(১৪) ৪. যোধাজীৱৱগ্গো

১. যোধাজীৱসুত্তৱণ্ণনা

১৩৪. চতুত্থস্স পঠমে যুজ্ঝনং যোধো, সো আজীৱো এতস্সাতি যোধাজীৱো. যুদ্ধমুপজীৱতীতি ৱা এতস্মিং অত্থে যোধাজীৱোতি নিৰুত্তিনযেন পদসিদ্ধি ৱেদিতব্বা. তেনাহ ‘‘যুদ্ধং উপজীৱতীতি যোধাজীৱো’’তি. সহ…পে… পস্সতীতি পুব্বভাগে ৱিপস্সনাপঞ্ঞায সম্মসনৱসেন, মগ্গক্খণে অভিসমযৱসেন অত্তপচ্চক্খেন ঞাণেন পস্সতি.

যোধাজীৱসুত্তৱণ্ণনা নিট্ঠিতা.

২. পৰিসাসুত্তৱণ্ণনা

১৩৫. দুতিযে অপ্পটিপুচ্ছিত্ৱা ৱিনীতাতি ‘‘তং কিং মঞ্ঞথ, ভিক্খৱে, ৰূপং নিচ্চং ৱা অনিচ্চং ৱা’’তিআদিনা অপ্পটিপুচ্ছিত্ৱা কেৱলং ধম্মদেসনাৱসেনেৱ ৱিনীতপৰিসা. দুব্বিনীতপৰিসাতি দুক্খেন ৱিনীতপৰিসা. পুচ্ছিত্ৱা ৱিনীতাতি ‘‘তং কিং মঞ্ঞথ, ভিক্খৱে’’তিআদিনা পুচ্ছিত্ৱা অনুমতিগ্গহণৱসেন ৱিনীতা. সুৱিনীতপৰিসাতি সুখেন ৱিনীতপৰিসা. অনুমতিগ্গহণৱসেন ৱিনযনঞ্হি ন দুক্কৰং হোতি.

পৰিসাসুত্তৱণ্ণনা নিট্ঠিতা.

৪. উপ্পাদাসুত্তৱণ্ণনা

১৩৭. চতুত্থে উপ্পাদা ৱা তথাগতানন্তি তথাগতানং উপ্পাদেপি ৱেনেয্যপুগ্গলানং মগ্গফলুপ্পত্তি ৱিয সঙ্খাৰানং অনিচ্চাদিসভাৱো ন তথাগতুপ্পাদাযত্তো, অথ খো তথাগতানং উপ্পাদেপি অনুপ্পাদেপি হোতিমেৱাতি ৱুত্তং হোতি. ঠিতাৱ সা ধাতূতি ঠিতো এৱ সো অনিচ্চসভাৱো ব্যভিচাৰাভাৱতো ন কদাচি সঙ্খাৰা অনিচ্চা ন হোতি. কামং অসঙ্খতা ৱিয ধাতু ন নিচ্চো সো সভাৱো, তথাপি সব্বকালিকোযেৱাতি অধিপ্পাযো.

অপৰো নযো – ঠিতাৱ সা ধাতূতি ‘‘সব্বে সঙ্খাৰা অনিচ্চা’’তি এসা ধাতু এস সভাৱো তথাগতানং উপ্পাদতো পুব্বে উদ্ধঞ্চ অপ্পটিৱিজ্ঝিযমানো ন তথাগতেহি উপ্পাদিতো, অথ খো সব্বকালং সব্বে সঙ্খাৰা অনিচ্চা, ঠিতাৱ সা ধাতু, কেৱলং পন সযম্ভুঞাণেন অভিসম্বুজ্ঝনতো ‘‘অযং ধম্মো তথাগতেন অভিসম্বুদ্ধো’’তি পৱেদনতো চ তথাগতো ধম্মস্সামীতি ৱুচ্চতি অপুব্বস্স তস্স উপ্পাদনতো. তেন ৱুত্তং ‘‘ঠিতাৱ সা ধাতূ’’তি.

অভিসম্বুজ্ঝতীতি ঞাণেন অভিসম্বুজ্ঝতি. অভিসমেতীতি ঞাণেন অভিসমাগচ্ছতি. আচিক্খতীতি কথেতি. দেসেতীতি দস্সেতি. পঞ্ঞাপেতীতি জানাপেতি. পট্ঠপেতীতি ঞাণমুখে ঠপেতি. ৱিৱৰতীতি ৱিৱৰিত্ৱা দস্সেতি. ৱিভজতীতি ৱিভাগতো দস্সেতি. উত্তানীকৰোতীতি পাকটং কৰোতি.

