৩. অপ্পমেয্যসুত্তৱণ্ণনা

১১৬. ততিযে সুখেন মেতব্বোতি যথা পৰিত্তস্স উদকস্স সুখেন পমাণং গয্হতি, এৱমেৱ ‘‘উদ্ধতো’’তিআদিনা যথাৱুত্তেহি অগুণঙ্গেহি সমন্নাগতস্স সুখেন পমাণং গয্হতীতি, সুখেন মেতব্বো. দুক্খেন মেতব্বোতি যথা মহাসমুদ্দস্স দুক্খেন পমাণং গয্হতি, এৱমেৱ ‘‘অনুদ্ধতো’’তিআদিনা দস্সিতেহি গুণঙ্গেহি সমন্নাগতস্স দুক্খেন পমাণং গয্হতি, ‘‘অনাগামী নু খো খীণাসৱো নু খো’’তি ৱত্তব্বতং গচ্ছতি, তেনেস দুক্খেন মেতব্বো. পমেতুং ন সক্কোতীতি যথা আকাসস্স ন সক্কা পমাণং গহেতুং, এৱং খীণাসৱস্স, তেনেস পমেতুং ন সক্কাতি অপ্পমেয্যো.

সাৰাভাৱেন তুচ্ছত্তা নড়ো ৱিয নড়ো, মানোতি আহ ‘‘উন্নড়োতি উগ্গতনড়ো’’তি, উট্ঠিততুচ্ছমানোতি ৱুত্তং হোতি. তেনাহ ‘‘তুচ্ছমানং উক্খিপিত্ৱা ঠিতোতি অত্থো’’তি. মনো হি সেয্যস্স সেয্যোতি সদিসোতি চ পৱত্তিযা ৱিসেসতো তুচ্ছো. চাপল্লেনাতি চপলভাৱেন, তণ্হালোলুপ্পেনাতি অত্থো. মুখৰোতি মুখেন ফৰুসো, ফৰুসৱাচোতি অত্থো. ৱিকিণ্ণৱাচোতি ৱিসটৱচনো সম্ফপ্পলাপিতায অপৰিযন্তৱচনো. তেনাহ ‘‘অসঞ্ঞতৱচনো’’তি, দিৱসম্পি নিৰত্থকৱচনং পলাপীতি ৱুত্তং হোতি. চিত্তেকগ্গতাৰহিতোতি উপচাৰপ্পনাসমাধিৰহিতো চণ্ডসোতে বদ্ধনাৱা ৱিয অনৱট্ঠিতকিৰিযো. ভন্তচিত্তোতি অনৱট্ঠিতচিত্তো পণ্ণাৰুড়্হৱালমিগসদিসো. ৱিৱটিন্দ্ৰিযোতি সংৱৰাভাৱেন গিহিকালে ৱিয অসংৱুতচক্খাদিইন্দ্ৰিযো.

অপ্পমেয্যসুত্তৱণ্ণনা নিট্ঠিতা.