৯. পঠমঅৰিযাৱাসসুত্তৱণ্ণনা

১৯. নৱমে অৰিযানং এৱ আৱাসাতি অৰিযাৱাসা অনৰিযানং তাদিসানং অসম্ভৱতো. অৰিযাতি চেত্থ উক্কট্ঠনিদ্দেসেন খীণাসৱা গহিতা. তে চ যস্মা তেহি সব্বকালং অৱিজহিতৱাসা এৱ, তস্মা ৱুত্তং ‘‘তে আৱসিংসু আৱসন্তি আৱসিস্সন্তী’’তি. তত্থ আৱসিংসূতি নিস্সায আৱসিংসু. পঞ্চঙ্গৱিপ্পহীনতাদযো হি অৰিযানং অপস্সযা. তেসু পঞ্চঙ্গৱিপ্পহানপচ্চেকসচ্চপনোদনএসনাওসট্ঠানি, ‘‘সঙ্খাযেকং পটিসেৱতি, অধিৱাসেতি পৰিৱজ্জেতি ৱিনোদেতী’’তি (দী. নি. ৩.৩০৮; ম. নি. ২.১৬৮; অ. নি. ১০.২০) ৱুত্তেসু অপস্সেনেসু ৱিনোদনঞ্চ মগ্গকিচ্চানেৱ, ইতৰে মগ্গেন চ সমিজ্ঝন্তীতি.

পঠমঅৰিযাৱাসসুত্তৱণ্ণনা নিট্ঠিতা.