১. সংখিত্তসুত্তৱণ্ণনা

১৬১. দুতিযস্স পঠমে দুক্খাপটিপদা দন্ধাভিঞ্ঞাতিআদীসু পাড়িযা আগতনযেন অত্থো ৱেদিতব্বো. তথা হি –

‘‘তত্থ কতমা দুক্খপটিপদা দন্ধাভিঞ্ঞা পঞ্ঞা? কিচ্ছেন কসিৰেন সমাধিং উপ্পাদেন্তস্স দন্ধং তং ঠানং অভিজানন্তস্স যা উপ্পজ্জতি পঞ্ঞা পজাননা…পে… অমোহো ধম্মৱিচযো সম্মাদিট্ঠি, অযং ৱুচ্চতি দুক্খপটিপদা দন্ধাভিঞ্ঞা পঞ্ঞা. তত্থ কতমা দুক্খপটিপদা খিপ্পাভিঞ্ঞা পঞ্ঞা? কিচ্ছেন কসিৰেন সমাধিং উপ্পাদেন্তস্স খিপ্পং তং ঠানং অভিজানন্তস্স যা উপ্পজ্জতি পঞ্ঞা পজাননা…পে… সম্মাদিট্ঠি, অযং ৱুচ্চতি দুক্খপটিপদা খিপ্পাভিঞ্ঞা পঞ্ঞা. তত্থ কতমা সুখপটিপদা দন্ধাভিঞ্ঞা পঞ্ঞা? অকিচ্ছেন অকসিৰেন সমাধিং উপ্পাদেন্তস্স দন্ধং তং ঠানং অভিজানন্তস্স যা উপ্পজ্জতি পঞ্ঞা পজাননা…পে… সম্মাদিট্ঠি, অযং ৱুচ্চতি সুখপটিপদা দন্ধাভিঞ্ঞা পঞ্ঞা. তত্থ কতমা সুখপটিপদা খিপ্পাভিঞ্ঞা পঞ্ঞা? অকিচ্ছেন অকসিৰেন সমাধিং উপ্পাদেন্তস্স খিপ্পং তং ঠানং অভিজানন্তস্স যা উপ্পজ্জতি পঞ্ঞা পজাননা…পে… সম্মাদিট্ঠি, অযং ৱুচ্চতি সুখপটিপদা খিপ্পাভিঞ্ঞা পঞ্ঞা’’তি (ৱিভ. ৮০১) – অযমেত্থ পাড়ি.

তত্থ কিচ্ছেন কসিৰেন সমাধিং উপ্পাদেন্তস্সাতি পুব্বভাগে আগমনকালে কিচ্ছেন কসিৰেন দুক্খেন সসঙ্খাৰেন সপ্পযোগেন কিলেসে ৱিক্খম্ভেত্ৱা লোকুত্তৰসমাধিং উপ্পাদেন্তস্স. দন্ধং তং ঠানং অভিজানন্তস্সাতি ৱিক্খম্ভিতেসু কিলেসেসু ৱিপস্সনাপৰিৱাসে চিৰং ৱসিত্ৱা তং লোকুত্তৰসমাধিসঙ্খাতং ঠানং দন্ধং সণিকং অভিজানন্তস্স পটিৱিজ্ঝন্তস্স, পাপুণন্তস্সাতি অত্থো. অযং ৱুচ্চতীতি যা এসা এৱং উপ্পজ্জতি, অযং কিলেসৱিক্খম্ভনপ্পটিপদায দুক্খত্তা, ৱিপস্সনাপৰিৱাসপঞ্ঞায চ দন্ধত্তা মগ্গকালে একচিত্তক্খণে উপ্পন্নাপি পঞ্ঞা আগমনৱসেন ‘‘দুক্খপটিপদা দন্ধাভিঞ্ঞা নামা’’তি ৱুচ্চতি. উপৰি তীসু পদেসুপি ইমিনা নযেন অত্থো ৱেদিতব্বো.

সংখিত্তসুত্তৱণ্ণনা নিট্ঠিতা.