১. সোতানুগতসুত্তৱণ্ণনা

১৯১. পঞ্চমস্স পঠমে সোতানুগতানন্তি পসাদসোতং অনুগন্ত্ৱা গতানং, পগুণানং ৱাচুগ্গতানন্তি অত্থো. এৱংভূতা চ পসাদসোতং ওদহিত্ৱা ঞাণসোতেন সুট্ঠু ৱৱত্থপিতা নাম হোন্তীতি আহ ‘‘পসাদসোত’’ন্তিআদি. একচ্চস্স হি উগ্গহিতপুব্বৱচনং তং তং পগুণং নিচ্ছৰিতং সুট্ঠু ৱৱত্থপিতং ন হোতি. ‘‘অসুকং সুত্তং ৱা জাতকং ৱা কথেহী’’তি ৱুত্তে ‘‘সজ্ঝাযিত্ৱা সংসন্দিত্ৱা সমনুগ্গাহিত্ৱা জানিস্সামী’’তি ৱদন্তি. একচ্চস্স তং তং পগুণং ভৱঙ্গসোতসদিসং হোতি ‘‘অসুকং সুত্তং ৱা জাতকং ৱা কথেহী’’তি ৱুত্তে উদ্ধৰিত্ৱা তমেৱ কথেতি. তং সন্ধাযেতং ৱুত্তং ‘‘ঞাণসোতেন ৱৱত্থপিতান’’ন্তি. ইত্থিলিঙ্গাদীনি তীণি লিঙ্গানি. নামাদীনি চত্তাৰি পদানি. পঠমাদযো সত্ত ৱিভত্তিযো.

ৱড়ঞ্জেতীতি পাড়িং অনুসন্ধিং পুব্বাপৰৱসেন ৱাচুগ্গতং কৰোন্তো ধাৰেতি. ৱচসা পৰিচিতাতি সুত্তদসকৱগ্গদসকপণ্ণাসদসকৱসেন ৱাচায সজ্ঝাযিতা, ‘‘দসসুত্তানি গতানি, দসৱগ্গানি গতানী’’তিআদিনা সল্লক্খেত্ৱা ৱাচায সজ্ঝাযিতাতি অত্থো. ৱগ্গাদিৱসেন হি ইধ ৱচসা পৰিচযো অধিপ্পেতো, ন পন সুত্তেকদেসস্স সুত্তমত্তস্স ৱচসা পৰিচযো. মনসা অনু অনু পেক্খিতা ভাগসো নিজ্ঝাযিতা ৱিদিতা মনুসানুপেক্খিতা. যস্স ৱাচায সজ্ঝাযিতং বুদ্ধৱচনং মনসা চিন্তেন্তস্স তত্থ তত্থ পাকটং হোতি, মহাদীপং জালেত্ৱা ঠিতস্স ৰূপগতং ৱিয ৱিভূতং হুত্ৱা পঞ্ঞাযতি. তং সন্ধাযেতং ৱুত্তং. সুপ্পটিৱিদ্ধাতি নিজ্জটং নিগ্গুম্বং কত্ৱা সুট্ঠু যাথাৱতো পটিৱিদ্ধা. সেসমেত্থ সুৱিঞ্ঞেয্যমেৱ.

সোতানুগতসুত্তৱণ্ণনা নিট্ঠিতা.