(১০) ৫. অসুৰৱগ্গো
১-২. অসুৰসুত্তাদিৱণ্ণনা
৯১-৯২. পঞ্চমস্স পঠমদুতিযানি উত্তানত্থানেৱ.
অসুৰসুত্তাদিৱণ্ণনা নিট্ঠিতা.
৩. দুতিযসমাধিসুত্তৱণ্ণনা
৯৩. ততিযে অপ্পটিৱানীতি ভাৱপ্পধানো নিদ্দেসোতি আহ ‘‘অনিৱত্তনতা’’তি. ‘‘অপ্পটিৱানিতা’’তি ৱত্তব্বে ‘‘অপ্পটিৱানী’’তি ৱুত্তং. তথা হি ৱীৰিযপ্পৱাহে ৱত্তমানে অন্তৰা এৱ পটিগমনং নিৱত্তনং পটিৱানং, তং অস্স অত্থীতি পটিৱানী, ন পটিৱানী অপ্পটিৱানী, তস্স ভাৱো অপ্পটিৱানিতা, অনিৱত্তনাতি অত্থো. অপ্পটিৱানীতি ৱা ইত্থিলিঙ্গৱসেনেৱাযং নিদ্দেসো. অন্তৰাযেৱ পটিগমনং নিৱত্তনং পটিৱানী, ন পটিৱানী অপ্পটিৱানী, অনিৱত্তনাতি অত্থো.
দুতিযসমাধিসুত্তৱণ্ণনা নিট্ঠিতা.
৪. ততিযসমাধিসুত্তৱণ্ণনা
৯৪. চতুত্থে সণ্ঠপেতব্বন্তি সম্মদেৱ ঠপেতব্বং. যথা পন ঠপিতং সণ্ঠপিতং হোতি, তং দস্সেতুং ‘‘সন্নিসাদেতব্ব’’ন্তিআদি ৱুত্তং. তত্থ সন্নিসাদেতব্বন্তি সমাধিপ্পটিপক্খে কিলেসে সন্নিসীদাপেন্তেন চিত্তং গোচৰজ্ঝত্তে সন্নিসীদাপেতব্বন্তি. একোদি কাতব্বন্তি অব্যগ্গভাৱাপাদনেন একগ্গং কাতব্বং. সমাদহিতব্বন্তি যথা আৰম্মণে সুট্ঠু অপ্পিতং হোতি, এৱং সম্মা সম্মদেৱ আদহিতব্বং, সুট্ঠু আৰোপেতব্বং সমাহিতং কাতব্বন্তি অত্থো.
ততিযসমাধিসুত্তৱণ্ণনা নিট্ঠিতা.
৫-৬. ছৱালাতসুত্তাদিৱণ্ণনা
৯৫-৯৬. পঞ্চমে ছৱালাতন্তি ছৱানং দড্ঢট্ঠানে অলাতং. তেনেৱাহ ‘‘সুসানে অলাত’’ন্তি. মজ্ঝট্ঠানে গূথমক্খিতন্তি পমাণেন অট্ঠঙ্গুলমত্তং দ্ৱীসু ঠানেসু আদিত্তং মজ্ঝে গূথমক্খিতং. কট্ঠত্থন্তি কট্ঠেন কাতব্বকিচ্চং. সেসমেত্থ উত্তানমেৱ. ছট্ঠং উত্তানমেৱ.
ছৱালাতসুত্তাদিৱণ্ণনা নিট্ঠিতা.
৭-১০. খিপ্পনিসন্তিসুত্তাদিৱণ্ণনা
৯৭-১০০. সত্তমে খিপ্পনিসন্তীতি খিপ্পপঞ্ঞো. তেনাহ ‘‘খিপ্পনিসামনো’’তিআদি. অনুৰূপধম্মন্তি লোকুত্তৰাধিগমস্স অনুচ্ছৱিকসভাৱং. কল্যাণা সুন্দৰা পৰিমণ্ডলপদব্যঞ্জনা ৱাচা অস্সাতি কল্যাণৱাচো. তেনাহ ‘‘সুন্দৰৱচনো’’তি. কল্যাণং মধুৰং ৱাক্কৰণং উদাহাৰঘোসো অস্সাতি কল্যাণৱাক্কৰণো. গুণপৰিপুণ্ণভাৱেন পূৰে পুণ্ণভাৱে ভৱাতি পোৰী, তায পোৰিযা. তেনাহ ‘‘গুণপৰিপুণ্ণাযা’’তি. পুৰে ভৱত্তা পোৰিযা নাগৰিকিত্থিযা সুখুমালত্তনেন সদিসাতি পোৰী, তায পোৰিযা. ‘‘সুখুমালত্তনেনা’’তি ইমিনা তস্সা ৱাচায মুদুসণ্হভাৱো ৱুত্তো. অপলিবুদ্ধাযাতি পিত্তসেম্হাদীহি ন পলিৱেঠিতায. অদোসাযাতি সন্দিদ্ধৱিলম্বিতাদিদোসৰহিতায অগড়িতপদব্যঞ্জনাযাতি অপতিতপদব্যঞ্জনায অৱিৰহিতপদব্যঞ্জনায. উভযমেতং অনেলগলাযাতি ইমস্সেৱ অত্থৱচনং. অনেলগলাযাতি হি অনেলায চেৱ অগলায চাতি অত্থো. অত্থং ৱিঞ্ঞাপেতুং সমত্থাযাতি আদিমজ্ঝপৰিযোসানং পাকটং কত্ৱা ভাসিতত্থস্স ৱিঞ্ঞাপনসত্থায. অট্ঠমনৱমদসমানি উত্তানত্থানেৱ.
খিপ্পনিসন্তিসুত্তাদিৱণ্ণনা নিট্ঠিতা.
অসুৰৱগ্গৱণ্ণনা নিট্ঠিতা.
দুতিযপণ্ণাসকং নিট্ঠিতং.