৯-১০. কোকালিকসুত্তাদিৱণ্ণনা

৮৯-৯০. নৱমে (সং. নি. টী. ১.১.১৮১) কোকালিকনামকা দ্ৱে ভিক্খূ. ততো ইধাধিপ্পেতং নিদ্ধাৰেত্ৱা দস্সেতুং ‘‘কোযং কোকালিকো’’তি পুচ্ছা. সুত্তস্স অট্ঠুপ্পত্তিং দস্সেতুং ‘‘কস্মা চ উপসঙ্কমী’’তি পুচ্ছা. অযং কিৰাতিআদি যথাক্কমং তাসং ৱিস্সজ্জনং. ৱিৱেকৱাসং ৱসিতুকামত্তা অপ্পিচ্ছতায চ মা নো কস্সচি…পে… ৱসিংসু. আঘাতং উপ্পাদেসি অত্তনো ইচ্ছাৱিঘাতনতো. থেৰা ভিক্খুসঙ্ঘস্স নিয্যাদযিংসু পযুত্তৱাচায অকতত্তা থেৰেহি চ অদাপিতত্তা. পুব্বেপি…পে… মঞ্ঞেতি ইমিনা থেৰানং কোহঞ্ঞে ঠিতভাৱং আসঙ্কতি অৱণে ৱণং পস্সন্তো ৱিয, সুপৰিসুদ্ধে আদাসতলে জল্লং উট্ঠাপেন্তো ৱিয চ.

অপৰজ্ঝিত্ৱাতি ভগৱতো সম্মুখা ‘‘পাপভিক্খূ জাতা’’তি ৱত্ৱা. মহাসাৱজ্জদস্সনত্থন্তি মহাসাৱজ্জভাৱদস্সনত্থং, অযমেৱ ৱা পাঠো. মাহেৱন্তি মা এৱমাহ, মা এৱং ভণি. সদ্ধায অযো উপ্পাদো সদ্ধাযো, তং আৱহতীতি সদ্ধাযিকোতি আহ ‘‘সদ্ধায আগমকৰো’’তি. সদ্ধাযিকোতি ৱা সদ্ধায অযিতব্বো, সদ্ধেয্যোতি অত্থো. তেনাহ ‘‘সদ্ধাতব্বৱচনো ৱা’’তি.

পীড়কা নাম বাহিৰতো পট্ঠায অট্ঠীনি ভিন্দন্তি, ইমা পন পঠমংযেৱ অট্ঠীনি ভিন্দিত্ৱা উগ্গতা. তেনাহ ‘‘অট্ঠীনি ভিন্দিত্ৱা উগ্গতাহি পিড়কাহী’’তি. তৰুণবেলুৱমত্তিযোতি তৰুণবিল্লফলমত্তিযো. ৱিসগিলিতোতি খিত্তপহৰণো. তঞ্চ বড়িসং ৱিসসমঞ্ঞা লোকে. আৰক্খদেৱতানং সদ্দং সুত্ৱাতি পদং আনেত্ৱা সম্বন্ধো.

ব্ৰহ্মলোকেতি সুদ্ধাৱাসলোকে. ৱৰাকোতি অনুগ্গহৱচনমেতং. হীনপৰিযাযোতি কেচি. পিযসীলাতি ইমিনা এতস্মিং অত্থে নিৰুত্তিনযেন পেসলাতি পদসিদ্ধীতি দস্সেতি. কবৰক্খীনীতি ব্যাধিবলেন পৰিভিন্নৱণ্ণতায কবৰভূতানি অক্খীনি. যত্তকন্তি ভগৱতো ৱচনং অঞ্ঞথা কৰোন্তেন যত্তকং তযা অপৰদ্ধং, তস্স পমাণং নত্থীতি অত্থো. যস্মা অনাগামিনো নাম পহীনকামচ্ছন্দব্যাপাদা হোন্তি, ত্ৱঞ্চ দিট্ঠিকামচ্ছন্দব্যাপাদৱসেন ইধাগতো, তস্মা যাৱঞ্চ তে ইদং অপৰদ্ধন্তি এৱমেত্থ অত্থো দট্ঠব্বো.

