(১৩) ৩. ভযৱগ্গো

১. অত্তানুৱাদসুত্তৱণ্ণনা

১২১. ততিযস্স পঠমে অত্তানং অনুৱদন্তস্স উপ্পজ্জনকভযন্তি অত্তানং অনুৱদন্তস্স পাপকম্মিনো উপ্পজ্জনকভযং. দ্ৱত্তিংসকম্মকাৰণে পটিচ্চ উপ্পজ্জনকভযন্তি অগাৰিকানং ৱসেন ৱুত্তং, অনগাৰিকানং পন ৱিনযদণ্ডং পটিচ্চ উপ্পজ্জনকভযম্পি দণ্ডভযন্তেৱ সঙ্খং গচ্ছতি. সেসং সুৱিঞ্ঞেয্যমেৱ.

অত্তানুৱাদসুত্তৱণ্ণনা নিট্ঠিতা.

২. ঊমিভযসুত্তৱণ্ণনা

১২২. দুতিযে কোধূপাযাসস্সেতং অধিৱচনন্তি এত্থ কুজ্ঝনট্ঠেন কোধো, স্ৱেৱ চিত্তস্স কাযস্স চ অতিপ্পমদ্দনমথনুপ্পাদনেহি দড়্হআযাসট্ঠেন উপাযাসো. অনেকৱাৰং পৱত্তিত্ৱা অত্তনা সমৱেতং সত্তং অজ্ঝোত্থৰিত্ৱা সীসং উক্খিপিতুং অদত্ৱা ঊমিসদিসতা দট্ঠব্বা. যথা হি বাহিৰং উদকং ওতিণ্ণো ঊমীসু ওসীদিত্ৱা মৰতি, এৱং ইমস্মিং সাসনে কোধূপাযাসে ওসীদিত্ৱা ৱিব্ভমতি, তস্মা কোধূপাযাসো ‘‘ঊমিভয’’ন্তি ৱুত্তো. ওদৰিকত্তস্সেতং অধিৱচনন্তি যথা হি বাহিৰং উদকং ওতিণ্ণো কুম্ভীলেন খাদিতো মৰতি, এৱং ইমস্মিং সাসনে ওদৰিকত্তেন ওদৰিকভাৱেন আমিসগেধেন মিচ্ছাজীৱেন জীৱিককপ্পনেন নাসিতসীলাদিগুণতায খাদিতধম্মসৰীৰো ৱিব্ভমতি, তস্মা ওদৰিকত্তং ‘‘কুম্ভীলভয’’ন্তি ৱুত্তং.

অনুপট্ঠিতায সতিযাতি কাযগতং সতিং অনুট্ঠাপেত্ৱা. অসংৱুতেহীতি অপিহিতেহি. পঞ্চন্নেতং কামগুণানং অধিৱচনন্তি যথা হি বাহিৰং উদকং ওতিণ্ণো আৱট্টে নিমুজ্জিত্ৱা মৰতি, এৱং ইমস্মিং সাসনে পব্বজিতো পঞ্চকামগুণাৱট্টে নিমুজ্জিত্ৱা ৱিব্ভমতি. কামৰাগাভিভূতো হি সত্তো ইতো চ এত্তো, এত্তো চ ইতোতি এৱং মনাপিযৰূপাদিৱিসযসঙ্খাতে আৱট্টে অত্তানং সংসাৰেত্ৱা যথা ততো বহিভূতে নেক্খম্মে চিত্তম্পি ন উপ্পাদেতি, এৱং আৱট্টেত্ৱা ব্যসনাপাদনেন কামগুণানং আৱট্টসদিসতা দট্ঠব্বা.