অথ ৱা অভিসম্বুজ্ঝতীতি পচ্চক্খকৰণেন অভিমুখং বুজ্ঝতি, যাথাৱতো পটিৱিজ্ঝতি. ততো এৱ অভিসমেতি অভিমুখং সমাগচ্ছতি. আদিতো কথেন্তো আচিক্খতি, উদ্দিসতীতি অত্থো. তমেৱ উদ্দেসং পৰিযোসাপেন্তো দেসেতি. যথাউদ্দিট্ঠমত্থং নিদস্সনৱসেন পকাৰেহি ঞাপেন্তো পঞ্ঞাপেতি. পকাৰেহি এতমত্থং পতিট্ঠপেন্তো পট্ঠপেতি. যথাউদ্দিট্ঠং পটিনিদস্সনৱসেন ৱিৱৰতি ৱিভজতি. ৱিৱটং ৱিভত্তঞ্চ অত্থং হেতূদাহৰণদস্সনেহি পাকটং কৰোন্তো উত্তানীকৰোতি.

উপ্পাদাসুত্তৱণ্ণনা নিট্ঠিতা.

৫-১০. কেসকম্বলসুত্তাদিৱণ্ণনা

১৩৮-১৪৩. পঞ্চমে তন্তাৱুতানং ৱত্থানন্তি ইদং ‘‘যানি কানিচী’’তি ইমিনা সমানাধিকৰণন্তি আহ ‘‘পচ্চত্তে সামিৱচন’’ন্তি. ৱাযিতানন্তি ৱীতানং. লামকোতি নিহীনো, মক্খলি মোঘপুৰিসোতি এত্থ মক্খলীতি তস্স নামং. তং কিৰ সকদ্দমায ভূমিযা তেলঘটং গহেত্ৱা গচ্ছন্তং, ‘‘তাত, মা খলী’’তি সামিকো আহ. সো পমাদেন খলিত্ৱা পতিত্ৱা সামিকস্স ভযেন পলাযিতুং আৰদ্ধো. সামিকো উপধাৱিত্ৱা নং দুস্সকণ্ণে অগ্গহেসি, সাটকং ছড্ডেত্ৱা অচেলকো হুত্ৱা পলাযি. সো পণ্ণেন ৱা তিণেন ৱা পটিচ্ছাদেতুম্পি অজানন্তো জাতৰূপেনেৱ একং গামং পাৱিসি. মনুস্সা তং দিস্ৱা ‘‘অযং সমণো অৰহা অপ্পিচ্ছো, নত্থি ইমিনা সদিসো’’তি পূৱভত্তাদীনি গহেত্ৱা উপসঙ্কমন্তি. সো ‘‘ময্হং সাটকং অনিৱত্থভাৱেন ইদং উপ্পন্ন’’ন্তি ততো পট্ঠায সাটকং লভিত্ৱাপি ন নিৱাসেসি, তদেৱ চ পব্বজ্জং অগ্গহেসি. তস্স সন্তিকে অঞ্ঞেপি অঞ্ঞেপীতি পঞ্চসতা মনুস্সা পব্বজিংসু. তং সন্ধাযাহ ‘‘মক্খলি মোঘপুৰিসো’’তি. ছট্ঠাদীনি উত্তানত্থানি এৱ.

কেসকম্বলসুত্তাদিৱণ্ণনা নিট্ঠিতা.

১১-১৩. পঠমমোৰনিৱাপসুত্তাদিৱণ্ণনা

১৪৪-১৪৬. একাদসমে অকুপ্পধম্মতায খযৱযসঙ্খাতং অন্তং অতীতাতি অচ্চন্তা, এৱং অপৰিহাযনসভাৱত্তা অচ্চন্তা নিট্ঠা অস্সাতি অচ্চন্তনিট্ঠো. তেনাহ ‘‘অন্তং অতিক্কন্তনিট্ঠো’’তিআদি. ন হি পটিৱিদ্ধস্স লোকুত্তৰধম্মস্স দস্সনং কুপ্পনং নাম অত্থি. ধুৱনিট্ঠোতি সততনিট্ঠো. অচ্চন্তমেৱ চতূহি যোগেহি খেমো এতস্স অত্থীতি অচ্চন্তযোগক্খেমী, নিচ্চযোগক্খেমীতি অত্থো. মগ্গব্ৰহ্মচৰিযস্স ৱুসিতত্তা তস্স অৱিহাযনসভাৱত্তা অচ্চন্তং ব্ৰহ্মচাৰীতি অচ্চন্তব্ৰহ্মচাৰী, নিচ্চব্ৰহ্মচাৰীতি অত্থো. পৰিযোসানন্তি ব্ৰহ্মচৰিযপৰিযোসানং ৱট্টদুক্খপৰিযোসানঞ্চ. অচ্চন্তং পৰিযোসানমস্সাতি অচ্চন্তপৰিযোসানো. দ্ৱাদসমতেৰসমানি উত্তানত্থানেৱ.

পঠমমোৰনিৱাপসুত্তাদিৱণ্ণনা নিট্ঠিতা.

যোধাজীৱৱগ্গৱণ্ণনা নিট্ঠিতা.

১৪৭-১৫৬. মঙ্গলৱগ্গো উত্তানত্থোযেৱ.

ততিযপণ্ণাসকং নিট্ঠিতং.