(১৬) ৬. অচেলকৱগ্গৱণ্ণনা

১৫৭-১৬৩. ইতো পৰেসু পন সুত্তপদেসু ‘‘গাড়্হা’’তি ৱুত্তমত্থং ৱিৱৰন্তো ‘‘কক্খড়া’’তি আহ. কক্খড়চাৰো চস্সা ন লূখসভাৱো. অথ খো তণ্হাৱসেন থিৰগ্গহণন্তি আহ ‘‘লোভৱসেন থিৰগ্গহণা’’তি. অগাড়্হা পটিপদাতি ৱা কামানং ওগাহনং পটিপত্তি, কামসুখানুযোগোতি অত্থো. নিজ্ঝামা পটিপদাতি কাযস্স নিজ্ঝাপনৱসেন খেপনৱসেন পৱত্তা পটিপত্তি, অত্তকিলমথানুযোগোতি অত্থো. নিচ্চেলোতি নিস্সট্ঠচেলো সব্বেন সব্বং পটিক্খিত্তচেলো. নগ্গিযৱতসমাদানেন নগ্গো. ঠিতকোৱ উচ্চাৰং কৰোতীতিআদি নিদস্সনমত্তং ৱমিত্ৱা মুখৱিক্খালনাদিআচাৰস্সপি তেন ৱিস্সট্ঠত্তা. জিৱ্হায হত্থং অপলেখতি অৱলেখতি উদকেন অধোৱনতো. দুতিযৱিকপ্পেপি এসেৱ নযো. ‘‘এহি, ভদন্তে’’তি ৱুত্তে উপগমনসঙ্খাতো ৱিধি এহিভদন্তো, তং চৰতীতি এহিভদন্তিকো, তপ্পটিক্খেপেন ন এহিভদন্তিকো. ন কৰোতি ‘‘সমণেন নাম পৰস্স ৱচনকৰেন ন ভৱিতব্ব’’ন্তি অধিপ্পাযেন.

পুৰেতৰন্তি তং ঠানং অত্তনো উপগমনতো পুৰেতৰং. তং কিৰ সো ‘‘ভিক্খুনা নাম যদিচ্ছকা এৱ ভিক্খা গহেতব্বা’’তি অধিপ্পাযেন ন গণ্হাতি. উদ্দিস্স কতং মম নিমিত্তভাৱেন বহূ খুদ্দকা পাণা সঙ্ঘাতং আপাদিতাতি ন গণ্হাতি. নিমন্তনং ন সাদিযতি এৱং তেসং ৱচনং কতং ভৱিস্সতীতি. কুম্ভি আদীসুপি সো সত্তসঞ্ঞীতি আহ ‘‘কুম্ভি-কড়োপিযো’’তিআদি. কবড়ন্তৰাযো হোতীতি উট্ঠিতস্স দ্ৱিন্নম্পি কবড়ন্তৰাযো হোতি. গামসভাগাদিৱসেন সঙ্গম্ম কিত্তেন্তি এতিস্সাতি সঙ্কিত্তি, যথাসংহততণ্ডুলাদিসঞ্চযো. মানুসকানীতি ৱেয্যাৱচ্চকৰা মনুস্সা.

সুৰাপানমেৱাতি মজ্জলক্খণপ্পত্তায সুৰায পানমেৱ. সুৰাগহণেনেৱেত্থ মেৰযম্পি সঙ্গহিতং. একাগাৰমেৱ উঞ্ছতীতি একাগাৰিকো. একালোপেনেৱ ৱত্ততীতি একালোপিকো. দীযতি এতাযাতি দত্তি, দ্ৱত্তিআলোপমত্তগ্গাহি খুদ্দকং ভিক্খাদানভাজনং. তেনাহ ‘‘খুদ্দকপাতী’’তি. অভুঞ্জনৱসেন একো অহো এতস্স অত্থীতি একাহিকো, আহাৰো, তং একাহিকং. সো পন অত্থতো একদিৱসং লঙ্ঘকো হোতীতি আহ ‘‘একাদিৱসন্তৰিক’’ন্তি. দ্ৱাহিকন্তিআদীসুপি এসেৱ নযো. একাহং অভুঞ্জিত্ৱা একাহং ভুঞ্জনং একাহৱাৰো, তং একাহিকমেৱ অত্থতো. দ্ৱীহং অভুঞ্জিত্ৱা দ্ৱীহং ভুঞ্জনং দ্ৱীহৱাৰো. সেসপদদ্ৱযেপি এসেৱ নযো. উক্কট্ঠো পন পৰিযাযভত্তভোজনিকো দ্ৱীহং অভুঞ্জিত্ৱা একাহমেৱ ভুঞ্জতি. সেসদ্ৱযেপি এসেৱ নযো.

মিচ্ছাৱাযামৱসেনেৱ উক্কুটিকৱতানুযোগোতি আহ ‘‘উক্কুটিকৱীৰিযমনুযুত্তো’’তি. অত্তকিলমথানুযোগন্তি অত্তনো কিলমথানুযোগং, সৰীৰদুক্খকাৰণন্তি অত্থো. সৰীৰপৰিযাযো হি ইধ অত্তসদ্দো ‘‘অত্তন্তপো’’তিআদীসু (ম. নি. ২.৪১৩) ৱিয. দ্ৱে অন্তেতি উভো কোটিযো, উভো লামকপটিপত্তিযোতি অত্থো. লামকম্পি হি অন্তোতি ৱুচ্চতি ‘‘অন্তমিদং, ভিক্খৱে, জীৱিকানং (সং. নি. ৩.৮০; ইতিৱু. ৬১), কোট্ঠকো অন্তো’’তি এৱমাদীসু. মজ্ঝিমপটিপদায উপ্পথভাৱেন অমনীযা গন্তব্বা ঞাতব্বাতি অন্তা. ততো এৱ লামকা.

অচেলকৱগ্গৱণ্ণনা নিট্ঠিতা.

পেয্যালৱগ্গৱণ্ণনা

১৬৪-১৮৪. সমনুঞ্ঞোতি সম্মদেৱ কতানুঞ্ঞো. তেনাহ ‘‘সমানজ্ঝাসযো’’তি. সেসমেত্থ উত্তানমেৱ.

ইতি মনোৰথপূৰণিযা অঙ্গুত্তৰনিকায-অট্ঠকথায

তিকনিপাতৱণ্ণনায অনুত্তানত্থদীপনা সমত্তা.