(৯) ৪. সমণৱগ্গো

১-৫. সমণসুত্তাদিৱণ্ণনা

৮২-৮৬. চতুত্থস্স পঠমে সম্মা আদানং গহণং সমাদানন্তি আহ ‘‘সমাদানং ৱুচ্চতি গহণ’’ন্তি. অধিকং ৱিসিট্ঠং সীলন্তি অধিসীলং. লোকিযসীলস্স অধিসীলভাৱো পৰিযাযেনাতি নিপ্পৰিযাযমেৱ তং দস্সেতুং ‘‘অপিচ সব্বম্পি লোকিযসীল’’ন্তিআদি ৱুত্তং. সিক্খিতব্বতোতি আসেৱিতব্বতো. পঞ্চপি দসপি ৱা সীলানি সীলং নাম, পাতিমোক্খসংৱৰো অধিসীলং নাম অনৱসেসকাযিকচেতসিকসংৱৰভাৱতো মগ্গসীলস্স পদট্ঠানভাৱতো চ. অট্ঠ সমাপত্তিযো চিত্তং, ৱিপস্সনাপাদকজ্ঝানং অধিচিত্তং মগ্গসমাধিস্স অধিট্ঠানভাৱতো. কম্মস্সকতঞাণং পঞ্ঞা, ৱিপস্সনা অধিপঞ্ঞা মগ্গপঞ্ঞায অধিট্ঠানভাৱতো. অপিচ নিব্বানং পত্থযন্তেন সমাদিন্নং পঞ্চসীলং দসসীলম্পি অধিসীলমেৱ নিব্বানাধিগমস্স পচ্চযভাৱতো. নিব্বানং পত্থযন্তেন সমাপন্না অট্ঠ সমাপত্তিযোপি অধিচিত্তমেৱ.

‘‘কল্যাণকাৰী কল্যাণং, পাপকাৰী চ পাপকং;

অনুভোতি দ্ৱযমেতং, অনুবন্ধঞ্হি কাৰণ’’ন্তি. –

এৱং অতীতে অনাগতে চ ৱট্টমূলকদুক্খসল্লক্খণৱসেন সংৱেগৱত্থুতায ৱিমুত্তিআকঙ্খায পচ্চযভূতা কম্মস্সকতপঞ্ঞাপি অধিপঞ্ঞাতি ৱদন্তি. দুতিযততিযচতুত্থপঞ্চমানি উত্তানত্থানেৱ.

সমণসুত্তাদিৱণ্ণনা নিট্ঠিতা.

৬. পঠমসিক্খাসুত্তৱণ্ণনা

৮৭. ছট্ঠে সমত্তকাৰীতি অনূনেন পৰিপূৰেন আকাৰেন সমন্নাগতো. সিক্খাপদানং খুদ্দানুখুদ্দকত্তং অপেক্খাসিদ্ধন্তি আহ ‘‘তত্ৰাপি সঙ্ঘাদিসেসং খুদ্দক’’ন্তিআদি. অঙ্গুত্তৰমহানিকাযৱড়ঞ্জনকআচৰিযাতি অঙ্গুত্তৰনিকাযং পৰিহৰন্তা আচৰিযা, অঙ্গুত্তৰভাণকাতি ৱুত্তং হোতি. লোকৱজ্জং নাপজ্জতি লোকৱজ্জসিক্খাপদানং ৱীতিক্কমসাধকস্স কিলেসগহনস্স সব্বসো পহীনত্তা. পণ্ণত্তিৱজ্জমেৱ আপজ্জতি পণ্ণত্তিৱীতিক্কমং ৱা অজানতোপি আপত্তিসম্ভৱতো. চিত্তেন আপজ্জন্তো ৰূপিযপ্পটিগ্গহণং আপজ্জতীতি উপনিক্খিত্তসাদিযেন আপজ্জতি.