অনুদ্ধংসেতীতি কিলমেতি ৱিলোলতি. ৰাগানুদ্ধংসিতেনাতি ৰাগেন অনুদ্ধংসিতেন. মাতুগামস্সেতং অধিৱচনন্তি. যথা হি বাহিৰং উদকং ওতিণ্ণো চণ্ডমচ্ছং আগম্ম লদ্ধপ্পহাৰো মৰতি, এৱং ইমস্মিং সাসনে মাতুগামং আৰব্ভ উপ্পন্নকামৰাগো ৱিব্ভমতি, তস্মা মাতুগামো ‘‘সুসুকাভয’’ন্তি ৱুত্তো. মাতুগামো হি যোনিসোমনসিকাৰৰহিতং অধীৰপুৰিসং ইত্থিকুত্তভূতেহি অত্তনো হাসভাৱৱিলাসেহি অভিভুয্য গহেত্ৱা ধীৰজাতিকম্পি অত্তনো ৰূপাদীহি সম্পলোভনৱসেন অনৱসেসং অত্তনো উপকাৰধম্মে সীলাদিকে সম্পাদেতুং অসমত্থং কৰোন্তো অনযব্যসনং পাপেতি.

ইমানি পন চত্তাৰি ভযানি ভাযিত্ৱা যথা উদকং অনোৰোহন্তস্স উদকং নিস্সায উদকপিপাসাৱিনযনং সৰীৰসুদ্ধিপৰিড়াহূপসমো কাযউতুগ্গাহাপনন্তি, এৱমাদি আনিসংসো নত্থি, এৱমেৱং ইমানি চত্তাৰি ভযানি ভাযিত্ৱা সাসনে অপব্বজন্তস্সপি ইমং সাসনং নিস্সায সঙ্খেপতো ৱট্টদুক্খূপসমো, ৱিত্থাৰতো পন সীলানিসংসাদিৱসেন অনেকৱিধো আনিসংসো নত্থি. যথা পন ইমানি চত্তাৰি ভযানি অভাযিত্ৱা উদকং ওৰোহন্তস্স ৱুত্তপ্পকাৰো আনিসংসো হোতি, এৱং ইমানি অভাযিত্ৱা সাসনে পব্বজন্তস্সপি ৱুত্তপ্পকাৰো আনিসংসো হোতি. মহাধম্মৰক্খিতত্থেৰো পনাহ ‘‘চত্তাৰি ভযানি ভাযিত্ৱা উদকং অনোতৰন্তো সোতং ছিন্দিত্ৱা পৰতীৰং পাপুণিতুং ন সক্কোতি, অভাযিত্ৱা ওতৰন্তো সক্কোতি, এৱমেৱং ভাযিত্ৱা সাসনে অপব্বজন্তোপি তণ্হাসোতং ছিন্দিত্ৱা নিব্বানপাৰং দট্ঠুং ন সক্কোতি, অভাযিত্ৱা পব্বজন্তো সক্কোতী’’তি.

ঊমিভযসুত্তৱণ্ণনা নিট্ঠিতা.

৩. পঠমনানাকৰণসুত্তৱণ্ণনা

১২৩. ততিযে ব্ৰহ্মকাযিকানং দেৱানন্তি এত্থ ব্ৰহ্মানং কাযো সমূহোতি ব্ৰহ্মকাযো, তপ্পৰিযাপন্নতায তত্থ গতাতি ব্ৰহ্মকাযিকা. এতায চ সব্বস্সপি ব্ৰহ্মকাযস্স সমঞ্ঞায ভৱিতব্বং. আভস্সৰানং দেৱানন্তিআদিনা পন দুতিযজ্ঝানভূমিকাদীনং উপৰি গহিতত্তা গোবলীবদ্দঞ্ঞাযেন তদৱসিট্ঠানং অযং সমঞ্ঞা, তস্মা ‘‘ব্ৰহ্মকাযিকানং দেৱান’’ন্তি পঠমজ্ঝানভূমিকানংযেৱ গহণং ৱেদিতব্বং. সহ ব্যযতি গচ্ছতীতি সহব্যো, সহৱত্তনকো. তস্স ভাৱো সহব্যতা, সহপৱত্তীতি আহ ‘‘সহভাৱং উপগচ্ছতী’’তি. কপ্পো আযুপ্পমাণন্তি এত্থ যদিপি ব্ৰহ্মপাৰিসজ্জাদীনং আযুনো অন্তৰং অত্থি, উক্কট্ঠপৰিচ্ছেদেন পনেতং ৱুত্তন্তি দস্সেন্তো ‘‘পঠমজ্ঝানং অত্থি হীন’’ন্তিআদিমাহ.

