সীহনাদনদনং অপ্পেসক্খমিগৰাজেহি পৰিত্তাসপৰিহৰণত্থং.

অযং ৱুচ্চতি, ভিক্খৱে, তথাগতসেয্যাতি ইমিনা চতুত্থজ্ঝানসেয্যা তথাগতসেয্যা নামাতি দস্সেতি. সেতি অব্যাৱটভাৱেন পৱত্ততি এত্থাতি সেয্যা, চতুত্থজ্ঝানমেৱ সেয্যা চতুত্থজ্ঝানসেয্যা. কিং পন তং চতুত্থজ্ঝানন্তি? আনাপানচতুত্থজ্ঝানং. তত্থ হি ঠত্ৱা ৱিপস্সনং ৱড্ঢেত্ৱা ভগৱা অনুক্কমেন অগ্গমগ্গং অধিগন্ত্ৱা তথাগতো জাতোতি. তযিদং পদট্ঠানং নাম ন সেয্যা, তথাপি যস্মা ‘‘চতুত্থজ্ঝানসমনন্তৰা ভগৱা পৰিনিব্বাযী’’তি মহাপৰিনিব্বানে (দী. নি. ২.২১৯) আগতং, তস্মা লোকিযচতুত্থজ্ঝানসমাপত্তি এৱ তথাগতসেয্যাতি কেচি. এৱং সতি পৰিনিব্বানকালিকাৱ তথাগতসেয্যা আপজ্জতি, ন চ ভগৱা লোকিযচতুত্থজ্ঝানসমাপজ্জনবহুলো ৱিহাসি. অগ্গফলৱসেন পৱত্তং পনেত্থ চতুত্থজ্ঝানং ৱেদিতব্বং. তত্থ যথা সত্তানং নিদ্দূপগমলক্খণা সেয্যা ভৱঙ্গচিত্তৱসেন হোতি, সা পন নেসং পঠমজাতিসমন্ৱযা যেভুয্যৱুত্তিকা, এৱং ভগৱতো অৰিযজাতিসমন্ৱযং যেভুয্যৱুত্তিকং অগ্গফলভূতং চতুত্থজ্ঝানং তথাগতসেয্যাতি ৱেদিতব্বং. পঞ্চমাদীনি উত্তানত্থানি.

সেয্যাসুত্তাদিৱণ্ণনা নিট্ঠিতা.

৮. পঠমৱোহাৰসুত্তৱণ্ণনা

২৫০-২৫৩. অট্ঠমে অনৰিযানন্তি অসাধূনং নিহীনানং. ৱোহাৰাতি সংৱোহাৰা অভিলাপা ৱা, ‘‘দিট্ঠং মযা’’তি এৱংৱাদিতা. এত্থ চ তংতংসমুট্ঠাপকচেতনাৱসেন অত্থো ৱেদিতব্বো. নৱমাদীসু নত্থি ৱত্তব্বং.

পঠমৱোহাৰসুত্তৱণ্ণনা নিট্ঠিতা.

আপত্তিভযৱগ্গৱণ্ণনা নিট্ঠিতা.

পঞ্চমপণ্ণাসকং নিট্ঠিতং.