ব্ৰহ্মচৰিযস্স আদিভূতানি আদিব্ৰহ্মচৰিযানি, তানি এৱ আদিব্ৰহ্মচৰিযকানি যথা ‘‘ৱিনযো এৱ ৱেনযিকো’’তি আহ ‘‘মগ্গব্ৰহ্মচৰিযস্সা’’তিআদি. চত্তাৰি মহাসীলসিক্খাপদানীতি চত্তাৰি পাৰাজিকানি সন্ধায ৱদতি. পটিপক্খধম্মানং অনৱসেসতো সৱনতো পগ্ঘৰণতো সোতো, অৰিযমগ্গোতি আহ ‘‘সোতসঙ্খাতেন মগ্গেনা’’তি. ৱিনিপাতেতি ৱিৰূপং সদুক্খং সউপাযাসং নিপাতেতীতি ৱিনিপাতো, অপাযদুক্খে খিপনকো. ধম্মোতি সভাৱো. নাস্স ৱিনিপাতো ধম্মোতি অৱিনিপাতধম্মো, ন অত্তানং অপাযেসু ৱিনিপাতনসভাৱোতি ৱুত্তং হোতি. কস্মা? যে ধম্মা অপাযগমনীযা, তেসং পহীনত্তা. তেনাহ ‘‘অৱিনিপাতধম্মোতি চতূসু অপাযেসু অপতনসভাৱো’’তি. তত্থ অপতনসভাৱোতি অনুপ্পজ্জনসভাৱো. সোতাপত্তিমগ্গনিযামেন নিযতোতি উপৰিমগ্গাধিগমস্স অৱস্সংভাৱীভাৱতো নিযতো. তেনেৱাহ ‘‘সম্বোধিপৰাযণো’’তি. হেট্ঠিমন্ততো সত্তমভৱতো উপৰি অনুপ্পজ্জনধম্মতায ৱা নিযতো. সম্বুজ্ঝতীতি সম্বোধি, অৰিযমগ্গো. সো পন পঠমমগ্গস্স অধিগতত্তা অৱসিট্ঠো চ অধিগন্তব্বভাৱেন ইচ্ছিতব্বোতি উপৰিমগ্গত্তযসঙ্খাতা সম্বোধি পৰং অযনং পৰা গতি অস্সাতি সম্বোধিপৰাযণো. তেনাহ ‘‘উপৰিমগ্গত্তযসম্বোধিপৰাযণো’’তি.

তনুভাৱাতি পৰিযুট্ঠানমন্দতায চ কদাচি কৰহচি উপ্পত্তিযা চ তনুভাৱেন. তনুত্তঞ্হি দ্ৱীহি কাৰণেহি ৱেদিতব্বং অধিচ্চুপ্পত্তিযা চ পৰিযুট্ঠানমন্দতায চ. সকদাগামিস্স হি ৱট্টানুসাৰিমহাজনস্স ৱিয কিলেসা অভিণ্হং ন উপ্পজ্জন্তি, কদাচি কৰহচি উপ্পজ্জন্তি ৱিৰড়াকাৰা হুত্ৱা ৱিৰড়ৱাপিতে খেত্তে অঙ্কুৰা ৱিয. উপ্পজ্জমানাপি চ ৱট্টানুসাৰিমহাজনস্সেৱ মদ্দন্তা ফৰন্তা ছাদেন্তা অন্ধকাৰং কৰোন্তা ন উপ্পজ্জন্তি, মন্দমন্দা উপ্পজ্জন্তি তনুকাকাৰা হুত্ৱা অব্ভপটলমিৱ মক্খিকাপত্তমিৱ চ. তত্থ কেচি থেৰা ভণন্তি ‘‘সকদাগামিস্স কিলেসা কিঞ্চাপি চিৰেন উপ্পজ্জন্তি, বহলাৱ উপ্পজ্জন্তি. তথা হিস্স পুত্তা চ ধীতৰো চ দিস্সন্তী’’তি. এতং পন অপ্পমাণং. পুত্তধীতৰো হি অঙ্গপচ্চঙ্গপৰামসনমত্তেনপি হোন্তীতি. দ্ৱীহিযেৱ কাৰণেহিস্স কিলেসানং তনুত্তং ৱেদিতব্বং অধিচ্চুপ্পত্তিযা চ পৰিযুট্ঠানমন্দতায চাতি.

