(৮) ৩. সনিমিত্তৱগ্গৱণ্ণনা

৭৮-৭৯. ততিযস্স পঠমে নিমীযতি এত্থ ফলং অৱসেসপচ্চযেহি পক্খিপীযতি ৱিযাতি নিমিত্তং, কাৰণন্তি আহ ‘‘সনিমিত্তাতি সকাৰণা’’তি. দুতিযাদীসূতি দুতিযসুত্তাদীসু. এসেৱ নযোতি ইমিনা নিদানাদিপদানম্পি কাৰণপৰিযাযমেৱ দীপেতি. নিদদাতি ফলন্তি নিদানং, হিনোতি ফলং পতিট্ঠাতি এতেনাতি হেতু, সঙ্খৰোতি ফলন্তি সঙ্খাৰো, পটিচ্চ এতস্মা ফলং এতীতি পচ্চযো, ৰুপ্পতি নিৰুপ্পতি ফলং এত্থাতি ৰূপন্তি এৱং নিদানাদিপদানম্পি হেতুপৰিযাযতা ৱেদিতব্বা.

৮৪. সত্তমে পচ্চযভূতাযাতি সহজাতাদিপচ্চযভূতায.

৮৭. দসমে সমেচ্চ সম্ভুয্য পচ্চযেহি কতোতি সঙ্খতো, সঙ্খতো ধম্মো আৰম্মণং এতেসন্তি সঙ্খতাৰম্মণা. মগ্গক্খণে ন হোন্তি নাম পহীযন্তীতি কত্ৱা. নাহেসুন্তি এত্থ ‘‘ৱুচ্চন্তী’’তি অজ্ঝাহৰিতব্বং. যাৱ অৰহত্তা দেসনা দেসিতা তংতংসুত্তপৰিযোসানে ‘‘ন হোন্তী’’তি ৱুত্তত্তা.

সনিমিত্তৱগ্গৱণ্ণনা নিট্ঠিতা.