৬. সাড়্হসুত্তৱণ্ণনা

১৯৬. ছট্ঠে কাযদড়্হিবহুলতং তপতীতি তপো, অত্তকিলমথানুযোগৱসেন পৱত্তং ৱীৰিযং. তেন কাযদড়্হিবহুলতানিমিত্তস্স পাপস্স জিগুচ্ছনং ৱিৰজ্জনং তপোজিগুচ্ছাতি আহ ‘‘দুক্কৰকাৰিকসঙ্খাতেনা’’তিআদি. তপোজিগুচ্ছৱাদাতিআদীসু তপোজিগুচ্ছং ৱদন্তি, মনসাপি তমেৱ সাৰতো গহেত্ৱা ৱিচৰন্তি, কাযেনপি তমেৱ অল্লীনা নানপ্পকাৰং অত্তকিলমথানুযোগমনুযুত্তা ৱিহৰন্তীতি অত্থো. অপৰিসুদ্ধকাযসমাচাৰাতি অপৰিসুদ্ধেন পাণাতিপাতাদিনা কাযসমাচাৰেন সমন্নাগতা. অপৰিসুদ্ধৱচীসমাচাৰাতি অপৰিসুদ্ধেন মুসাৱাদাদিনা ৱচীসমাচাৰেন সমন্নাগতা. অপৰিসুদ্ধমনোসমাচাৰাতি অপৰিসুদ্ধেন অভিজ্ঝাদিনা মনোসমাচাৰেন সমন্নাগতা. কামং অকুসলকাযসমাচাৰৱচীসমাচাৰপ্পৱত্তিকালেপি অভিজ্ঝাদযো পৱত্তন্তিযেৱ, তদা পন তে চেতনাপক্খিকা ৱা অব্বোহাৰিকা ৱাতি, মনোসমাচাৰৱাৰে এৱ অভিজ্ঝাদিৱসেন যোজনা কতা. অথ ৱা দ্ৱাৰন্তৰে পৱত্তানং পাণাতিপাতাদীনং ৱচীসমাচাৰাদিভাৱাভাৱো ৱিয দ্ৱাৰন্তৰে পৱত্তানম্পি অভিজ্ঝাদীনং কাযসমাচাৰাদিভাৱো অসিদ্ধো, মনোসমাচাৰভাৱো এৱ পন সিদ্ধোতি কত্ৱা মনোসমাচাৰৱাৰে এৱ অভিজ্ঝাদযো উদ্ধটা. তথা হি ৱুত্তং –

‘‘দ্ৱাৰে চৰন্তি কম্মানি, ন দ্ৱাৰা দ্ৱাৰচাৰিনো;

তস্মা দ্ৱাৰেহি কম্মানি, অঞ্ঞমঞ্ঞং ৱৱত্থিতা’’তি. (ধ. স. অট্ঠ. ১ কামাৱচৰকুসলদ্ৱাৰকথা);

অপৰিসুদ্ধাজীৱাতি অপৰিসুদ্ধেন ৱেজ্জকম্মদূতকম্মৱড্ঢিযোগাদিনা একৱীসতিঅনেসনাভেদেন আজীৱেন সমন্নাগতা. ইদঞ্চ সাসনে পব্বজিতানংযেৱ ৱসেন ৱুত্তং, ‘‘যেপি তে সমণব্ৰাহ্মণা’’তি পন ৱচনতো বাহিৰকৱসেন গহট্ঠৱসেন চ যোজনা ৱেদিতব্বা. গহট্ঠানম্পি হি জাতিধম্মকুলধম্মদেসধম্মৱিলোমনৱসেন অঞ্ঞথাপি মিচ্ছাজীৱো লব্ভতেৱ.

ঞাণদস্সনাযাতি এত্থ ঞাণদস্সনন্তি মগ্গঞাণম্পি ৱুচ্চতি ফলঞাণম্পি সব্বঞ্ঞুতঞ্ঞাণম্পি পচ্চৱেক্খণঞাণম্পি ৱিপস্সনাঞাণম্পি. ‘‘কিং নু খো, আৱুসো, ঞাণদস্সনৱিসুদ্ধত্থং ভগৱতি ব্ৰহ্মচৰিযং ৱুস্সতী’’তি (ম. নি. ১.২৫৭) হি এত্থ মগ্গঞাণং ‘‘ঞাণদস্সন’’ন্তি ৱুত্তং. ‘‘অযমঞ্ঞো উত্তৰিমনুস্সধম্মো অলমৰিযঞাণদস্সনৱিসেসো অধিগতো ফাসুৱিহাৰো’’তি (ম. নি. ১.৩২৮) এত্থ ফলঞাণং. ‘‘ভগৱতোপি খো ঞাণং উদপাদি সত্তাহকালকতো আড়াৰো কালামো’’তি (মহাৱ. ১০) এত্থ সব্বঞ্ঞুতঞ্ঞাণং. ‘‘ঞাণঞ্চ পন মে দস্সনং উদপাদি, অকুপ্পা মে ৱিমুত্তি, অযমন্তিমা জাতী’’তি (সং. নি. ৫.১০৮১; মহাৱ. ১৬; পটি. ম. ২.৩০) এত্থ পচ্চৱেক্খণঞাণং. ‘‘ঞাণদস্সনায চিত্তং অভিনীহৰতী’’তি (দী. নি. ১.২৩৪-২৩৫) এত্থ ৱিপস্সনাঞাণং. ইধ পন ঞাণদস্সনাযাতি মগ্গঞাণং ‘‘ঞাণদস্সন’’ন্তি ৱুত্তং. তেনাহ ‘‘মগ্গঞাণসঙ্খাতায দস্সনাযা’’তি. অৱিৰাধিতং ৱিজ্ঝতীতি অৱিৰাধিতং কত্ৱা ৱিজ্ঝতি. সেসমেত্থ সুৱিঞ্ঞেয্যমেৱ.

সাড়্হসুত্তৱণ্ণনা নিট্ঠিতা.