৮. দুতিযতথাগতঅচ্ছৰিযসুত্তৱণ্ণনা

১২৮. অট্ঠমে আলীযন্তি আৰমিতব্বট্ঠেন সেৱীযন্তীতি আলযা, পঞ্চ কামগুণা. আৰমন্তীতি ৰতিং ৱিন্দন্তি কীড়ন্তি লড়ন্তি. আলীযন্তি ৱা অল্লীযন্তা অভিৰমণৱসেন সেৱন্তীতি আলযা, তণ্হাৱিচৰিতানি. তেহি আলযেহি ৰমন্তীতি আলযাৰামা. যথেৱ হি সুসজ্জিতং পুপ্ফফলভৰিতৰুক্খাদিসম্পন্নউয্যানং পৱিট্ঠো ৰাজা তায সম্পত্তিযা ৰমতি, সম্মুদিতো আমোদিতপ্পমোদিতো হোতি, ন উক্কণ্ঠেতি, সাযম্পি নিক্খমিতুং ন ইচ্ছতি, এৱমিমেহি কামালযতণ্হালযেহি সত্তা ৰমন্তি, সংসাৰৱট্টে পমুদিতা অনুক্কণ্ঠিতা ৱসন্তি. তেন তেসং ভগৱা দুৱিধম্পি আলযং উয্যানভূমিং ৱিয দস্সেন্তো ‘‘আলযাৰামা’’তিআদিমাহ. সেসমেত্থ উত্তানমেৱ.

দুতিযতথাগতঅচ্ছৰিযসুত্তৱণ্ণনা নিট্ঠিতা.