হেট্ঠাভাগিযানন্তি এত্থ হেট্ঠাতি মহগ্গতভূমিতো হেট্ঠা, কামভূমিযন্তি অত্থো. তেসং পচ্চযভাৱেন হেট্ঠাভাগস্স হিতাতি হেট্ঠাভাগিযা, তেসং হেট্ঠাভাগিযানং, হেট্ঠাভাগস্স কামভৱস্স পচ্চযভাৱেন গহিতানন্তি অত্থো. সংযোজেন্তি বন্ধন্তি খন্ধগতিভৱাদীহি খন্ধগতিভৱাদযো, কম্মং ৱা ফলেনাতি সংযোজনানীতি আহ ‘‘সংযোজনানন্তি বন্ধনান’’ন্তি. অসমুচ্ছিন্নৰাগাদিকস্স হি এতৰহি খন্ধাদীনং আযতিং খন্ধাদীহি সম্বন্ধো, সমুচ্ছিন্নৰাগাদিকস্স পন তং নত্থি, কতানম্পি কম্মানং অসমত্থভাৱাপত্তিতো ৰাগাদীনং অন্ৱযতো ব্যতিৰেকতো চ সংযোজনট্ঠো সিদ্ধো. পৰিক্খযেনাতি সমুচ্ছেদেন.

ওপপাতিকোতি উপপাতিকযোনিকো উপপতনে সাধুকাৰী. সেসযোনিপটিক্খেপৱচনমেতং. তেন গব্ভৱাসদুক্খাভাৱমাহ. তত্থ পৰিনিব্বাযীতি ইমিনা সেসদুক্খাভাৱং. তত্থ পৰিনিব্বাযিতা চস্স কামলোকে খন্ধবীজস্স অপুনাগমনৱসেনেৱাতি দস্সেতুং ‘‘অনাৱত্তিধম্মো’’তি ৱুত্তং. উপৰিযেৱাতি ব্ৰহ্মলোকেযেৱ. অনাৱত্তিধম্মোতি ততো ব্ৰহ্মলোকা পুনপ্পুনং পটিসন্ধিৱসেন ন আৱত্তনধম্মো. তেনাহ ‘‘যোনিগতিৱসেন অনাগমনধম্মো’’তি.

পদেসং পদেসকাৰী আৰাধেতীতি সীলক্খন্ধাদীনং পাৰিপূৰিযা একদেসভূতং হেট্ঠিমমগ্গত্তযং পদেসো, তং কৰোন্তো পদেসং একদেসভূতং হেট্ঠিমং ফলত্তযমেৱ আৰাধেতি, নিপ্ফাদেতীতি অত্থো. তেনাহ ‘‘পদেসকাৰী পুগ্গলো নাম সোতাপন্নো’’তিআদি. পৰিপূৰং পৰিপূৰকাৰীতি সীলক্খন্ধাদীহি সদ্ধিন্দ্ৰিযাদীহি চ পৰিতো পূৰণেন পৰিপূৰসঙ্খাতং অৰহত্তমগ্গং কৰোন্তো নিব্বত্তেন্তো পৰিপূৰং অৰহত্তফলং আৰাধেতি, নিপ্ফাদেতীতি অত্থো. তেনাহ ‘‘পৰিপূৰকাৰী নাম অৰহা’’তিআদি.

পঠমসিক্খাসুত্তৱণ্ণনা নিট্ঠিতা.

৭-১০. দুতিযসিক্খাসুত্তাদিৱণ্ণনা

৮৮-৯১. সত্তমে কুলা কুলং গমনকোতি কুলতো কুলং গচ্ছন্তো. দ্ৱে ৱা তযো ৱা ভৱেতি দেৱমনুস্সৱসেন দ্ৱে ৱা তযো ৱা ভৱে. মিস্সকভৱৱসেন হেতং ৱুত্তং. দেসনামত্তমেৱ চেতং ‘‘দ্ৱে ৱা তীণি ৱা’’তি. যাৱ ছট্ঠভৱা সংসৰন্তোপি কোলংকোলোৱ হোতি. তেনেৱাহ ‘‘অযঞ্হি দ্ৱে ৱা ভৱে…পে… এৱমেত্থ ৱিকপ্পো দট্ঠব্বো’’তি. উড়াৰকুলৱচনো ৱা এত্থ কুলসদ্দো, কুলতো কুলং গচ্ছতীতি কোলংকোলো. সোতাপত্তিফলসচ্ছিকিৰিযতো পট্ঠায হি নীচকুলে উপ্পত্তি নাম নত্থি, মহাভোগকুলেসু এৱ নিব্বত্ততীতি অত্থো. কেৱলো হি কুলসদ্দো মহাকুলমেৱ ৱদতি ‘‘কুলপুত্তো’’তিআদীসু ৱিয. একবীজীতি এত্থ খন্ধবীজং নাম কথিতং, খন্ধবীজন্তি চ পটিসন্ধিৱিঞ্ঞাণং ৱুচ্চতি. যস্স হি সোতাপন্নস্স একং খন্ধবীজং অত্থি, একং ভৱগ্গহণং, সো একবীজী নাম. তেনাহ ‘‘একস্সেৱ ভৱস্স বীজং এতস্স অত্থীতি একবীজী’’তি. ‘‘মানুসকং ভৱ’’ন্তি ইদং পনেত্থ দেসনামত্তমেৱ, ‘‘দেৱভৱং নিব্বত্তেতী’’তিপি পন ৱত্তুং ৱট্টতিযেৱ.

