৪. ভৰণ্ডুকালামসুত্তৱণ্ণনা

১২৭. চতুত্থে আড়াৰকালামকালেতি আড়াৰকালামানং ধৰমানকালে. পৰিঞ্ঞন্তি পহানপৰিঞ্ঞং. সা হি সমতিক্কমো, ন ইতৰা. তেনাহ ‘‘পৰিঞ্ঞা নাম সমতিক্কমো’’তি. এত্থ চ পঠমো সত্থা ৰূপাৱচৰসমাপত্তিলাভী দট্ঠব্বো, দুতিযো অৰূপাৱচৰসমাপত্তিলাভী, ততিযো সম্মাসম্বুদ্ধো দট্ঠব্বো. ৱুত্তঞ্হেতং পুগ্গলপঞ্ঞত্তিযং (পু. প. ১৩০) –

‘‘য্ৱাযং সত্থা কামানং পৰিঞ্ঞং পঞ্ঞাপেতি, ন ৰূপানং পৰিঞ্ঞং পঞ্ঞাপেতি, ন ৱেদনানং পৰিঞ্ঞং পঞ্ঞাপেতি, ৰূপাৱচৰসমাপত্তিযা লাভী সত্থা তেন দট্ঠব্বো. য্ৱাযং সত্থা কামানঞ্চ পৰিঞ্ঞং পঞ্ঞাপেতি, ৰূপানঞ্চ পৰিঞ্ঞং পঞ্ঞাপেতি, ন ৱেদনানং পৰিঞ্ঞং পঞ্ঞাপেতি, অৰূপাৱচৰসমাপত্তিযা লাভী সত্থা তেন দট্ঠব্বো. য্ৱাযং সত্থা কামানঞ্চ পৰিঞ্ঞং পঞ্ঞাপেতি, ৰূপানঞ্চ পৰিঞ্ঞং পঞ্ঞাপেতি, ৱেদনানঞ্চ পৰিঞ্ঞং পঞ্ঞাপেতি, সম্মাসম্বুদ্ধো সত্থা তেন দট্ঠব্বো’’তি.

তত্থ তিত্থিযা সমযং জানন্তা কামানং পৰিঞ্ঞং পঞ্ঞাপেয্যুং পঠমজ্ঝানং ৱদমানা. ৰূপানং পৰিঞ্ঞং পঞ্ঞাপেয্যুং অৰূপৰাগং ৱদমানা. ৱেদনাপৰিঞ্ঞং পঞ্ঞাপেয্যুং অসঞ্ঞাৰাগং ৱদমানা. তে পন ‘‘ইদং নাম পঠমজ্ঝানং, অযং ৰূপভৱো, অযং অসঞ্ঞাভৱো’’তিপি ন জানন্তি. তে পঞ্ঞাপেতুং অসক্কোন্তাপি কেৱলং ‘‘পঞ্ঞাপেমা’’তি ৱদন্তি. তথাগতো পন কামানং পৰিঞ্ঞং অনাগামিমগ্গেন পঞ্ঞাপেতি, ৰূপৱেদনানং অৰহত্তমগ্গেন. এৱমেত্থ দ্ৱে জনা বাহিৰকা, একো সম্মাসম্বুদ্ধোতি ইমস্মিং লোকে তযো সত্থাৰো নাম.

ভৰণ্ডুকালামসুত্তৱণ্ণনা নিট্ঠিতা.