১৫. অট্ঠানপাড়ি (দুতিযৱগ্গ)

(১৫) ২. অট্ঠানপাড়ি-দুতিযৱগ্গৱণ্ণনা

২৭৮. ৱিৱাদুপচ্ছেদতোতি ৱিৱাদুপচ্ছেদকাৰণা. দ্ৱীসু উপ্পন্নেসু যো ৱিৱাদো ভৱেয্য, তস্স অনুপ্পাদোযেৱেত্থ ৱিৱাদুপচ্ছেদো. একস্মিং দীপেতিআদিনা দীপন্তৰেপি একজ্ঝং ন উপ্পজ্জতি, পগেৱ একদীপেতি দস্সেতি. সোপি পৰিহাযেথাতি চক্কৱাড়স্স পদেসে এৱ পৱত্তিতব্বত্তা পৰিহাযেয্য.

২৭৯-২৮০. মনুস্সত্তন্তি মনুস্সভাৱো তস্সেৱ পব্বজ্জাদিগুণানং যোগ্গভাৱতো. লিঙ্গসম্পত্তীতি পুৰিসভাৱো. হেতূতি মনোৱচীপণিধানপুব্বিকা হেতুসম্পদা. সত্থাৰদস্সনন্তি সত্থুসম্মুখীভাৱো. পব্বজ্জাতি কম্মকিৰিযৱাদীসু তাপসেসু, ভিক্খূসু ৱা পব্বজ্জা. গুণসম্পত্তীতি অভিঞ্ঞাদিগুণসম্পদা. অধিকাৰোতি বুদ্ধে উদ্দিস্স অধিকো কাৰো, সৱিসেসা উপকাৰকিৰিযা অধিকো সক্কাৰোতি ৱুত্তং হোতি. ছন্দোৱ ছন্দতা, সম্মাসম্বোধিং উদ্দিস্স সাতিসযো কত্তুকম্যতাকুসলচ্ছন্দো. অট্ঠধম্মসমোধানাতি এতেসং অট্ঠন্নং ধম্মানং সমাযোগেন. অভিনীহাৰোতি কাযপণিধানং. সমিজ্ঝতীতি নিপ্ফজ্জতি. অযমেত্থ সঙ্খেপো, ৱিত্থাৰো পন পৰমত্থদীপনিযা চৰিযাপিটকৱণ্ণনায (চৰিযা. অট্ঠ. পকিণ্ণককথা) ৱুত্তনযেন ৱেদিতব্বো. সব্বাকাৰপৰিপূৰমেৱাতি পৰিপুণ্ণলক্খণতায সত্তুত্তমাদীহি সব্বাকাৰেন সম্পন্নমেৱ. ন হি ইত্থিযা কোসোহিতৱত্থগুয্হতাদি সম্ভৱতি. দুতিযপকতি চ নাম পঠমপকতিতো নিহীনা এৱ. তেনেৱাহ – অনন্তৰৱাৰে ‘‘যস্মা’’তিআদি.

২৮১. ইধ পুৰিসস্স তত্থ নিব্বত্তনতোতি ইমস্মিং মনুস্সলোকে পুৰিসভূতস্স তত্থ ব্ৰহ্মলোকে ব্ৰহ্মত্তভাৱেন নিব্বত্তনতো. তেন অসতিপি পুৰিসলিঙ্গে পুৰিসাকাৰা ব্ৰহ্মানো হোন্তীতি দস্সেতি. তংযেৱ চ পুৰিসাকাৰং সন্ধায ৱুত্তং ভগৱতা ‘‘যং পুৰিসো ব্ৰহ্মত্তং কাৰেয্যা’’তি. তেনেৱাহ – ‘‘সমানেপী’’তিআদি. যদি এৱং ইত্থিযো ব্ৰহ্মলোকে ন উপ্পজ্জেয্যুন্তি আহ – ‘‘ব্ৰহ্মত্ত’’ন্তিআদি.

