৭. মল্লিকাদেৱীসুত্তৱণ্ণনা

১৯৭. সত্তমে অপ্পেসক্খাতি অপ্পানুভাৱা. সা পন অপ্পেসক্খতা আধিপতেয্যসম্পত্তিযা পৰিৱাৰসম্পত্তিযা চ অভাৱেন পাকটা হোতি. তত্থ পৰিৱাৰসম্পত্তিযা অভাৱং দস্সেন্তো ‘‘অপ্পপৰিৱাৰা’’তি আহ. ইস্সৰাতি আধিপতেয্যসংৱত্তনকম্মবলেন ঈসনসীলা. সা পনস্সা ইস্সৰতা ৱিভৱসম্পত্তিপচ্চযা পাকটা জাতাতি অড্ঢতাপৰিযাযভাৱেন ৱদন্তো ‘‘অড্ঢাতি ইস্সৰা’’তি আহ. মহন্তং ধনমেতিস্সা ভূমিগতঞ্চেৱ ৱড়ঞ্জনকঞ্চাতি মহদ্ধনা. ইধ পন ৱড়ঞ্জনকেনেৱ ধনেন মহদ্ধনতং দস্সেন্তো ‘‘ৱড়ঞ্জনকধনেন মহদ্ধনা’’তি আহ. ঈসতীতি ঈসা, অভিভূতি অত্থো. মহতী ঈসা মহেসা, সুপ্পতিট্ঠিতমহেসতায পন পৰেহি মহেসোতি অক্খাতব্বতায মহেসক্খা. যস্মা পন সো মহেসক্খাভাৱো আধিপতেয্যপৰিৱাৰসম্পত্তিযা ৱিঞ্ঞাযতি, তস্মা ‘‘মহাপৰিৱাৰা’’তি ৱুত্তং.

সণ্ঠানপাৰিপূৰিযা অধিকং ৰূপমস্সাতি অভিৰূপা. সণ্ঠানপাৰিপূৰিযাতি চ হত্থপাদাদিসৰীৰাৱযৱানং সুসণ্ঠিততাযাতি অত্থো. অৱযৱপাৰিপূৰিযা হি সমুদাযপাৰিপূৰিসিদ্ধি. ৰূপন্তি চ সৰীৰং ‘‘ৰূপৱন্তেৱ সঙ্খ্যং গচ্ছতী’’তিআদীসু ৱিয. দস্সনযুত্তাতি সুৰূপভাৱেন পস্সিতব্বযুত্তা, দিস্সমানা চক্খূনি পিযাযতীতি অঞ্ঞকিচ্চৱিক্খেপং হিত্ৱাপি দট্ঠব্বাতি ৱুত্তং হোতি. দিস্সমানাৱ সোমনস্সৱসেন চিত্তং পসাদেতীতি পাসাদিকা. তেনাহ ‘‘দস্সনেন পাসাদিকা’’তি. পোক্খৰতাতি ৱুচ্চতি সুন্দৰভাৱো, ৱণ্ণস্স পোক্খৰতা ৱণ্ণপোক্খৰতা, তায ৱণ্ণসম্পত্তিযাতি অত্থো. পোৰাণা পন পোক্খৰন্তি সৰীৰং ৱদন্তি, ৱণ্ণং ৱণ্ণমেৱ. তেসং মতেন ৱণ্ণঞ্চ পোক্খৰঞ্চ ৱণ্ণপোক্খৰানি, তেসং ভাৱো ৱণ্ণপোক্খৰতা. ইতি পৰমায ৱণ্ণপোক্খৰতাযাতি উত্তমপৰিসুদ্ধেন ৱণ্ণেন চেৱ সৰীৰসণ্ঠানসম্পত্তিযা চাতি অত্থো দট্ঠব্বো. তেনেৱাহ ‘‘ৱণ্ণেন চেৱ সৰীৰসণ্ঠানেন চা’’তি. তত্থ ৱণ্ণেনাতি ৱণ্ণধাতুযা. সৰীৰং নাম সন্নিৱেসৱিসিট্ঠো কৰচৰণগীৱাসীসাদিঅৱযৱসমুদাযো, সো চ সণ্ঠানমুখেন গয্হতীতি আহ ‘‘সৰীৰসণ্ঠানেনা’’তি.

অভিসজ্জতীতি কুজ্ঝনৱসেনেৱ কুটিলকণ্টকো ৱিয তস্মিং তস্মিং সমুট্ঠানে মকৰদন্তো ৱিয লগতি. যঞ্হি কোধস্স উপ্পত্তিট্ঠানভূতে আৰম্মণে উপনাহস্স পচ্চযভূতং কুজ্ঝনৱসেন অভিসজ্জনং, তং ইধাধিপ্পেতং, ন লুব্ভনৱসেন. কুপ্পতীতিআদীসু পুব্বুপ্পত্তি কোপো, ততো বলৱতৰো ব্যাপাদো লদ্ধাসেৱনতায চিত্তস্স ব্যাপজ্জনতো. সাতিসযং লদ্ধাসেৱনতায ততো ব্যাপাদতোপি বলৱতৰা পচ্চত্থিকভাৱেন থামপ্পত্তি পতিত্থিযনা. অন্নং পানন্তিআদীসু অদীযতো অন্নং, খাদনীযং ভোজনীযঞ্চ. পাতব্যতো পানং, যংকিঞ্চি পানং. ৱসিতব্বতো অচ্ছাদেতব্বতো ৱত্থং, নিৱাসনপাৱুৰণং. যন্তি তেনাতি যানং, ছত্তুপাহনৱয্হসিৱিকাদি যংকিঞ্চি গমনপচ্চযং. ছত্তম্পি হি ৱস্সাতপদুক্খনিৱাৰণেন মগ্গগমনসাধনন্তি কত্ৱা ‘‘যান’’ন্তি ৱুচ্চতি. মালন্তি যংকিঞ্চি সুমনমালাদিপুপ্ফং. গন্ধন্তি যংকিঞ্চি চন্দনাদিৱিলেপনং.

মল্লিকাদেৱীসুত্তৱণ্ণনা নিট্ঠিতা.