৫. পঞ্চমো পৰিচ্ছেদো

ভূমিপুগ্গলচিত্তুপ্পত্তিনিদ্দেসো

১৮২. ইতো পৰং পৱক্খামি, বুদ্ধিৱুদ্ধিকৰং নযং;

চিত্তানং ভূমীসুপ্পত্তিং, পুগ্গলানং ৱসেন চ.

১৮৩. দেৱাচেৱ মনুস্সা চ, তিস্সো ৱাপাযভূমিযো;

গতিযো পঞ্চ নিদ্দিট্ঠা, সত্থুনা তু তযো ভৱা.

১৮৪. ভূমিযো তত্থ তিংসেৱ, তাসু তিংসেৱ পুগ্গলা;

ভূমীস্ৱেতাসু উপ্পন্না, সব্বে চ পন পুগ্গলা.

১৮৫. পটিসন্ধিকচিত্তানং, ৱসেনেকূনৱীসতি;

পটিসন্ধি চ নামেসা, দুৱিধা সমুদীৰিতা.

১৮৬. অচিত্তকা সচিত্তা চ, অসঞ্ঞীনমচিত্তকা;

সেসা সচিত্তকা ঞেয্যা, সা পনেকূনৱীসতি.

১৮৭. পটিসন্ধিৱসেনেৱ, হোন্তি ৱীসতি পুগ্গলা;

ইধ চিত্তাধিকাৰত্তা, অচিত্তা ন চ উদ্ধটা.

১৮৮. অহেতুদ্ৱিতিহেতূতি, পুগ্গলা তিৱিধা সিযুং;

অৰিযা পন অট্ঠাতি, সব্বে একাদসেৰিতা.

১৮৯. এতেসং পন সব্বেসং, পুগ্গলানং পভেদতো;

চিত্তানং ভূমীসুপ্পত্তিং, ভণতো মে নিবোধথ.

১৯০. তিংসভূমীসু চিত্তানি, কতি জাযন্তি মে ৱদ;

চুদ্দসেৱ তু চিত্তানি, হোন্তি সব্বাসু ভূমিসু.

১৯১. সদা ৱীসতি চিত্তানি, কামেযেৱ ভৱে সিযুং;

পঞ্চ ৰূপভৱেযেৱ, চত্তাৰেৱ অৰূপিসু.

১৯২. কামৰূপভৱেস্ৱেৱ, অট্ঠাৰস ভৱন্তি হি;

দ্ৱেচত্তালীস চিত্তানি, হোন্তি তীসু ভৱেসুপি.

১৯৩. ঠপেত্ৱা পন সব্বাসং, চতস্সোপাযভূমিযো;

তেৰসেৱ চ চিত্তানি, হোন্তি ছব্বীসভূমিসু.

১৯৪. অপৰানি চতস্সোপি, ঠপেত্ৱাৰুপ্পভূমিযো;

চিত্তানি পন জাযন্তি, ছ চ ছব্বীসভূমিসু.

১৯৫. সুদ্ধাৱাসিকদেৱানং, ঠপেত্ৱা পঞ্চ ভূমিযো;

পঞ্চ চিত্তানি জাযন্তে, পঞ্চৱীসতিভূমিসু.

১৯৬. অপৰানি দুৱে হোন্তি, পঞ্চৱীসতিভূমিসু;

ঠপেত্ৱা নেৱসঞ্ঞঞ্চ, চতস্সোপাযভূমিযো.

১৯৭. দ্ৱেপি চিত্তানি জাযন্তি, চতুৱীসতিভূমিসু;

আকিঞ্চঞ্ঞং নেৱসঞ্ঞঞ্চ, ঠপেত্ৱাপাযভূমিযো.

১৯৮. অপাযভূমিযো হিত্ৱা, তিস্সো আৰুপ্পভূমিযো;

দ্ৱেযেৱ পন চিত্তানি, হোন্তি তেৱীসভূমিসু.

