৬. ছট্ঠো পৰিচ্ছেদো

আৰম্মণৱিভাগনিদ্দেসো

২৯১. এতেসং পন চিত্তানং, আৰম্মণমিতো পৰং;

দস্সযিস্সামহং তেন, ৱিনা নত্থি হি সম্ভৱো.

২৯২. ৰূপং সদ্দং গন্ধং ৰসং, ফোট্ঠব্বং ধম্মমেৱ চ;

ছধা আৰম্মণং আহু, ছড়াৰম্মণকোৱিদা.

২৯৩. তত্থ ভূতে উপাদায, ৱণ্ণো চতুসমুট্ঠিতো;

সনিদস্সনপটিঘো, ৰূপাৰম্মণসঞ্ঞিতো.

২৯৪. দুৱিধো হি সমুদ্দিট্ঠো, সদ্দো চিত্তোতুসম্ভৱো;

সৱিঞ্ঞাণকসদ্দোৱ, হোতি চিত্তসমুট্ঠিতো.

২৯৫. অৱিঞ্ঞাণকসদ্দো যো,

সো হোতূতুসমুট্ঠিতো;

দুৱিধোপি অযং সদ্দো,

সদ্দাৰম্মণতং গতো.

২৯৬. ধৰীযতীতি গচ্ছন্তো, গন্ধো সূচনতোপি ৱা;

অযং চতুসমুট্ঠানো, গন্ধাৰম্মণসম্মতো.

২৯৭. ৰসমানা ৰসন্তীতি, ৰসোতি পৰিকিত্তিতো;

সোৱ চতুসমুট্ঠানো, ৰসাৰম্মণনামকো.

২৯৮. ফুসীযতীতি ফোট্ঠব্বং, পথৱীতেজৱাযৱো;

ফোট্ঠব্বং চতুসম্ভূতং, ফোট্ঠব্বাৰম্মণং মতং.

২৯৯. সব্বং নামঞ্চ ৰূপঞ্চ, হিত্ৱা ৰূপাদিপঞ্চকং;

লক্খণানি চ পঞ্ঞত্তি-ধম্মাৰম্মণসঞ্ঞিতং.

৩০০. ছাৰম্মণানি লব্ভন্তি, কামাৱচৰভূমিযং;

তীণি ৰূপে পনাৰূপে, ধম্মাৰম্মণমেককং.

৩০১. খণৱত্থুপৰিত্তত্তা, আপাথং ন ৱজন্তি যে;

তে ধম্মাৰম্মণা হোন্তি, যেসং ৰূপাদযো কিৰ.

৩০২. তে পটিক্খিপিতব্বাৱ, অঞ্ঞমঞ্ঞস্স গোচৰং;

নেৱ পচ্চনুভোন্তানং, মনো তেসং তু গোচৰং.

৩০৩. তঞ্চ ‘‘পচ্চনুভোতী’’তি, ৱুত্তত্তা পন সত্থুনা;

ৰূপাদাৰম্মণানেৱ, হোন্তি ৰূপাদযো পন.

৩০৪. দিব্বচক্খাদিঞাণানং, ৰূপাদীনেৱ গোচৰা;

অনাপাথগতানেৱ, তানীতিপি ন যুজ্জতি.

৩০৫. যং ৰূপাৰম্মণং হোন্তং, তং ধম্মাৰম্মণং কথং;

এৱং সতি পনেতেসং, নিযমোতি কথং ভৱে.

৩০৬. সব্বং আৰম্মণং এতং, ছব্বিধং সমুদীৰিতং;

তং পৰিত্তত্তিকাদীনং, ৱসেন বহুধা মতং.

৩০৭. সব্বো কামৱিপাকো চ, ক্ৰিযাহেতুদ্ৱযম্পি চ;

পঞ্চৱীসতি একন্তং, পৰিত্তাৰম্মণা সিযুং.

৩০৮. ইট্ঠাদিভেদা পঞ্চেৱ, ৰূপসদ্দাদযো পন;

ৱিঞ্ঞাণানং দ্ৱিপঞ্চন্নং, গোচৰা পটিপাটিযা.

৩০৯. ৰূপাদিপঞ্চকং সব্বং, মনোধাতুত্তযস্স তু;

তেৰসন্নং পনেতেসং, ৰূপক্খন্ধোৱ গোচৰো.

৩১০. নাৰূপং ন চ পঞ্ঞত্তিং, নাতীতং ন চনাগতং;

আৰম্মণং কৰোন্তে চ, ৱত্তমানো হি গোচৰো.

