৯. অন্ধসুত্তৱণ্ণনা

২৯. নৱমে অন্ধোতিআদীসু পাড়িপদেসু পঠমো দিট্ঠধম্মিকভোগসংহৰণপঞ্ঞাচক্খুনো চ সম্পৰাযিকত্থসাধনপঞ্ঞাচক্খুনো চ অভাৱা ‘‘অন্ধো’’তি ৱুচ্চতি দুতিযোপি, ততিযো পন দ্ৱিন্নম্পি ভাৱা ‘‘দ্ৱিচক্খূ’’তি ৱুচ্চতি. পঞ্ঞাচক্খূতি আযকোসল্লভূতা পঞ্ঞাচক্খু. তেনাহ ‘‘ফাতিং কৰেয্যা’’তি. অধমুত্তমেতি অধমে চেৱ উত্তমে চ. পটিপক্খৱসেনাতি পটিপক্খস্স অত্থিতাৱসেন. সুক্কসপ্পটিভাগাতি সুক্কধম্মেহি পহাযকেহি সপ্পটিভাগাতি জানেয্য. কণ্হসপ্পটিভাগাতি কণ্হধম্মেহি পহাতব্বেহি সপ্পটিভাগাতি জানেয্য.

তথাজাতিকাতি যাদিসেহি সপুত্তদাৰপৰিজনসঞাতিমিত্তবন্ধৱগ্গং অত্তানং সুখেতি পীণেতি, তাদিসা ভোগাপি ন সন্তি. পুঞ্ঞানি চ ন কৰোতীতি সমণব্ৰাহ্মণকপণদ্ধিকযাচকানং সন্তপ্পনৱসেন পুঞ্ঞানি ন কৰোতি. উভযত্থাতি উভযস্মিং লোকে, উভযস্মিং ৱা অত্থেতি ৱিগ্গহোতি দস্সেন্তো ‘‘ইধলোকে’’তিআদিমাহ. উভযেনাতি ৱুত্তমত্থং যোজেত্ৱা দস্সেতুং ‘‘কথ’’ন্তিআদি ৱুত্তং. যস্মিং ঠানেতি যস্মিংযেৱ ঠানে. ন সোচতীতি সোকহেতূনং তত্থ অভাৱতো ন সোচতি.

অন্ধসুত্তৱণ্ণনা নিট্ঠিতা.