১-২. অনুবুদ্ধসুত্তাদিৱণ্ণনা

১-২. চতুক্কনিপাতস্স পঠমে অনুবোধো পুব্বভাগিযং ঞাণং, পটিৱেধো অনুবোধেন অভিসমযো. তত্থ যস্মা অনুবোধপুব্বকো পটিৱেধো অনুবোধেন ৱিনা ন হোতি. অনুবোধো হি একচ্চো পটিৱেধসম্বদ্ধো, তদুভযাভাৱহেতুকঞ্চ ৱট্টে সংসৰণং, তস্মা ৱুত্তং পাড়িযং ‘‘অননুবোধা…পে… তুম্হাকঞ্চা’’তি. পটিসন্ধিগ্গহণৱসেন ভৱতো ভৱন্তৰূপগমনং সন্ধাৱনং, অপৰাপৰং চৱনূপপজ্জনৱসেন সঞ্চৰণং সংসৰণন্তি আহ ‘‘ভৱতো’’তিআদি. সন্ধাৱিতসংসৰিতপদানং কম্মসাধনতং সন্ধাযাহ ‘‘মযা চ তুম্হেহি চা’’তি পঠমৱিকপ্পে. দুতিযৱিকপ্পে পন ভাৱসাধনতং হদযে কত্ৱা ‘‘মমঞ্চেৱ তুম্হাকঞ্চা’’তি যথাৰুতৱসেনেৱ ৱুত্তং. দীঘৰজ্জুনা বদ্ধসকুণং ৱিয ৰজ্জুহত্থো পুৰিসো দেসন্তৰং তণ্হাৰজ্জুনা বদ্ধং সত্তসন্তানং অভিসঙ্খাৰো ভৱন্তৰং নেতি এতাযাতি ভৱনেত্তি. তেনাহ ‘‘ভৱৰজ্জূ’’তিআদী.

ৱট্টদুক্খস্স অন্তকৰোতি সকলৱট্টদুক্খস্স সকসন্তানে পৰসন্তানে চ ৱিনাসকৰো অভাৱকৰো. বুদ্ধচক্খুধম্মচক্খুদিব্বচক্খুমংসচক্খুসমন্তচক্খুসঙ্খাতেহি পঞ্চহি চক্খূহি চক্খুমা. সৱাসনানং কিলেসানং সমুচ্ছিন্নত্তা সাতিসযং কিলেসপৰিনিব্বানেন পৰিনিব্বুতো. দুতিযং উত্তানমেৱ.

অনুবুদ্ধসুত্তাদিৱণ্ণনা নিট্ঠিতা.