(১১) ১. ৱলাহকৱগ্গো

১-২. ৱলাহকসুত্তদ্ৱযৱণ্ণনা

১০১-২. ততিযপণ্ণাসকস্স পঠমে গজ্জিতাতি থনিতা. তত্থ গজ্জিত্ৱা নোৱস্সনভাৱো নাম পাপকো. মনুস্সা হি যদা দেৱো গজ্জতি, তদা ‘‘সুৱুট্ঠিতা ভৱিস্সতী’’তি বীজানি নীহৰিত্ৱা ৱপন্তি. অথ দেৱে অৱস্সন্তে খেত্তে বীজানি খেত্তেযেৱ নস্সন্তি, গেহে বীজানি গেহেযেৱ নস্সন্তীতি দুব্ভিক্খং হোতি. নোগজ্জিত্ৱা ৱস্সনভাৱোপি পাপকো. মনুস্সা হি ইমস্মিং কালে ‘‘দুব্বুট্ঠিকা ভৱিস্সতী’’তি নিন্নট্ঠানেসুযেৱ ৱপ্পং কৰোন্তি. অথ দেৱো ৱস্সিত্ৱা সব্ববীজানি মহাসমুদ্দং পাপেতি, দুব্ভিক্খমেৱ হোতি. গজ্জিত্ৱা ৱস্সনভাৱো পন ভদ্দকো. তদা হি সুভিক্খং হোতি. নোগজ্জিত্ৱা নোৱস্সনভাৱো একন্তপাপকোৱ. ভাসিতা হোতি নো কত্তাতি ‘‘ইদানি গন্থধুৰং পূৰেস্সামি, ৱাসধুৰং পূৰেস্সামী’’তি কথেতিযেৱ, ন উদ্দেসং গণ্হাতি, ন কম্মট্ঠানং ভাৱেতি.

কত্তা হোতি নো ভাসিতাতি ‘‘গন্থধুৰং পূৰেস্সামি, ৱাসধুৰং ৱা’’তি ন ভাসতি, সম্পত্তে পন কালে সমত্তং সম্পাদেতি. ইমিনা নযেন ইতৰেপি ৱেদিতব্বা. অথ ৱা সব্বং পনেতং পচ্চযদাযকেহেৱ কথিতং. একো হি ‘‘অসুকদিৱসে নাম দানং দস্সামী’’তি সঙ্ঘং নিমন্তেতি, সম্পত্তে কালে নো কৰোতি. অযং পুগ্গলো পুঞ্ঞেন পৰিহাযতি, ভিক্খুসঙ্ঘো পন লাভেন পৰিহাযতি. অপৰো সঙ্ঘং অনিমন্তেত্ৱা সক্কাৰং কত্ৱা ‘‘ভিক্খূ আনেস্সামী’’তি ন লভি, সব্বে অঞ্ঞত্থ নিমন্তিতা হোন্তি. অযম্পি পুঞ্ঞেন পৰিহাযতি, সঙ্ঘোপি লাভেন পৰিহাযতি. অপৰো পঠমং সঙ্ঘং নিমন্তেত্ৱা পচ্ছা সক্কাৰং কত্ৱা দানং দেতি, অযং কিচ্চকাৰী হোতি. অপৰো নেৱ সঙ্ঘং নিমন্তেতি, ন দানং দেতি, অযং পাপপুগ্গলোতি ৱেদিতব্বো. দুতিযং উত্তানমেৱ.

ৱলাহকসুত্তদ্ৱযৱণ্ণনা নিট্ঠিতা.

৩. কুম্ভসুত্তৱণ্ণনা

১০৩. ততিযে ৰিত্তকোতি অন্তো ৰিত্তো. পিহিতমুখোতি পিদহিত্ৱা ঠপিতো. অপাৰুতমুখোতি ৱিৱৰিত্ৱা ঠপিতো, উপমিতপুগ্গলেসু পনেত্থ অন্তোগুণসাৰৱিৰহিতো চ তুচ্ছো, বাহিৰসোভনতায পিহিতো পুগ্গলোতি ৱেদিতব্বো. সেসেসুপি এসেৱ নযো.

কুম্ভসুত্তৱণ্ণনা নিট্ঠিতা.