অদিট্ঠিপ্পত্তোতি অপ্পত্তদিট্ঠিকো. গিলিতৱিসো ৱিয ৱিসং গিলিত্ৱা ঠিতো ৱিয. কুঠাৰিসদিসা মূলপচ্ছিন্দনট্ঠেন. উত্তমত্থেতি অৰহত্তে. খীণাসৱোতি ৱদতি সুনক্খত্তো ৱিয অচেলং কোৰক্খত্তিযং. যো অগ্গসাৱকো ৱিয পসংসিতব্বো খীণাসৱো, তং ‘‘দুস্সীলো অয’’ন্তি ৱদতি. ৱিচিনাতীতি আচিনোতি পসৱতি. পসংসিযনিন্দা তাৱ সম্পন্নগুণপৰিধংসনৱসেন পৱত্তিযা সাৱজ্জতায কটুকৱিপাকা, নিন্দিযপ্পসংসা পন কথং তায সমৱিপাকাতি? তত্থ অৱিজ্জমানগুণসমাৰোপনেন অত্তনো পৰেসঞ্চ মিচ্ছাপটিপত্তিহেতুভাৱতো পসংসিযেন তস্স সমভাৱকৰণতো চ. লোকেপি হি অসূৰং সূৰেন সমং কৰোন্তো গাৰয্হো হোতি, পগেৱ দুপ্পটিপন্নং সুপ্পটিপন্নেন সমং কৰোন্তোতি.

সকেন ধনেনাতি অত্তনো সাপতেয্যেন. অযং অপ্পমত্তকো অপৰাধো দিট্ঠধম্মিকত্তা সপ্পতিকাৰত্তা চ তস্স. অযং মহন্ততৰো কলি কতূপচিতস্স সম্পৰাযিকত্তা অপ্পতিকাৰত্তা চ.

নিৰব্বুদোতি গণনাৱিসেসো এসোতি আহ ‘‘নিৰব্বুদগণনাযা’’তি, সতসহস্সং নিৰব্বুদানন্তি অত্থো. যমৰিযগৰহী নিৰযং উপেতীতি এত্থ যথাৱুত্তআযুপ্পমাণং পাকতিকৱসেন অৰিযূপৱাদিনা ৱুত্তন্তি ৱেদিতব্বং. অগ্গসাৱকানং পন গুণমহন্ততায ততোপি অতিৱিয মহন্ততৰমেৱাতি ৱদন্তি.

অথ খো ব্ৰহ্মা সহম্পতীতি কো অযং ব্ৰহ্মা, কস্মা চ পন ভগৱন্তং উপসঙ্কমিত্ৱা এতদৱোচাতি? অযং কস্সপস্স ভগৱতো সাসনে সহকো নাম ভিক্খু অনাগামী হুত্ৱা সুদ্ধাৱাসেসু উপ্পন্নো, তত্থ সহম্পতি ব্ৰহ্মাতি সঞ্জানন্তি. সো পনাহং ভগৱন্তং উপসঙ্কমিত্ৱা ‘‘পদুমনিৰযং কিত্তেস্সামি, ততো ভগৱা ভিক্খূনং আৰোচেস্সতি, অথানুসন্ধিকুসলা ভিক্খূ তত্থাযুপ্পমাণং পুচ্ছিস্সন্তি, ভগৱা আচিক্খন্তো অৰিযূপৱাদে আদীনৱং পকাসেস্সতী’’তি ইমিনা কাৰণেন ভগৱন্তং উপসঙ্কমিত্ৱা এতদৱোচ.

মগধৰট্ঠে সংৱোহাৰতো মাগধকো পত্থো, তেন. পচ্চিতব্বট্ঠানস্সাতি নিৰযদুক্খেন পচ্চিতব্বপ্পদেসস্স এতং অব্বুদোতি নামং. ৱস্সগণনাতি একতো পট্ঠায দসগুণিতং অব্বুদআযুম্হি ততো অপৰং ৱীসতিগুণিতং নিৰব্বুদাদীসু ৱস্সগণনা ৱেদিতব্বা. অযঞ্চ গণনা অপৰিচিতানং দুক্কৰাতি ৱুত্তং ‘‘ন তং সুকৰং সঙ্খাতু’’ন্তি. কেচি পন ‘‘তত্থ তত্থ পৰিদেৱনানত্তেন কম্মকাৰণনানত্তেনপি ইমানি নামানি লদ্ধানী’’তি ৱদন্তি, অপৰে ‘‘সীতনৰকা এতে’’তি. সব্বত্থাতি অববাদীসু পদুমপৰিযোসানেসু সব্বেসু নিৰযেসু. এস নযোতি হেট্ঠিমতো উপৰিমস্স ৱীসতিগুণতং অতিদিসতি. দসমে নত্থি ৱত্তব্বং.

কোকালিকসুত্তাদিৱণ্ণনা নিট্ঠিতা.

থেৰৱগ্গৱণ্ণনা নিট্ঠিতা.