(১১) ১. আসাদুপ্পজহৱগ্গৱণ্ণনা

১১৯. ততিযপণ্ণাসকস্স পঠমে দুক্খেন পজহিতব্বাতি দুপ্পজহা. দুচ্চজাতিআদীসুপি এসেৱ নযো. দ্ৱিন্নং আসানং দুচ্চজভাৱো কথং জানিতব্বোতি পঠমং তাৱ লাভাসায দুচ্চজভাৱং ৱিভাৱেতি ‘‘লাভাসাযা’’তিআদিনা. উভতোব্যূড়্হন্তি যুদ্ধত্থায উভতো সন্নিপতিতং. পক্খন্দন্তীতি অনুপ্পৱিসন্তি. জীৱিতাসায দুপ্পজহত্তাতিআদিনা জীৱিতাসায দুচ্চজভাৱং ৱিভাৱেতি.

১২০. দুতিযে দুল্লভাতি ন সুলভা. ইণং দেমীতি সঞ্ঞং কৰোতীতি এৱং সঞ্ঞং কৰোন্তো ৱিয হোতীতি অত্থো. এত্থ চ ‘‘পুব্বকাৰীতি পঠমং উপকাৰস্স কাৰকো. কতঞ্ঞূ কতৱেদীতি তেন কতং ঞত্ৱা পচ্ছা কাৰকো. তেসু পুব্বকাৰী ‘ইণং দেমী’তি সঞ্ঞং কৰোতি, পচ্ছা কাৰকো ‘ইণং জীৰাপেমী’তি সঞ্ঞং কৰোতী’’তি এত্তকমেৱ ইধ ৱুত্তং. পুগ্গলপণ্ণত্তিসংৱণ্ণনাযং (পু. প. অট্ঠ. ৮৩) পন –

‘‘পুব্বকাৰীতি পঠমমেৱ কাৰকো. কতৱেদীতি কতং ৱেদেতি, ৱিদিতং পাকটং কৰোতি. তে অগাৰিযানগাৰিযেহি দীপেতব্বা. অগাৰিকেসু হি মাতাপিতৰো পুব্বকাৰিনো নাম, পুত্তধীতৰো পন মাতাপিতৰো পটিজগ্গন্তা অভিৱাদনাদীনি তেসং কুৰুমানা কতৱেদিনো নাম. অনগাৰিযেসু আচৰিযুপজ্ঝাযা পুব্বকাৰিনো নাম, অন্তেৱাসিকসদ্ধিৱিহাৰিকা আচৰিযুপজ্ঝাযে পটিজগ্গন্তা অভিৱাদনাদীনি চ তেসং কুৰুমানা কতৱেদিনো নাম. তেসং আৱিভাৱত্থায উপজ্ঝাযপোসকসোণত্থেৰাদীনং ৱত্থূনি কথেতব্বানি.

‘‘অপৰো নযো – পৰেন অকতেযেৱ উপকাৰে অত্তনি কতং উপকাৰং অনপেক্খিত্ৱা কাৰকো পুব্বকাৰী, সেয্যথাপি মাতাপিতৰো চেৱ আচৰিযুপজ্ঝাযা চ. সো দুল্লভো সত্তানং তণ্হাভিভূতত্তা. পৰেন কতস্স উপকাৰস্স অনুৰূপপ্পৱত্তিং অত্তনি কতং উপকাৰং উপকাৰতো জানন্তো ৱেদিযন্তো কতঞ্ঞুকতৱেদী সেয্যথাপি মাতাপিতুআচৰিযুপজ্ঝাযেসু সম্মাপটিপন্নো. সোপি দুল্লভো সত্তানং অৱিজ্জাভিভূতত্তা. অপিচ অকাৰণৱচ্ছলো পুব্বকাৰী, সকাৰণৱচ্ছলো কতঞ্ঞুকতৱেদী. ‘কৰিস্সতি মে’তি এৱমাদিকাৰণনিৰপেক্খকিৰিযো পুব্বকাৰী, ‘কৰিস্সতি মে’তি এৱমাদিকাৰণসাপেক্খকিৰিযো কতঞ্ঞুকতৱেদী. তমোজোতিপৰাযণো পুব্বকাৰী, জোতিজোতিপৰাযণো কতঞ্ঞুকতৱেদী. দেসেতা পুব্বকাৰী, পটিপজ্জিতা কতঞ্ঞুকতৱেদী. সদেৱকে লোকে অৰহং সম্মাসম্বুদ্ধো পুব্বকাৰী, অৰিযসাৱকো কতঞ্ঞুকতৱেদী’’তি ৱুত্তং.

