৯. চৰিযসুত্তৱণ্ণনা

৯. নৱমে লোকন্তি সত্তলোকং. সন্ধাৰেন্তীতি আচাৰসন্ধাৰণৱসেন ধাৰেন্তি. ঠপেন্তীতি মৰিযাদাযং ঠপেন্তি. ৰক্খন্তীতি আচাৰসন্ধাৰণেন মৰিযাদাযং ঠপেত্ৱা ৰক্খন্তি. গৰুচিত্তীকাৰৱসেন ন পঞ্ঞাযেথাতি গৰুং কত্ৱা চিত্তে কৰণৱসেন ন পঞ্ঞাযেথ, অযমাচাৰো ন লব্ভেয্য. মাতুচ্ছাতি ৱাতি এত্থ ইতি-সদ্দো আদ্যত্থো. তেন মাতুলানীতি ৱা আচৰিযভৰিযাতি ৱা গৰূনং দাৰাতি ৱাতি ইমে সঙ্গণ্হাতি. তত্থ মাতু ভগিনী মাতুচ্ছা. মাতুলভৰিযা মাতুলানী. গৰূনং দাৰা মহাপিতুচূড়পিতুজেট্ঠভাতুআদীনং গৰুট্ঠানিযানং ভৰিযা. যথা অজেড়কাতিআদীসু অযং সঙ্খেপত্থো – যথা অজেড়কাদযো তিৰচ্ছানা হিৰোত্তপ্পৰহিতা মাতাতি সঞ্ঞং অকত্ৱা ভিন্নমৰিযাদা সব্বত্থ সম্ভেদেন ৱত্তন্তি, এৱমযং মনুস্সলোকো যদি লোকপালধম্মা ন ভৱেয্যুং, সব্বত্থ সম্ভেদেন ৱত্তেয্য. যস্মা পনিমে লোকপালকধম্মা লোকং পালেন্তি, তস্মা নত্থি সম্ভেদোতি.

চৰিযসুত্তৱণ্ণনা নিট্ঠিতা.