১. আপাযিকসুত্তৱণ্ণনা

১১৪. দুতিযস্স পঠমে অপাযেসু নিব্বত্তনসীলতায অপাযূপগা আপাযিকাতি আহ ‘‘অপাযং গচ্ছিস্সন্তীতি আপাযিকা’’তি. অঞ্ঞে ব্ৰহ্মচাৰিনো সুনিৱত্থে সুপাৰুতে সুম্ভকপত্তধৰে গামনিগমৰাজধানীসু পিণ্ডায চৰিত্ৱা জীৱিকং কপ্পেন্তে দিস্ৱা সযম্পি তাদিসেন আকাৰেন তথাপটিপজ্জনতো ‘‘অহং ব্ৰহ্মচাৰী’’তি পটিঞ্ঞং দেন্তো ৱিয হোতীতি আহ ‘‘ব্ৰহ্মচাৰিপটিঞ্ঞোতি ব্ৰহ্মচাৰিপটিৰূপকো’’তি. ‘‘অহম্পি ভিক্খূ’’তি ৱত্ৱা উপোসথঙ্গাদীনি পৱিসন্তো পন ব্ৰহ্মচাৰিপটিঞ্ঞো হোতিযেৱ, তথা সঙ্ঘিকং লাভং গণ্হন্তো. তেনাহ ‘‘তেসং ৱা…পে… এৱংপটিঞ্ঞো’’তি. অক্কোসতীতি ‘‘অস্সমণোসি, সমণপটিঞ্ঞোসী’’তিআদিনা অক্কোসতি. পৰিভাসতীতি ‘‘সো ত্ৱং ‘হোতু, মুণ্ডকসমণো অহ’ন্তি মঞ্ঞসি, ইদানি তে অস্সমণভাৱং আৰোপেস্সামী’’তিআদিনা ৱদন্তো পৰিভাসতি.

কিলেসকামোপি অস্সাদিযমানো ৱত্থুকামন্তোগধোযেৱ, কিলেসকামৱসেন চ তেসং অস্সাদনং সিযাতি আহ ‘‘কিলেসকামেন ৱত্থুকামে সেৱন্তস্সা’’তি. কিলেসকামেনাতি কৰণত্থে কৰণৱচনং. নত্থি দোসোতি অস্সাদেত্ৱা ৱিসযপৰিভোগে নত্থি আদীনৱো, তপ্পচ্চযা ন কোচি অন্তৰাযোতি অধিপ্পাযো. পাতব্বতং আপজ্জতীতি পৰিভুঞ্জনকতং উপগচ্ছতি. পৰিভোগত্থো হি অযং পা-সদ্দো, কত্তুসাধনো চ তব্ব-সদ্দো, যথাৰুচি পৰিভুঞ্জতীতি অত্থো. পিৱিতব্বতং পৰিভুঞ্জিতব্বতন্তি এত্থাপি কত্তুৱসেনেৱ অত্থো ৱেদিতব্বো.

আপাযিকসুত্তৱণ্ণনা নিট্ঠিতা.