উদ্ধংৱাহিভাৱেন উদ্ধমস্স তণ্হাসোতং ৱট্টসোতং ৱাতি উদ্ধংসোতো, উদ্ধং ৱা গন্ত্ৱা পটিলভিতব্বতো উদ্ধমস্স মগ্গসোতন্তি উদ্ধংসোতো. পটিসন্ধিৱসেন অকনিট্ঠভৱং গচ্ছতীতি অকনিট্ঠগামী. যত্থ কত্থচীতি অৱিহাদীসু যত্থ কত্থচি. সপ্পযোগেনাতি ৱিপস্সনাঞাণাভিসঙ্খাৰসঙ্খাতেন পযোগেন সহ, মহতা ৱিপস্সনাপযোগেনাতি অত্থো. উপহচ্চাতি এতস্স উপগন্ত্ৱাতি অত্থো. তেন ৱেমজ্ঝাতিক্কমো কালকিৰিযাপগমনঞ্চ সঙ্গহিতং হোতি, তস্মা আযুৱেমজ্ঝং অতিক্কমিত্ৱা পৰিনিব্বাযন্তো উপহচ্চপৰিনিব্বাযী নাম হোতীতি আহ ‘‘যো পন কপ্পসহস্সাযুকেসু অৱিহেসূ’’তিআদি. সো তিৱিধো হোতীতি ঞাণস্স তিক্খমজ্ঝমুদুভাৱেন তিৱিধো হোতি. তেনাহ ‘‘কপ্পসহস্সাযুকেসূ’’তিআদি.

সদ্ধাধুৰেন অভিনিৱিসিত্ৱাতি ‘‘সচে সদ্ধায সক্কা নিব্বত্তেতুং, নিব্বত্তেস্সামি লোকুত্তৰমগ্গ’’ন্তি এৱং সদ্ধাধুৰৱসেন অভিনিৱিসিত্ৱা ৱিপস্সনং পট্ঠপেত্ৱা. পঞ্ঞাধুৰেন অভিনিৱিট্ঠোতি ‘‘সচে পঞ্ঞায সক্কা, নিব্বত্তেস্সামি লোকুত্তৰমগ্গ’’ন্তি এৱং পঞ্ঞাধুৰং কত্ৱা অভিনিৱিট্ঠো. যথাৱুত্তমেৱ অট্ঠৱিধত্তং কোলংকোলসত্তক্খত্তুপৰমেসু অতিদিসন্তো ‘‘তথা কোলংকোলা সত্তক্খত্তুপৰমা চা’’তি আহ. ৱুত্তনযেনেৱ অট্ঠ কোলংকোলা, অট্ঠ সত্তক্খত্তুপৰমাতি ৱুত্তং হোতি.

তত্থ সত্তক্খত্তুং পৰমা ভৱূপপত্তি অত্তভাৱগ্গহণং অস্স, ততো পৰং অট্ঠমং ভৱং নাদিযতীতি সত্তক্খত্তুপৰমো. ভগৱতা গহিতনামৱসেনেৱ চেতানি অৰিযায জাতিযা জাতানং তেসং নামানি জাতানি কুমাৰানং মাতাপিতূহি গহিতনামানি ৱিয. এত্তকঞ্হি ঠানং গতো একবীজী নাম হোতি, এত্তকং কোলংকোলো, এত্তকং সত্তক্খত্তুপৰমোতি ভগৱতা এতেসং নামং গহিতং. নিযমতো পন অযং একবীজী, অযং কোলংকোলো, অযং সত্তক্খত্তুপৰমোতি নত্থি. কো পন নেসং এতং পভেদং নিযমেতীতি? কেচি তাৱ থেৰা ‘‘পুব্বহেতু নিযমেতী’’তি ৱদন্তি, কেচি পঠমমগ্গো, কেচি উপৰি তযো মগ্গা, কেচি তিণ্ণং মগ্গানং ৱিপস্সনাতি.

