৫. ৱজিৰূপমসুত্তৱণ্ণনা

২৫. পঞ্চমে অৰুইতি পুৰাণং দুট্ঠৱণং ৱুচ্চতি. ক-কাৰো পদসন্ধিকৰোতি অৰুকূপমং চিত্তং এতস্সাতি অৰুকূপমচিত্তো অপ্পমত্তকস্সপি দুক্খস্স অসহনতো. সেসপদদ্ৱযেপি এসেৱ নযো. ইত্তৰকালোভাসেনাতি পৰিত্তমেৱ কালো ঞাণোভাসৱিৰহেন. লগতীতি কোধাসঙ্গৱসেন কুপ্পন্তো পুগ্গলো সম্মুখা, ‘‘কিং ৱদসী’’তিআদিনা পৰম্মুখা চ উপনয্হনৱসেন লগতি, ন তণ্হাসঙ্গৱসেন. কুপ্পতীতি কুজ্ঝতি. ব্যাপজ্জতীতি ৱিপন্নচিত্তো হোতি. থদ্ধভাৱং আপজ্জতি ঈসকম্পি মুদুত্তাভাৱতো. দুট্ঠাৰুকোতি মংসলোহিতানং দুট্ঠভাৱেন পকতিভাৱং জহিত্ৱা ঠিতো দুট্ঠৱণো. ‘‘দুট্ঠাৰুতা’’তিপি পঠন্তি, তত্থাপি তাকাৰো পদসন্ধিকৰো.

তস্সাতি দুট্ঠাৰুকস্স. সৱনন্তি অসুচিৱিসন্দনং. উদ্ধুমাতস্স ৱিযাতি কোধেন উদ্ধং উদ্ধং ধুমাতকস্স ৱিয কোধূপাযাসস্স অৱিস্সজ্জনতো. চণ্ডিকতস্সাতি কুপিতস্স. এত্থ চ কিঞ্চাপি হেট্ঠিমমগ্গৱজ্ঝাপি কিলেসা তেহি অনুপ্পত্তিধম্মতং আপাদিতত্তা সমুচ্ছিন্না, তথাপি তস্মিং সন্তানে অগ্গমগ্গস্স অনুপ্পন্নত্তা তত্থ অপ্পহীনাপি কিলেসা অত্থেৱাতি কত্ৱা তেসং ঞাণানং ৱিজ্জূপমতা ৱুত্তা, ন তেহি মগ্গেহি পহীনানং কিলেসানং অত্থিভাৱতোতি দট্ঠব্বং.

ৱজিৰূপমসুত্তৱণ্ণনা নিট্ঠিতা.