দ্ৱে কপ্পা আযুপ্পমাণন্তি এত্থ পন হীনজ্ঝানেন নিব্বত্তানং ৱসেন অযং পৰিচ্ছেদো কতোতি দস্সেতুং ‘‘দুতিযজ্ঝানং ৱুত্তনযেনেৱ তিৱিধং হোতী’’তিআদি আৰদ্ধং. চত্তাৰো কপ্পাতি এত্থ পন উক্কট্ঠপৰিচ্ছেদেন চতুসট্ঠি কপ্পা ৱত্তব্বাতি দস্সেন্তো ‘‘যং হেট্ঠা ৱুত্তং ‘কপ্পো দ্ৱে কপ্পা’তি, কম্পি আহৰিত্ৱা অত্থো ৱেদিতব্বো’’তি আহ. কথং পনেত্থ অযমত্থো লব্ভতীতি আহ ‘‘কপ্পোতি চ গুণস্সপি নাম’’ন্তি. তত্থ পঠমং ৱুত্তো কপ্পো, ততো একেন গুণেন, একস্মিং ৱাৰে গণনাযাতি অত্থো. দ্ৱে কপ্পা হোন্তীতি একৱাৰগণনায কপ্পস্স দ্ৱিগুণিতত্তা দ্ৱে মহাকপ্পা হোন্তীতি অত্থো. দুতিযেনাতি দুতিযৱাৰগণনায. চত্তাৰোতি দুতিযৱাৰগণনায দ্ৱীসু কপ্পেসু দ্ৱিগুণিতেসু চত্তাৰো মহাকপ্পা হোন্তীতি অত্থো. পুন তে চত্তাৰো কপ্পাতি ৱুত্তনযেন দ্ৱে ৱাৰে গুণেত্ৱা যে চত্তাৰো কপ্পা দস্সিতা, পুন তে চত্তাৰো কপ্পা চতুগ্গুণা হোন্তীতি অত্থো. ইদং ৱুত্তং হোতি – দ্ৱে ৱাৰে গুণেত্ৱা যে চত্তাৰো কপ্পা দস্সিতা, তেসু চতুক্খত্তুং গুণিতেসু চতুসট্ঠি কপ্পা সম্পজ্জন্তীতি. তথা হি চত্তাৰো একস্মিং ৱাৰে গুণিতা অট্ঠ হোন্তি, পুন তে অট্ঠ দুতিযৱাৰে গুণিতা সোড়স হোন্তি, পুন তে সোড়স ততিযৱাৰে গুণিতা দ্ৱত্তিংস হোন্তি, পুন তে দ্ৱত্তিংস চতুত্থৱাৰে গুণিতা চতুসট্ঠি হোন্তি. তেনেৱাহ ‘‘ইমেহি চতূহি গুণেহি গুণিতা একেন গুণেন অট্ঠ হোন্তী’’তিআদি. এত্থ চ হেট্ঠা উপোসথসুত্তে (অ. নি. ৩.৭১) –

‘‘যানি মানুসকানি পঞ্ঞাস ৱস্সানি, চাতুমহাৰাজিকানং দেৱানং এসো একো ৰত্তিন্দিৱো’’তি –