১৯৯. অৰূপে চ অপাযে চ, ঠপেত্ৱা অট্ঠ ভূমিযো;

একাদসৱিধং চিত্তং, হোন্তি দ্ৱাৱীসভূমিসু.

২০০. সুদ্ধাৱাসে অপাযে চ, ঠপেত্ৱা নৱ ভূমিযো;

একৱীসাসু নিচ্চম্পি, চত্তাৰোৱ ভৱন্তি হি.

২০১. একং সত্তৰসস্ৱেৱ, চিত্তং জাযতি ভূমিসু;

সুদ্ধাৱাসে ঠপেত্ৱা তু, অপাযাৰুপ্পভূমিযো.

২০২. দ্ৱাদসেৱ তু জাযন্তে, একাদসসু ভূমিসু;

ঠপেত্ৱা পন সব্বাপি, ভূমিযো হি মহগ্গতা.

২০৩. কামাৱচৰদেৱানং, মনুস্সানং ৱসেন তু;

অট্ঠ চিত্তানি জাযন্তে, সদা সত্তসু ভূমিসু.

২০৪. পঞ্চমজ্ঝানপাকেকো, জাযতে ছসু ভূমিসু;

চত্তাৰি পন চিত্তানি, তীসু তীস্ৱেৱ ভূমিসু.

২০৫. চত্তাৰি পন চিত্তানি, হোন্তি একেকভূমিসু;

অৰূপাৱচৰপাকানং, ৱসেন পৰিদীপযে.

২০৬. কুসলাকুসলা কামে,

তেসং পাকা অহেতুকা;

আৱজ্জনদ্ৱযঞ্চাতি,

সত্ততিংসেৱ মানসা.

২০৭. নৰকাদীস্ৱপাযেসু, চতূসুপি চ জাযৰে;

দ্ৱেপঞ্ঞাসাৱসেসানি, নুপ্পজ্জন্তি কদাচিপি.

২০৮. কামে দেৱমনুস্সানং, নৱ পাকা মহগ্গতা;

নেৱ জাযন্তি জাযন্তি, অসীতি হদযা সদা.

২০৯. কামে অট্ঠ মহাপাকা, দোমনস্সদ্ৱযম্পি চ;

তথা ঘানাদিৱিঞ্ঞাণ-ত্তযং পাকা অপুঞ্ঞজা.

২১০. নত্থি আৰুপ্পপাকা চ, ৰূপাৱচৰভূমিযং;

ইমেহি সহ চিত্তেহি, তযো মগ্গা ফলদ্ৱযং.

২১১. চত্তাৰো দিট্ঠিসংযুত্তা, ৱিচিকিচ্ছাযুতম্পি চ;

চত্তাৰো হেট্ঠিমা পাকা, সুদ্ধাৱাসে ন লব্ভৰে.

২১২. সেসানি একপঞ্ঞাস, চিত্তানি পন লব্ভৰে;

ৰূপাৱচৰিকা সব্বে, ৱিপাকা কামধাতুযা.

২১৩. দোমনস্সাদিমগ্গো চ, ক্ৰিযা চ দ্ৱে অহেতুকা;

তেচত্তালীস চিত্তানি, নত্থি আৰুপ্পভূমিযং.

২১৪. এৱং ভূমিৱসেনেৱ, চিত্তুপ্পত্তিং ৱিভাৱযে;

তথা একাদসন্নম্পি, পুগ্গলানং ৱসেন চ.

২১৫. কুসলাকুসলা কামে,

তেসং পাকা অহেতুকা;

আৱজ্জনদ্ৱযঞ্চাতি,

সত্ততিংসেৱ মানসা.

২১৬. অহেতুকস্স সত্তস্স, জাযন্তে পঞ্চভূমিসু;

দ্ৱেপঞ্ঞাসাৱসেসানি, ন জাযন্তি কদাচিপি.

২১৭. অহেতুকস্স ৱুত্তেহি, কামপাকা দুহেতুকা;

দুহেতুকস্স জাযন্তে, চত্তালীসং তথেককং.

