১১. নিমিত্তসুত্তৱণ্ণনা

১০৩. একাদসমে যেহি ফলং নিমীযতি, উপ্পজ্জনট্ঠানে পক্খিপমানং ৱিয হোতি, তানি নিমিত্তানি. তেনাহ ‘‘তীণি কাৰণানী’’তি. কালেন কালন্তি এত্থ কালেনাতি ভুম্মত্থে কৰণৱচনং. কালন্তি চ উপযোগৱচনন্তি আহ ‘‘কালে কালে’’তি. মনসি কাতব্বাতি চিত্তে কাতব্বা, উপ্পাদেতব্বাতি অত্থো. উপলক্খিতসমাধানাকাৰো সমাধিযেৱ ইধ সমাধিনিমিত্তন্তি আহ ‘‘একগ্গতা হি ইধ সমাধিনিমিত্তন্তি ৱুত্তা’’তি. ঠানং তং চিত্তং কোসজ্জায সংৱত্তেয্যাতি এত্থ ঠানং অত্থীতি ৱচনসেসো. তং ভাৱনাচিত্তং কোসজ্জায সংৱত্তেয্য, তস্স সংৱত্তনস্স কাৰণং অত্থীতি অত্থো. তং ৱা মনসিকৰণং চিত্তং কোসজ্জায সংৱত্তেয্য, এতস্স ঠানং কাৰণং অত্থীতি অত্থো. তেনাহ ‘‘কাৰণং ৱিজ্জতী’’তিআদি. ঞাণজৱন্তি সঙ্খাৰেসু অনিচ্চাদিৱসেন পৱত্তমানং পঞ্ঞাজৱং.

যং কিঞ্চি সুৱণ্ণতাপনযোগ্গঅঙ্গাৰভাজনং ইধ ‘‘উক্কা’’তি অধিপ্পেতন্তি আহ ‘‘অঙ্গাৰকপল্ল’’ন্তি. সজ্জেয্যাতি যথা তত্থ পক্খিত্তং সুৱণ্ণং তপ্পতি, এৱং পটিযাদিযেয্য. আলিম্পেয্যাতি আদিযেয্য, জলেয্যাতি অত্থো. তেনাহ ‘‘তত্থ অঙ্গাৰে…পে… গাহাপেয্যা’’তি. মূসায ৱা পক্খিপেয্যাতি তত্তকে ৱা পক্খিপেয্য. উপধাৰেতীতি সল্লক্খেতি.

নিমিত্তসুত্তৱণ্ণনা নিট্ঠিতা.

লোণকপল্লৱগ্গৱণ্ণনা নিট্ঠিতা.

দুতিযপণ্ণাসকং নিট্ঠিতং.