২৯০-২৯৫. ‘‘কাযদুচ্চৰিতস্সা’’তিআদিপাড়িযা কম্মনিযামো নাম কথিতো. সমঞ্জনং সমঙ্গো, সমন্নাগমো, সো এতস্স অত্থীতি সমঙ্গী, সমন্নাগতো, সমঞ্জনসীলো ৱা সমঙ্গী, পুব্বভাগে উপকৰণসমুদাযতো পভুতি আযূহনৱসেন আযূহনসমঙ্গীতা, সন্নিট্ঠাপকচেতনাৱসেন চেতনাসমঙ্গিতা. চেতনাসন্ততিৱসেন ৱা আযূহনসমঙ্গিতা, তংতংচেতনাক্খণৱসেন চেতনাসমঙ্গীতা. কতূপচিতস্স অৱিপক্কৱিপাকস্স কম্মস্স ৱসেন কম্মসমঙ্গিতা. কম্মে পন ৱিপচ্চিতুং আৰদ্ধে ৱিপাকপ্পৱত্তিৱসেন ৱিপাকসমঙ্গিতা. কম্মাদীনং উপট্ঠানকালৱসেন উপট্ঠানসমঙ্গিতা. কুসলাকুসলকম্মাযূহনক্খণেতি কুসলকম্মস্স অকুসলকম্মস্স চ সমীহনক্খণে. তথাতি ইমিনা কুসলাকুসলকম্মপদং আকড্ঢতি. যথা কতং কম্মং ফলদানসমত্থং হোতি, তথা কতং উপচিতং. ৱিপাকাৰহন্তি দুতিযভৱাদীসু ৱিপচ্চনাৰহং. উপ্পজ্জমানানং উপপত্তিনিমিত্তং উপট্ঠাতীতি যোজনা. উপপত্তিযা উপ্পজ্জনস্স নিমিত্তং কাৰণন্তি উপপত্তিনিমিত্তং, কম্মং, কম্মনিমিত্তং, গতিনিমিত্তঞ্চ. অট্ঠকথাযং পন গতিনিমিত্তৱসেনেৱ যোজনা দস্সিতা. কম্মকম্মনিমিত্তানম্পি উপট্ঠানং যথাৰহং দট্ঠব্বং. ‘‘যানিস্স তানি পুব্বে কতানি কম্মানি, তানিস্স তস্মিং সমযে ওলম্বন্তি অজ্ঝোলম্বন্তি অভিলম্বন্তি’’তি (ম. নি. ৩.২৪৮) ৱচনতো সাযন্হে মহন্তানং পব্বতকূটানং ছাযা ৱিয আসন্নমৰণস্স সত্তস্স চিত্তে সুপিনে ৱিয ৱিপচ্চিতুং কতোকাসং কম্মং, তস্স নিমিত্তং গতিনিমিত্তং উপতিট্ঠতেৱ. চলতীতি পৰিৱত্ততি. একেন হি কম্মুনা তজ্জে নিমিত্তে উপট্ঠিতে পচ্চযৱিসেসৱসেন ততো অঞ্ঞেন কম্মুনা তদঞ্ঞস্স নিমিত্তস্স উপট্ঠানং পৰিৱত্তনং. সেসা নিচ্চলা অৱসেসা চতুব্বিধাপি সমঙ্গিতা নিচ্চলা অপৰিৱত্তনতো.

সুনখৱাজিকোতি সুনখেহি মিগৱাজৱসেন ৱজনসীলো, সুনখলুদ্দকোতি অত্থো. তলসন্থৰণপূজন্তি ভূমিতলস্স পুপ্ফেহি সন্থৰণপূজং. আযূহনচেতনা কম্মসমঙ্গিতাৱসেনাতি কাযদুচ্চৰিতস্স অপৰাপৰং আযূহনেন সন্নিট্ঠাপকচেতনায তস্সেৱ পকপ্পনে কম্মক্খযকৰঞাণেন অখেপিতত্তা যথূপচিতকম্মুনা চ সমঙ্গিভাৱস্স ৱসেন.

কম্মন্তি অকুসলকম্মং. তস্মিংযেৱ খণেতি আযূহনক্খণেযেৱ. তস্সাতি কম্মসমঙ্গিনো পুগ্গলস্স সগ্গো ৱাৰিতো, তঞ্চে কম্মং ৱিপাকৱাৰং লভেয্যাতি অধিপ্পাযো. সগ্গো ৱাৰিতোতি চ নিদস্সনমত্তং. মনুস্সলোকোপিস্স ৱাৰিতোৱাতি. অপৰে পন পুৰিমেহি ৱিপাকাৱৰণস্স অনুদ্ধটত্তা ‘‘তস্মিংযেৱ খণে’’তি চ অৱিসেসেন ৱুত্তত্তা তং দোসং পৰিহৰিতুং ‘‘আযূহিতকম্মং নামা’’তিআদিমাহ. যদা কম্মং ৱিপাকৱাৰং লভতীতি ইদং কতোকাসস্স অপ্পটিবাহিযত্তা ৱুত্তং. তথা হি ভগৱা ততিযপাৰাজিকৱত্থুস্মিং (পাৰা. ১৬২ আদযো) পটিসল্লীযি, ইমস্মিং সুত্তে ‘‘কাযদুচ্চৰিতসমঙ্গী’’তি আগতত্তা ৱিপাকূপট্ঠানসমঙ্গিতা ন লব্ভন্তি.

(দুতিযৱগ্গৱণ্ণনা নিট্ঠিতা.)

অট্ঠানপাড়িৱণ্ণনাযং অনুত্তানত্থদীপনা নিট্ঠিতা.