আদিনা কামাৱচৰদেৱানমেৱ আযুপ্পমাণং দস্সিতং. হেট্ঠাযেৱ –

‘‘তযোমে, ভিক্খৱে, পুগ্গলা সন্তো সংৱিজ্জমানা লোকস্মিং. কতমে তযো? ইধ, ভিক্খৱে, একচ্চো পুগ্গলো সব্বসো ৰূপসঞ্ঞানং সমতিক্কমা…পে… আকাসানঞ্চাযতনূপগানং দেৱানং সহব্যতং উপপজ্জতি. আকাসানঞ্চাযতনূপগানং, ভিক্খৱে, দেৱানং ৱীসতি কপ্পসহস্সানি আযুপ্পমাণ’’ন্তি (অ. নি. ৩.১১৭) –

আদিনা অৰূপাৱচৰানংযেৱ আযুপ্পমাণং ৱুত্তং. ইধ পন ৰূপাৱচৰানমেৱ আযুপ্পমাণং দস্সিতং. ৱিভঙ্গপাড়িযং (ৱিভ. ১০২২) পন ‘‘মনুস্সানং কিত্তকং আযুপ্পমাণং, ৱস্সসতং অপ্পং ৱা ভিয্যো’’তিআদিনা দেৱমনুস্সানঞ্চেৱ ৰূপাৰূপাৱচৰসত্তানঞ্চ আযুপ্পমাণং দস্সিতং.

তত্থ সম্মাসম্বুদ্ধেন মনুস্সানং দেৱানঞ্চ আযুং পৰিচ্ছিন্দমানেন চতূসু অপাযেসু ভুম্মদেৱেসু চ আযু ন পৰিচ্ছিন্নং. তং কস্মাতি? নিৰযে তাৱ কম্মমেৱ পমাণং. যাৱ কম্মং ন খীযতি, তাৱ পচ্চন্তি. তথা সেসঅপাযেসু. ভুম্মদেৱানম্পি কম্মমেৱ পমাণং. তত্থ নিব্বত্তা হি কেচি সত্তাহমত্তং তিট্ঠন্তি, কেচি অড্ঢমাসং, কপ্পং তিট্ঠমানাপি অত্থিযেৱ. তত্থ মনুস্সেসু গিহিভাৱে ঠিতাযেৱ সোতাপন্নাপি হোন্তি, সকদাগামিফলং অনাগামিফলং অৰহত্তম্পি পাপুণন্তি, তেসু সোতাপন্নাদযো যাৱজীৱং তিট্ঠন্তি, খীণাসৱা পন পৰিনিব্বাযন্তি ৱা পব্বজন্তি ৱা. কস্মা? অৰহত্তং নাম সেট্ঠগুণং, গিহিলিঙ্গং হীনং, তং হীনতায উত্তমং গুণং ধাৰেতুং ন সক্কোতি, তস্মা তে পৰিনিব্বাতুকামা ৱা হোন্তি পব্বজিতুকামা ৱা. ভুম্মদেৱা পন অৰহত্তং পত্তাপি যাৱজীৱং তিট্ঠন্তি, ছসু কামাৱচৰেসু দেৱেসু সোতাপন্নসকদাগামিনো যাৱজীৱং তিট্ঠন্তি, অনাগামিনা ৰূপভৱং গন্তুং ৱট্টতি খীণাসৱেন পৰিনিব্বাতুং. কস্মা? নিলীযনোকাসস্স অভাৱা. ৰূপাৱচৰাৰূপাৱচৰেসু সব্বেপি যাৱজীৱং তিট্ঠন্তি, তত্থ ৰূপাৱচৰে নিব্বত্তা সোতাপন্নসকদাগামিনো ন পুন ইধাগচ্ছন্তি, তত্থেৱ পৰিনিব্বাযন্তি. এতে হি ঝানঅনাগামিনো নাম.