তত্থ ‘‘পুব্বহেতু নিযমেতী’’তি ৱাদে পঠমমগ্গস্স উপনিস্সযো কতো নাম হোতি, ‘‘উপৰি তযো মগ্গা নিৰুপনিস্সযা উপ্পন্না’’তি ৱচনং আপজ্জতি. ‘‘পঠমমগ্গো নিযমেহী’’তি ৱাদে উপৰি তিণ্ণং মগ্গানং নিৰত্থকতা আপজ্জতি. ‘‘উপৰি তযো মগ্গা নিযমেন্তী’’তি ৱাদে পঠমমগ্গে অনুপ্পন্নেযেৱ উপৰি তযো মগ্গা উপ্পন্নাতি আপজ্জতীতি. ‘‘তিণ্ণং মগ্গানং ৱিপস্সনা নিযমেতী’’তি ৱাদো পন যুজ্জতি. সচে হি উপৰি তিণ্ণং মগ্গানং ৱিপস্সনা বলৱতী হোতি, একবীজী নাম হোতি, ততো মন্দতৰায কোলংকোলো, ততো মন্দতৰায সত্তক্খত্তুপৰমোতি.

একচ্চো হি সোতাপন্নো ৱট্টজ্ঝাসযো হোতি ৱট্টাভিৰতো, পুনপ্পুনং ৱট্টস্মিংযেৱ চৰতি সন্দিস্সতি. অনাথপিণ্ডিকো সেট্ঠি, ৱিসাখা উপাসিকা, চূড়ৰথমহাৰথা দেৱপুত্তা, অনেকৱণ্ণো দেৱপুত্তো, সক্কো দেৱৰাজা, নাগদত্তো দেৱপুত্তোতি ইমে হি এত্তকা জনা ৱট্টজ্ঝাসযা ৱট্টাভিৰতা আদিতো পট্ঠায ছ দেৱলোকে সোধেত্ৱা অকনিট্ঠে ঠত্ৱা পৰিনিব্বাযিস্সন্তি, ইমে ইধ ন গহিতা. ন কেৱলঞ্চিমেৱ, যোপি মনুস্সেসুযেৱ সত্তক্খত্তুং সংসৰিত্ৱা অৰহত্তং পাপুণাতি, যোপি দেৱলোকে নিব্বত্তো দেৱেসুযেৱ সত্তক্খত্তুং অপৰাপৰং সংসৰিত্ৱা অৰহত্তং পাপুণাতি. ইমেপি ইধ ন গহিতা, কালেন দেৱে, কালেন মনুস্সে সংসৰিত্ৱা পন অৰহত্তং পাপুণন্তোৱ ইধ গহিতো, তস্মা ‘‘সত্তক্খত্তুপৰমো’’তি ইদং ইধট্ঠকৱোকিণ্ণভৱূপপত্তিকসুক্খৱিপস্সকস্স নামং কথিতন্তি ৱেদিতব্বং.

‘‘সকিদেৱ ইমং লোকং আগন্ত্ৱা’’তি (পু. প. ৩৪) ৱচনতো পঞ্চসু সকদাগামীসু চত্তাৰো ৱজ্জেত্ৱা একোৱ গহিতো. একচ্চো হি ইধ সকদাগামিফলং পত্ৱা ইধেৱ পৰিনিব্বাযতি, একচ্চো ইধ পত্ৱা দেৱলোকে পৰিনিব্বাযতি, একচ্চো দেৱলোকে পত্ৱা তত্থেৱ পৰিনিব্বাযতি, একচ্চো দেৱলোকে পত্ৱা ইধূপপজ্জিত্ৱা পৰিনিব্বাযতি. ইমে চত্তাৰোপি ইধ ন গহিতা. যো পন ইধ পত্ৱা দেৱলোকে যাৱতাযুকং ৱসিত্ৱা পুন ইধূপপজ্জিত্ৱা পৰিনিব্বাযিস্সতি, অযং একোৱ ইধ গহিতোতি ৱেদিতব্বো.