২১৮. সব্বে মহগ্গতা চেৱ, সব্বেপি চ অনাসৱা;

তিহেতুকা ৱিপাকা চ, কামে নৱ ক্ৰিযাপি চ.

২১৯. দুহেতুনো ন জাযন্তি, চত্তালীসং তথাট্ঠ চ;

কামাৱচৰসত্তস্স, তিহেতুপটিসন্ধিনো.

২২০. পুথুজ্জনস্স জাযন্তে, চতুপঞ্ঞাস মানসা;

দ্ৱিহেতুকস্স ৱুত্তানি, চত্তালীসং তথেককং.

২২১. চত্তাৰো ঞাণসংযুত্তা, ৱিপাকা কামধাতুযা;

ৰূপাৰূপেসু পুঞ্ঞানি, চতুপঞ্ঞাস মানসা.

২২২. পুথুজ্জনস্স জাযন্তে, পঞ্চতিংস ন জাযৰে;

ছদেৱেসু মনুস্সেসু, সোতাপন্নস্স দেহিনো.

২২৩. পঞ্ঞাসেৱস্স চিত্তানি, জাযন্তীতি ৱিনিদ্দিসে;

নৱতিংসেৱ চিত্তানি, নুপ্পজ্জন্তীতি দীপযে.

২২৪. সোতাপন্নস্স ৱুত্তানি, ঠপেত্ৱা পঠমং ফলং;

অত্তনোৱ ফলেনস্স, সকদাগামিনো সিযুং.

২২৫. সোতাপন্নস্স ৱুত্তানি, ঠপেত্ৱা পটিঘদ্ৱযং;

দুতিযং চ ফলং হিত্ৱা, যানি চিত্তানি তানিতি;

অনাগামিস্স সত্তস্স, জাযন্তীতি ৱিনিদ্দিসে.

২২৬. কতি চিত্তানি জাযন্তে, কামে অৰহতো পন;

চত্তাৰীসঞ্চ চত্তাৰি, কামে অৰহতো সিযুং.

২২৭. মগ্গট্ঠানং চতুন্নম্পি, পুগ্গলানং সকং সকং;

মগ্গচিত্তং সিযা তেসং, একচিত্তক্খণা হি তে.

২২৮. পুথুজ্জনস্স তীস্ৱেৱ, পঠমজ্ঝানভূমিসু;

পঞ্চতিংসেৱ চিত্তানি, জাযন্তেতি ৱিনিদ্দিসে.

২২৯. ঘানাদীসু চ ৱিঞ্ঞাণ-ত্তযং সত্ত অপুঞ্ঞজা;

মহাপাকা তথা পাকা, উপৰিজ্ঝানভূমিকা.

২৩০. ৱিপাকাপি চ আৰুপ্পা, দোমনস্সদ্ৱযম্পি চ;

অট্ঠাৰস ক্ৰিযা চেৱ, অট্ঠ লোকুত্তৰানি চ.

২৩১. পঠমজ্ঝাননিব্বত্ত-পুথুজ্জনসৰীৰিনো;

এতানি চতুপঞ্ঞাস, চিত্তানি ন চ লব্ভৰে.

২৩২. সোতাপন্নস্স চিত্তানি, তত্থেকতিংস জাযৰে;

পুথুজ্জনস্স ৱুত্তেসু, হিত্ৱা চাপুঞ্ঞপঞ্চকং.

২৩৩. সকদাগামিনো তত্থ, ঠপেত্ৱা পঠমং ফলং;

একতিংসেৱ জাযন্তে, পক্খিপিত্ৱা সকং ফলং.

২৩৪. অনাগামিস্স তত্থেৱ, ঠপেত্ৱা দুতিযং ফলং;

একতিংসেৱ জাযন্তে, ফলচিত্তেন অত্তনো.