অট্ঠসমাপত্তিলাভীনং পন কিং নিযমেতি? পগুণজ্ঝানং. যদেৱস্স পগুণং হোতি, তেন উপপজ্জতি. সব্বেসু পগুণেসু কিং নিযমেতি? নেৱসঞ্ঞানাসঞ্ঞাযতনসমাপত্তি. একংসেনেৱ হি সো নেৱসঞ্ঞানাসঞ্ঞাযতনে উপপজ্জতি. নৱসু ব্ৰহ্মলোকেসু নিব্বত্তঅৰিযসাৱকানং তত্ৰূপপত্তিপি উপৰূপপত্তিপি, ন হেট্ঠূপপত্তি. পুথুজ্জনানং পন তত্ৰূপপত্তিপি হোতি, উপৰূপপত্তিপি, হেট্ঠূপপত্তিপি. পঞ্চসু সুদ্ধাৱাসেসু চতূসু চ অৰূপেসু অৰিযসাৱকানং তত্ৰূপপত্তিপি হোতি উপৰূপপত্তিপি. পঠমজ্ঝানভূমিযং নিব্বত্তো অনাগামী নৱ ব্ৰহ্মলোকে সোধেত্ৱা মত্থকে ঠিতো পৰিনিব্বাতি. ৱেহপ্ফলং, অকনিট্ঠং, নেৱসঞ্ঞানাসঞ্ঞাযতনন্তি ইমে তযো দেৱলোকা সেট্ঠভৱা নাম. ইমেসু তীসু ঠানেসু নিব্বত্তঅনাগামিনো নেৱ উদ্ধং গচ্ছন্তি, ন অধো, তত্থ তত্থেৱ পৰিনিব্বাযন্তীতি ইদং পকিণ্ণকং ৱেদিতব্বং.

পঠমনানাকৰণসুত্তৱণ্ণনা নিট্ঠিতা.

৪-৬. দুতিযনানাকৰণসুত্তাদিৱণ্ণনা

১২৪-৬. চতুত্থে তে ধম্মেতি তে ‘‘ৰূপগত’’ন্তিআদিনা নযেন ৱুত্তে ৰূপাদযো ধম্মে. অনিচ্চতোতি ইমিনা নিচ্চপ্পটিক্খেপতো তেসং অনিচ্চতমাহ, ততো এৱ চ উদযৱযৱন্ততো ৱিপৰিণামতো তাৱকালিকতো চ তে অনিচ্চাতি জোতিতং হোতি. যঞ্হি নিব্বত্তং হোতি, তং উদযৱযপৰিচ্ছিন্নং. জৰায মৰণেন চ তদেৱ ৱিপৰীতং, ইত্তৰক্খণমেৱ চ হোতীতি. দুক্খতোতি ইমিনা সুখপ্পটিক্খেপতো তেসং দুক্খতমাহ. ততো এৱ চ অভিণ্হপ্পটিপীড়নতো দুক্খৱত্থুতো চ তে দুক্খাতি জোতিতং হোতি. উদযৱযৱন্ততায হি তে অভিণ্হপ্পটিপীড়নতো নিৰন্তৰদুক্খতায দুক্খস্সেৱ চ অধিট্ঠানভূতা. পচ্চযযাপনীযতায ৰোগমূলতায চ ৰোগতো. দুক্খতাসূলযোগতো কিলেসাসুচিপগ্ঘৰণতো উপ্পাদজৰাভঙ্গেহি উদ্ধুমাতপৰিপক্কপভিন্নতো চ গণ্ডতো. পীড়াজননতো, অন্তোতুদনতো, দুন্নীহৰণতো চ সল্লতো. অৱড্ঢিআৱহনতো অঘৱত্থুতো চ অঘতো. অসেৰিভাৱজননতো আবাধপদট্ঠানতায চ আবাধতো. অৱসৱত্তনতো অৱিধেয্যতায চ পৰতো. ব্যাধিজৰামৰণেহি পলুজ্জনীযতায পলোকতো. সামিনিৱাসিকাৰকৱেদকঅধিট্ঠাযকৱিৰহতো সুঞ্ঞতো. অত্তপ্পটিক্খেপট্ঠেন অনত্ততো. ৰূপাদিধম্মা হি ন এত্থ অত্তা অত্থীতি অনত্তা. এৱং সযম্পি অত্তা ন হোন্তীতি অনত্তা. তেন অব্যাপাৰতো নিৰীহতো তুচ্ছতো অনত্তাতি দীপিতং হোতি. লক্খণত্তযমেৱ সুখাৱবোধনত্থং একাদসহি পদেহি ৱিভজিত্ৱা গহিতন্তি দস্সেতুং ‘‘তত্থা’’তিআদি ৱুত্তং. পঞ্চমছট্ঠানি উত্তানত্থানেৱ.

