১-২. কুসিনাৰসুত্তাদিৱণ্ণনা

১২৪-১২৫. ততিযস্স পঠমে তণ্হাগেধেন গথিতোতি তণ্হাবন্ধনেন বদ্ধো. তণ্হামুচ্ছনাযাতি তণ্হায ৱসেন মুচ্ছাপত্তিযা. মুচ্ছিতোতি মুচ্ছং মোহং পমাদং আপন্নো. অজ্ঝোপন্নোতি অধিওপন্নো. তণ্হায অধিভৱিত্ৱা অজ্ঝোত্থটো গিলিত্ৱা পৰিনিট্ঠপেত্ৱা ৱিয ঠিতো. তেনাহ ‘‘অজ্ঝোপন্নোতি তণ্হায গিলিত্ৱা পৰিনিট্ঠপেত্ৱা পৱত্তো’’তি. অনাদীনৱদস্সাৱীতি গথিতাদিভাৱেন পৰিভোগে আদীনৱমত্তম্পি ন পস্সতি. নিস্সৰণপঞ্ঞোতি অযমত্থো আহাৰপৰিভোগেতি তত্থ পযোজনপৰিচ্ছেদিকা ‘‘যাৱদেৱ ইমস্স কাযস্স ঠিতিযা’’তিআদিনা (ম. নি. ১.২৩; ২.২৪; ৩.৭৫; সং. নি. ৪.১২০; অ. নি. ৬.৫৮; ৮.৯) পৱত্তা আহাৰপটিবদ্ধছন্দৰাগনিস্সৰণভূতা পঞ্ঞা অস্স অত্থীতি নিস্সৰণপঞ্ঞো. সেসমেত্থ উত্তানমেৱ. দুতিযে নত্থি ৱত্তব্বং.

কুসিনাৰসুত্তাদিৱণ্ণনা নিট্ঠিতা.