১০. লেখসুত্তৱণ্ণনা

১৩৩. দসমে থিৰট্ঠানতোতি থিৰট্ঠানতোৱ. পাসাণে লেখসদিসা পৰাপৰাধনিব্বত্তা কোধলেখা যস্স সো পাসাণলেখূপমসমন্নাগতো পাসাণলেখূপমোতি ৱুত্তো. এৱং ইতৰেপি. অনুসেতীতি অপ্পহীনতায অনুসেতি. ন খিপ্পং লুজ্জতীতি ন অন্তৰা নস্সতি কম্মট্ঠানেনেৱ নস্সনতো. এৱমেৱন্তি এৱং তস্সপি পুগ্গলস্স কোধো ন অন্তৰা পুনদিৱসে ৱা অপৰদিৱসে ৱা নিট্ঠাতি, অদ্ধনিযো পন হোতি, মৰণেনেৱ নিট্ঠাতীতি অত্থো. কক্খড়েনাতি অতিকক্খড়েন ধম্মচ্ছেদকেন থদ্ধৱচনেন. সংসন্দতীতি একীভৱতি. সম্মোদতীতি নিৰন্তৰো হোতীতি এৱমেত্থ অত্থো দট্ঠব্বো.

অথ ৱা সন্ধিযতীতি ঠানগমনাদীসু কাযকিৰিযাসু কাযেন সমোধানং গচ্ছতি, তিলতণ্ডুলা ৱিয মিস্সীভাৱং উপেতীতি অত্থো. সংসন্দতীতি চিত্তকিৰিযাসু চিত্তেন সমোধানং গচ্ছতি, খীৰোদকং ৱিয একীভাৱং উপেতীতি অত্থো. সম্মোদতীতি উদ্দেসপৰিপুচ্ছাদীসু ৱচীকিৰিযাসু ৱাচায সমোধানং গচ্ছতি, ৱিপ্পৱাসাগতোপি পিযসহাযকো ৱিয পিযতৰভাৱং উপেতীতি অত্থো. অপিচ কিচ্চকৰণীযেসু তেহি সদ্ধিং আদীতোৱ এককিৰিযাভাৱং উপগচ্ছন্তো সন্ধিযতি, যাৱ মজ্ঝা পৱত্তন্তো সংসন্দতি, যাৱ পৰিযোসানা অনিৱত্তন্তো সম্মোদতীতি ৱেদিতব্বো.

লেখসুত্তৱণ্ণনা নিট্ঠিতা.

কুসিনাৰৱগ্গৱণ্ণনা নিট্ঠিতা.