ইদানি তস্স পভেদং দস্সেন্তো ‘‘তীসু পন ৱিমোক্খেসূ’’তিআদিমাহ. ইমস্স পন সকদাগামিনো একবীজিনা সদ্ধিং কিং নানাকৰণন্তি? একবীজিস্স একাৱ পটিসন্ধি, সকদাগামিস্স দ্ৱে পটিসন্ধিযো, ইদং তেসং নানাকৰণং. সুঞ্ঞতৱিমোক্খেন ৱিমুত্তখীণাসৱো পটিপদাৱসেন চতুব্বিধো হোতি, তথা অনিমিত্তঅপ্পণিহিতৱিমোক্খেহীতি এৱং দ্ৱাদস অৰহন্তা হোন্তীতি আহ ‘‘যথা পন সকদাগামিনো, তথেৱ অৰহন্তো দ্ৱাদস ৱেদিতব্বা’’তি. অট্ঠমনৱমদসমানি উত্তানত্থানেৱ.

দুতিযসিক্খাসুত্তাদিৱণ্ণনা নিট্ঠিতা.

১১. সঙ্কৱাসুত্তৱণ্ণনা

৯২. একাদসমে ৱিহাৰপটিবদ্ধনৱকম্মাদিভাৰং হৰতি পৱত্তেতীতি ভাৰহাৰো. তেনেৱাহ ‘‘নৱে আৱাসে সমুট্ঠাপেতি, পুৰাণে পটিজগ্গতী’’তি. সিক্খিতব্বতো সিক্খা, পজ্জিতব্বতো, পজ্জন্তি এতেহীতি ৱা পদানি, সিক্খাযেৱ পদানি সিক্খাপদানীতি আহ ‘‘সিক্খাসঙ্খাতেহি পদেহী’’তি. দস্সেতীতি পচ্চক্খতো দস্সেতি, হত্থামলকং ৱিয পাকটে ৱিভূতে কত্ৱা ৱিভাৱেতি. গণ্হাপেতীতি তে ধম্মে মনসা অনুপক্খিতে দিট্ঠিযা সুপ্পটিৱিদ্ধে কাৰেন্তো উগ্গণ্হাপেতি. সমুস্সাহেতীতি সমাধিম্হি উস্সাহং জনেতি. পটিলদ্ধগুণেহীতি তায দেসনায তন্নিস্সযপচ্চত্তপুৰিসকাৰেন চ তেসং পটিৱিদ্ধগুণেহি. ৱোদাপেতীতি তেসং চিত্তসন্তানং অস্সদ্ধিযাদিকিলেসমলাপগমনেন পভস্সৰং কৰোতি. সণ্হং সণ্হং কথেতীতি অতিৱিয সুখুমং কত্ৱা কথেতি.

অচ্চযনং সাধুমৰিযাদং মদ্দিত্ৱা ৱীতিক্কমনং অচ্চযোতি আহ ‘‘অপৰাধো’’তি. অচ্চেতি অতিক্কমতি এতেনাতি ৱা অচ্চযো, ৱীতিক্কমস্স পৱত্তনকো অকুসলধম্মো. সো এৱ অপৰজ্ঝতি এতেনাতি অপৰাধো. সো হি অপৰজ্ঝন্তং পুৰিসং অধিভৱিত্ৱা পৱত্ততি. তেনাহ ‘‘অতিক্কম্ম অধিভৱিত্ৱা পৱত্তো’’তি. পটিগ্গণ্হাতূতি অধিৱাসনৱসেন সম্পটিচ্ছতূতি অত্থোতি আহ ‘‘খমতূ’’তি. সদেৱকেন লোকেন নিস্সৰণন্তি অৰণীযতো অৰিযো, তথাগতোতি আহ ‘‘অৰিযস্স ৱিনযেতি বুদ্ধস্স ভগৱতো সাসনে’’তি. পুগ্গলাধিট্ঠানং কৰোন্তোতি কামং ‘‘ৱুদ্ধি হেসা’’তি ধম্মাধিট্ঠানৱসেন ৱাক্যং আৰদ্ধং, তথাপি দেসনং পন পুগ্গলাধিট্ঠানং কৰোন্তো ‘‘সংৱৰং আপজ্জতী’’তি আহাতি যোজনা.

সঙ্কৱাসুত্তৱণ্ণনা নিট্ঠিতা.

সমণৱগ্গৱণ্ণনা নিট্ঠিতা.