দুতিযনানাকৰণসুত্তাদিৱণ্ণনা নিট্ঠিতা.

৭. পঠমতথাগতঅচ্ছৰিযসুত্তৱণ্ণনা

১২৭. সত্তমে ৱত্তমানসমীপে ৱত্তমানে ৱিয ৱোহৰিতব্বন্তি ‘‘ওক্কমতী’’তি আহ ‘‘ওক্কন্তো হোতীতি অত্থো’’তি. দসসহস্সচক্কৱাড়পত্থৰণো সমুজ্জলভাৱেন উড়াৰো. দেৱানুভাৱন্তি দেৱানং পভানুভাৱং. দেৱানঞ্হি পভং সো ওভাসো অধিভৱতি, ন দেৱে. তেনাহ ‘‘দেৱান’’ন্তিআদি. ৰুক্খগচ্ছাদিনা কেনচি ন হঞ্ঞতীতি অঘা, অসম্বাধা. তেনাহ ‘‘নিচ্চৱিৱৰা’’তি. অসংৱুতাতি হেট্ঠা উপৰি কেনচি অপিহিতা. তেনাহ ‘‘হেট্ঠাপি অপ্পতিট্ঠা’’তি. তত্থ পি-সদ্দেন যথা হেট্ঠা উদকস্স পিধাযিকা সন্ধাৰিকা পথৱী নত্থি অসংৱুতা লোকন্তৰিকা, এৱং উপৰিপি চক্কৱাড়েসু দেৱৱিমানানং অভাৱতো অসংৱুতা অপ্পতিট্ঠাতি দস্সেতি. অন্ধকাৰো এত্থ অত্থীতি অন্ধকাৰা. চক্খুৱিঞ্ঞাণং ন জাযতি আলোকস্স অভাৱতো, ন চক্খুনো. তথা হি ‘‘তেনোভাসেন অঞ্ঞমঞ্ঞং সঞ্জানন্তী’’তি ৱুত্তং. জম্বুদীপে ঠিতমজ্ঝন্হিকৱেলায পুব্বৱিদেহৱাসীনং অত্থঙ্গমৱসেন উপড্ঢং সূৰিযমণ্ডলং পঞ্ঞাযতি, অপৰগোযানৱাসীনং উগ্গমনৱসেন. এৱং সেসদীপেসুপীতি আহ ‘‘একপ্পহাৰেনেৱ তীসু দীপেসু পঞ্ঞাযন্তী’’তি. ইতো অঞ্ঞথা দ্ৱীসু এৱ দীপেসু পঞ্ঞাযন্তি. একেকায দিসায নৱনৱযোজনসতসহস্সানি অন্ধকাৰৱিধমনম্পি ইমিনাৱ নযেন দট্ঠব্বং. পভায নপ্পহোন্তীতি অত্তনো পভায ওভাসিতুং নাভিসম্ভুণন্তি. যুগন্ধৰপব্বতমত্থকসমপ্পমাণে আকাসে ৱিচৰণতো ‘‘চক্কৱাড়পব্বতস্স ৱেমজ্ঝেন চৰন্তী’’তি ৱুত্তং.