৪. উদকৰহদসুত্তৱণ্ণনা

১০৪. চতুত্থে উদকৰহদো জণ্ণুকমত্তেপি উদকে সতি পণ্ণৰসসম্ভিন্নৱণ্ণত্তা ৱা বহলত্তা ৱা উদকস্স অপঞ্ঞাযমানতলো উত্তানো গম্ভীৰোভাসো নাম হোতীতি আহ ‘‘পুৰাণপণ্ণৰস…পে… গম্ভীৰোভাসো নামা’’তি. তিপোৰিসচতুপোৰিসে পন উদকে সতি অচ্ছত্তা উদকস্স পঞ্ঞাযমানতলো গম্ভীৰো উত্তানোভাসো নাম হোতীতি আহ ‘‘অচ্ছৱিপ্পসন্নমণিৱণ্ণউদকো উত্তানোভাসো নামা’’তি. উভযকাৰণসম্ভৱতো পন ইতৰে দ্ৱে ৱেদিতব্বা. পুগ্গলেপি কিলেসুস্সদভাৱতো গুণগম্ভীৰতায চ অভাৱতো গুণগম্ভীৰানং সদিসেহি অভিক্কমনাদীহি যুত্তো উত্তানো গম্ভীৰোভাসো নাম. ইমিনা নযেন সেসা ৱেদিতব্বা.

উদকৰহদসুত্তৱণ্ণনা নিট্ঠিতা.

৫-৬. অম্বসুত্তাদিৱণ্ণনা

১০৫-৬. পঞ্চমে আমকং হুত্ৱাতি অন্তো আমং হুত্ৱা. পক্কং আমৱণ্ণীতি অন্তো পক্কং বহি আমসদিসং. তত্থ যথা অম্বে অপক্কভাৱো আমতা হোতি, এৱং পুগ্গলেপি পুথুজ্জনতা. যথা চ তত্থ পক্কসদিসতা পক্কৱণ্ণিতা, এৱং পুগ্গলেপি অৰিযানং অভিক্কমনাদিসদিসতা পক্কৱণ্ণিতাতি ইমিনা নযেন সেসা ৱেদিতব্বা. ছট্ঠং উত্তানমেৱ.

অম্বসুত্তাদিৱণ্ণনা নিট্ঠিতা.

৭. মূসিকসুত্তৱণ্ণনা

১০৭. সত্তমে আৱাটং খনতীতি অত্তনো আসযং বিলকূপং খনতি. ন চ তত্থ ৱসতীতি তত্থ অৱসিত্ৱা কিস্মিঞ্চিদেৱ ঠানে ৱসতি, এৱং বিড়াৰাদিঅমিত্তৱসং গচ্ছতি. ৱসিতা নো গাধং কত্তাতি সযং ন খনতি, পৰেন কতে বিলে ৱসতি, এৱং জীৱিতং ৰক্খতি. ততিযা দ্ৱেপি কৰোন্তী জীৱিতং ৰক্খতি. চতুত্থী দ্ৱেপি অকৰোন্তী অমিত্তৱসং গচ্ছতি. ইমায পন উপমায উপমিতেসু পুগ্গলেসু পঠমো যথা সা মূসিকা গাধং খনতি, এৱং নৱঙ্গং সত্থুসাসনং উগ্গণ্হাতি. যথা পন সা তত্থ ন ৱসতি, কিস্মিঞ্চিদেৱ ঠানে ৱসন্তী অমিত্তৱসং গচ্ছতি, তথা অযম্পি পৰিযত্তিৱসেন ঞাণং পেসেত্ৱা চতুসচ্চধম্মং ন পটিৱিজ্ঝতি, লোকামিসট্ঠানেসু ৱিচৰন্তো মচ্চুমাৰকিলেসমাৰদেৱপুত্তমাৰসঙ্খাতানং ৱসং গচ্ছতি. দুতিযো যথা মূসিকা গাধং ন খনতি, এৱং নৱঙ্গং সত্থুসাসনং ন উগ্গণ্হাতি. যথা পন পৰেন খনিতে বিলে ৱসন্তী জীৱিতং ৰক্খতি, এৱং পৰস্স কথং সুত্ৱা চতুসচ্চধম্মং পটিৱিজ্ঝিত্ৱা তিণ্ণং মাৰানং ৱসং অতিক্কমতি. ইমিনা নযেন ততিযচতুত্থেসুপি ওপম্মসংসন্দনং ৱেদিতব্বং.