২৩৫. ৱিঞ্ঞাণং চক্খুসোতানং, পুঞ্ঞজং সম্পটিচ্ছনং;

সন্তীৰণদ্ৱযঞ্চেৱ, ক্ৰিযচিত্তানি ৱীসতি.

২৩৬. অৰহত্তফলং পাকো, পঠমজ্ঝানসম্ভৱো;

সত্তৱীসতি চিত্তানি, অৰহন্তস্স জাযৰে.

২৩৭. পুথুজ্জনস্স তীস্ৱেৱ, দুতিযজ্ঝানভূমিসু;

ছত্তিংস দুতিযজ্ঝান-ততিযজ্ঝানপাকতো.

২৩৮. পুথুজ্জনস্স ৱুত্তেসু, হিত্ৱা ৱাপুঞ্ঞপঞ্চকং;

সোতাপন্নস্স বাত্তিংস, ফলেন সহ অত্তনো.

২৩৯. সোতাপন্নস্স ৱুত্তেসু, ঠপেত্ৱা পঠমং ফলং;

বাত্তিংস ফলচিত্তেন, সকদাগামিস্স অত্তনো.

২৪০. সকদাগামীসু ৱুত্তেসু, ঠপেত্ৱা দুতিযং ফলং;

অনাগামিফলেনস্স, বাত্তিংসেৱ ভৱন্তি হি.

২৪১. অৰহন্তস্স তীস্ৱেৱ, অট্ঠৱীসতি অত্তনো;

ফলেন দুতিযজ্ঝান-ততিযজ্ঝানপাকতো.

২৪২. পৰিত্তকসুভাদীনং, দেৱানং তীসু ভূমিসু;

পঞ্চতিংসেৱ জাযন্তে, চতুত্থজ্ঝানপাকতো.

২৪৩. সোতাপন্নস্স তত্থেক-তিংস চিত্তানি জাযৰে;

সকদাগামিনো এৱং, তথানাগামিনোপি চ.

২৪৪. খীণাসৱস্স তত্থেৱ, সত্তৱীসতি মানসা;

তথা ৱেহপ্ফলে চাপি, সব্বেসং হোন্তি মানসা.

২৪৫. একতিংসেৱ চিত্তানি, সুদ্ধাৱাসিকভূমিসু;

অনাগামিকসত্তস্স, হোন্তীতি পৰিদীপযে.

২৪৬. অৰহতো পন তত্থেৱ, মানসা সত্তৱীসতি;

এৱং ৰূপীসু চিত্তানি, ৱিঞ্ঞেয্যানি ৱিভাৱিনা.

২৪৭. চতুৱীসতি চিত্তানি, পঠমাৰুপ্পভূমিযং;

পুথুজ্জনস্স সত্তস্স, জাযন্তীতি ৱিনিদ্দিসে.

২৪৮. সোতাপন্নস্স তত্থেৱ, ঠপেত্ৱাপুঞ্ঞপঞ্চকং;

সমৱীসতি চিত্তানি, ফলেন সহ অত্তনো.

২৪৯. সকদাগামিনো তত্থ, তথানাগামিনোপি চ;

জাযন্তি ৱীস চিত্তানি, পুব্বপুব্বফলং ৱিনা.

২৫০. খীণাসৱস্স তত্থেৱ, দসপঞ্চ চ মানসা;

পুথুজ্জনস্স সত্তস্স, দুতিযাৰুপ্পভূমিযং.

২৫১. হোন্তি তেৱীস চিত্তানি, ইতি ৱত্ৱা ৱিভাৱযে;

তিণ্ণন্নম্পেত্থ সেখানং, চিত্তানেকূনৱীসতি.

২৫২. চুদ্দসেৱ তু চিত্তানি, দুতিযাৰুপ্পভূমিযং;

ক্ৰিযাদ্ৱাদস পাকেকো, ফলং খীণাসৱস্স তু.

২৫৩. পুথুজ্জনস্স সত্তস্স, ততিযাৰুপ্পভূমিযং;