ব্যাৱটাতি খাদনত্থং গণ্হিতুং উপক্কমন্তা. ৱিপৰিৱত্তিত্ৱাতি ৱিৱট্টিত্ৱা. ছিজ্জিত্ৱাতি মুচ্ছাপৱত্তিযা ঠিতট্ঠানতো মুচ্চিত্ৱা, অঙ্গপচ্চঙ্গছেদনৱসেন ৱা ছিজ্জিত্ৱা. অচ্চন্তখাৰেতি আতপসন্তপাভাৱেন অতিসীতভাৱং সন্ধায অচ্চন্তখাৰতা ৱুত্তা সিযা. ন হি তং কপ্পসণ্ঠানউদকং সম্পত্তিকৰমহামেঘৱুট্ঠং পথৱিসন্ধাৰকং কপ্পৱিনাসকউদকং ৱিয খাৰং ভৱিতুমৰহতি, তথা সতি পথৱীপি ৱিলীযেয্য, তেসং ৱা পাপকম্মফলেন পেতানং পকতিউদকস্স পুব্বখেড়ভাৱাপত্তি ৱিয তস্স উদকস্স খাৰভাৱাপত্তি হোতীতি ৱুত্তং ‘‘অচ্চন্তখাৰে উদকে’’তি.

পঠমতথাগতঅচ্ছৰিযসুত্তৱণ্ণনা নিট্ঠিতা.

৮. দুতিযতথাগতঅচ্ছৰিযসুত্তৱণ্ণনা

১২৮. অট্ঠমে আলীযন্তি আৰমিতব্বট্ঠেন সেৱীযন্তীতি আলযা, পঞ্চ কামগুণা. আৰমন্তীতি ৰতিং ৱিন্দন্তি কীড়ন্তি লড়ন্তি. আলীযন্তি ৱা অল্লীযন্তা অভিৰমণৱসেন সেৱন্তীতি আলযা, তণ্হাৱিচৰিতানি. তেহি আলযেহি ৰমন্তীতি আলযাৰামা. যথেৱ হি সুসজ্জিতং পুপ্ফফলভৰিতৰুক্খাদিসম্পন্নউয্যানং পৱিট্ঠো ৰাজা তায সম্পত্তিযা ৰমতি, সম্মুদিতো আমোদিতপ্পমোদিতো হোতি, ন উক্কণ্ঠেতি, সাযম্পি নিক্খমিতুং ন ইচ্ছতি, এৱমিমেহি কামালযতণ্হালযেহি সত্তা ৰমন্তি, সংসাৰৱট্টে পমুদিতা অনুক্কণ্ঠিতা ৱসন্তি. তেন তেসং ভগৱা দুৱিধম্পি আলযং উয্যানভূমিং ৱিয দস্সেন্তো ‘‘আলযাৰামা’’তিআদিমাহ. সেসমেত্থ উত্তানমেৱ.

দুতিযতথাগতঅচ্ছৰিযসুত্তৱণ্ণনা নিট্ঠিতা.

৯-১০. আনন্দঅচ্ছৰিযসুত্তাদিৱণ্ণনা

১২৯-১৩০. নৱমে পটিসন্থাৰধম্মন্তি পকতিচাৰিত্তৱসেন ৱুত্তং, উপগতানং পন ভিক্খূনং ভিক্খুনীনঞ্চ পুচ্ছাৱিস্সজ্জনৱসেন চেৱ চিত্তৰুচিৱসেন চ যথাকালং ধম্মং দেসেতিযেৱ, উপাসকউপাসিকানং পন উপনিসিন্নককথাৱসেন. দসমং উত্তানমেৱ.

আনন্দঅচ্ছৰিযসুত্তাদিৱণ্ণনা নিট্ঠিতা.

ভযৱগ্গৱণ্ণনা নিট্ঠিতা.