মূসিকসুত্তৱণ্ণনা নিট্ঠিতা.

৮. বলীবদ্দসুত্তৱণ্ণনা

১০৮. অট্ঠমে বলীবদ্দো তাৱ যো অত্তনো গোগণং ঘট্টেতি উব্বেজেতি, পৰগোণে পন সূৰতো সুখসীলো হোতি, অযং সগৱচণ্ডো নো পৰগৱচণ্ডো নাম. পুগ্গলোপি অত্তনো পৰিসং ঘট্টেন্তো ৱিজ্ঝন্তো ফৰুসে সমুদাচৰন্তো, পৰপৰিসায পন সোৰচ্চং নিৱাতৱুত্তিতং আপজ্জন্তো সগৱচণ্ডো নামাতি ইমিনা নযেন সেসাপি ৱেদিতব্বা.

বলীবদ্দসুত্তৱণ্ণনা নিট্ঠিতা.

৯. ৰুক্খসুত্তৱণ্ণনা

১০৯. নৱমে ৰুক্খো তাৱ ফেগ্গু সাৰপৰিৱাৰোতি ৱনজেট্ঠকৰুক্খো সযং ফেগ্গু হোতি, পৰিৱাৰৰুক্খা পনস্স সাৰা হোন্তি. ইমিনা নযেন সেসা ৱেদিতব্বা. পুগ্গলেসু পন সীলসাৰৱিৰহিততো ফেগ্গুতা, সীলাচাৰসমন্নাগমেন চ সাৰতা ৱেদিতব্বা.

ৰুক্খসুত্তৱণ্ণনা নিট্ঠিতা.

১০. আসীৱিসসুত্তৱণ্ণনা

১১০. দসমে যস্স ৱিসং পজ্জলিততিণুক্কায অগ্গি ৱিয সীঘং অভিৰুহিত্ৱা অক্খীনি গহেত্ৱা খন্ধং গহেত্ৱা সীসং গহেত্ৱা ঠিতন্তি ৱত্তব্বতং আপজ্জতি মণিসপ্পাদীনং ৱিসং ৱিয, মন্তং পন পৰিৱত্তেত্ৱা কণ্ণৱাতং দত্ৱা দণ্ডকেন পহটমত্তে ওতৰিত্ৱা দট্ঠট্ঠানেযেৱ তিট্ঠতি, অযং আগতৱিসো ন ঘোৰৱিসো নাম. যস্স পন ৱিসং সণিকং অভিৰুহতি, আৰুড়্হাৰুড়্হট্ঠানে পন আসিত্তউদকং ৱিয হোতি উদকসপ্পাদীনং ৱিয, দ্ৱাদসৱস্সচ্চযেনপি কণ্ণৱিদ্ধখন্ধপিট্ঠিকাদীসু পঞ্ঞাযতি, মন্তপৰিৱত্তনাদীসু চ কৰিযমানেসু সীঘং ন ওতৰতি, অযং ঘোৰৱিসো ন আগতৱিসো নাম. যস্স পন ৱিসং সীঘং অভিৰুহতি, ন সীঘং ওতৰতি অনেড়কসপ্পাদীনং ৱিসং ৱিয, অযং আগতৱিসো চ ঘোৰৱিসো চ. অনেড়কসপ্পো নাম মহাআসীৱিসো. যস্স ৱিসং মন্দং হোতি, ওহাৰিযমানম্পি সুখেনেৱ ওতৰতি নীলসপ্পধমনিসপ্পাদীনং ৱিসং ৱিয, অযং নেৱ আগতৱিসো ন ঘোৰৱিসো. নীলসপ্পো নাম সাখৱণ্ণো ৰুক্খগ্গাদীসু ৱিচৰণসপ্পো.

আসীৱিসসুত্তৱণ্ণনা নিট্ঠিতা.

ৱলাহকৱগ্গৱণ্ণনা নিট্ঠিতা.