তত্থ কাৰণেন ৱিনা পৱত্তহিতচিত্তো অকাৰণৱচ্ছলো. অনাগতম্হি পযোজনং অপেক্খমানো ‘‘কৰিস্সতি মে’’তিআদিনা চিত্তেন পঠমং গহিতং তাদিসং কতং উপাদায কতঞ্ঞূ এৱ নাম হোতি, ন পুব্বকাৰীতি অধিপ্পাযেন ‘‘কৰিস্সতি মেতি এৱমাদিকাৰণসাপেক্খকিৰিযো কতঞ্ঞুকতৱেদী’’তি ৱুত্তং. তমোজোতিপৰাযণো পুঞ্ঞফলানি অনুপজীৱন্তো এৱ পুঞ্ঞানি কৰোতীতি ‘‘পুব্বকাৰী’’তি ৱুত্তো. পুঞ্ঞফলং উপজীৱন্তো হি কতঞ্ঞুপক্খে তিট্ঠতি.

১২১. ততিযে তিত্তোতি সুহিতো পৰিযোসিতো নিট্ঠিতকিচ্চতায নিৰুস্সুক্কো. গুণপাৰিপূৰিযা হি পৰিপুণ্ণো যাৱদত্থো ইধ তিত্তো ৱুত্তো. তপ্পেতাতি অঞ্ঞেসম্পি তিত্তিকৰো. পচ্চেকবুদ্ধো চ তথাগতসাৱকো চ খীণাসৱো তিত্তোতি এত্থ পচ্চেকবুদ্ধো নৱলোকুত্তৰধম্মেহি সযং তিত্তো পৰিপুণ্ণো, অঞ্ঞং পন তপ্পেতুং ন সক্কোতি. তস্স হি ধম্মকথায অভিসমযো ন হোতি, সাৱকানং পন ধম্মকথায অপৰিমাণানং দেৱমনুস্সানং অভিসমযো হোতি. এৱং সন্তেপি যস্মা তে ধম্মং দেসেন্তা ন অত্তনো ৱচনং কত্ৱা কথেন্তি, বুদ্ধানং ৱচনং কত্ৱা কথেন্তি, সোতুং নিসিন্নপৰিসাপি – ‘‘অযং ভিক্খু ন অত্তনা পটিৱিদ্ধং ধম্মং কথেতী’’তি চিত্তীকাৰং কৰোতি. ইতি সো চিত্তীকাৰো বুদ্ধানংযেৱ হোতি. এৱং তত্থ সম্মাসম্বুদ্ধোৱ তপ্পেতা নাম. যথা হি ‘‘অসুকস্স নাম ইদঞ্চিদঞ্চ দেথা’’তি ৰঞ্ঞা আণত্তে কিঞ্চাপি আনেত্ৱা দেন্তি, অথ খো ৰাজাৱ তত্থ দাযকো. যেহিপি লদ্ধং হোতি, তে ‘‘ৰঞ্ঞা অম্হাকং ঠানন্তৰং দিন্নং, ইস্সৰিযৱিভৱো দিন্নো’’ত্ৱেৱ গণ্হন্তি, ন ‘‘ৰাজপুৰিসেহী’’তি এৱংসম্পদমিদং ৱেদিতব্বং.

১২২. চতুত্থে দুত্তপ্পযাতি অতপ্পযা, ন সক্কা কেনচি তপ্পেতুং. যো হি উপট্ঠাককুলং ৱা ঞাতিকুলং ৱা নিস্সায ৱসমানো চীৱৰে জিণ্ণে তেহি দিন্নং চীৱৰং নিক্খিপতি, ন পৰিভুঞ্জতি. পুনপ্পুনং দিন্নম্পি গহেত্ৱা নিক্খিপতেৱ. যো চ তেনেৱ নযেন লদ্ধং লদ্ধং ৱিস্সজ্জেতি, পৰস্স দেতি, পুনপ্পুনং লদ্ধম্পি তথেৱ কৰোতি. ইমে দ্ৱে পুগ্গলা সকটেহিপি পচ্চযে উপনেন্তেন তপ্পেতুং ন সক্কাতি দুত্তপ্পযা.

১২৩. পঞ্চমে ন ৱিস্সজ্জেতীতি অত্তনো অকত্ৱা পৰস্স ন দেতি, অতিৰেকে পন সতি ন নিক্খিপতি, পৰস্স দেতি. তেনেৱাহ ‘‘সব্বংযেৱ পৰেসং ন দেতী’’তিআদি. ইদং ৱুত্তং হোতি ‘‘যো ভিক্খু উপট্ঠাককুলা ৱা ঞাতিকুলা ৱা জিণ্ণচীৱৰো সাটকং লভিত্ৱা চীৱৰং কত্ৱা পৰিভুঞ্জতি ন নিক্খিপতি, অগ্গড়ং দত্ৱা পাৰুপন্তোপি পুনপি দিয্যমানে সহসা নপ্পটিগ্গণ্হাতি. যো চ লদ্ধং লদ্ধং অত্তনা পৰিভুঞ্জতি, পৰেসং ন দেতি. ইমে দ্ৱেপি সুখেন সক্কা তপ্পেতুন্তি সুতপ্পযা’’তি.

১২৪-১২৭. ছট্ঠসত্তমাদীনি উত্তানত্থানেৱ.

আসাদুপ্পজহৱগ্গৱণ্ণনা নিট্ঠিতা.