৩১১. তেৰসেতানি চিত্তানি, জাযন্তে কামধাতুযং;

চত্তাৰি ৰূপাৱচৰে, নেৱ কিঞ্চি অৰূপিসু.

৩১২. মহাপাকানমট্ঠন্নং, সন্তীৰণত্তযস্সপি;

ছসু দ্ৱাৰেসু ৰূপাদিছপৰিত্তানি গোচৰা.

৩১৩. ৰূপাদযো পৰিত্তা ছ, হসিতুপ্পাদগোচৰা;

পঞ্চদ্ৱাৰে পটুপ্পন্না, মনোদ্ৱাৰে তিকালিকা.

৩১৪. দুতিযাৰুপ্পচিত্তঞ্চ, চতুত্থাৰুপ্পমানসং;

ছব্বিধং নিযতং হোতি, তং মহগ্গতগোচৰং.

৩১৫. নিব্বানাৰম্মণত্তা হি, একন্তেন অনঞ্ঞতো;

অট্ঠানাসৱচিত্তানং, অপ্পমাণোৱ গোচৰো.

৩১৬. চত্তাৰো ঞাণহীনা চ, কামাৱচৰপুঞ্ঞতো;

ক্ৰিযতোপি চ চত্তাৰো, দ্ৱাদসাকুসলানি চ.

৩১৭. পৰিত্তাৰম্মণা চেৱ, তে মহগ্গতগোচৰা;

পঞ্ঞত্তাৰম্মণত্তা হি, নৱত্তব্বাৱ হোন্তি তে.

৩১৮. চত্তাৰো ঞাণসংযুত্তা, পুঞ্ঞতো ক্ৰিযতোপি চ;

তথাভিঞ্ঞাদ্ৱযঞ্চেৱ, ক্ৰিযাৱোট্ঠব্বনম্পি চ.

৩১৯. একাদসন্নমেতেসং, তিৱিধো হোতি গোচৰো;

পঞ্ঞত্তাৰম্মণত্তা হি, নৱত্তব্বাপি হোন্তিমে.

৩২০. যানি ৱুত্তাৱসেসানি, চিত্তানি পন তানি হি;

নৱত্তব্বাৰম্মণানীতি, ৱিঞ্ঞেয্যানি ৱিভাৱিনা.

পৰিত্তাৰম্মণত্তিকং সমত্তং.

৩২১. দুতিযাৰুপ্পচিত্তঞ্চ, চতুত্থাৰুপ্পমানসং;

ছব্বিধং পন একন্ত-অতীতাৰম্মণং সিযা.

৩২২. ৱিঞ্ঞাণানং দ্ৱিপঞ্চন্নং, মনোধাতুত্তযস্স চ;

পঞ্চ ৰূপাদযো ধম্মা, পচ্চুপ্পন্নাৱ গোচৰা.

৩২৩. অট্ঠ কামমহাপাকা, সন্তীৰণত্তযম্পি চ;

হসিতুপ্পাদচিত্তন্তি, দ্ৱাদসেতে তু মানসা.

৩২৪. সিযাতীতাৰম্মণা পচ্চু-প্পন্নানাগতগোচৰা;

কুসলাকুসলা কামে, ক্ৰিযতো নৱ মানসা.

৩২৫. অভিঞ্ঞামানসা দ্ৱেপি, সিযাতীতাদিগোচৰা;

সন্তপঞ্ঞত্তিকালেপি, নৱত্তব্বা ভৱন্তিমে.

৩২৬. সেসানি পন সব্বানি, ৰূপাৰূপভৱেসুপি;

নৱত্তব্বানি হোন্তেৱ, অতীতাৰম্মণাদিনা.

৩২৭. কামতো চ ক্ৰিযা পঞ্চ, ৰূপতো পঞ্চমী ক্ৰিযা;

চিত্তানং ছন্নমেতেসং, নত্থি কিঞ্চি অগোচৰং.

৩২৮. নিব্বানঞ্চ ফলং মগ্গং, ৰূপঞ্চাৰূপমেৱ চ;

সক্কোন্তি গোচৰং কাতুং, কতি চিত্তানি মে ৱদ.

৩২৯. চত্তাৰো ঞাণসংযুত্তা,

পুঞ্ঞতো ক্ৰিযতো তথা;

অভিঞ্ঞাহদযা দ্ৱেপি,

ক্ৰিযা ৱোট্ঠব্বনম্পি চ.

৩৩০. সক্কোন্তি গোচৰং কাতুং, চিত্তানেকাদসাপি চ;

নিব্বানঞ্চ ফলং মগ্গং, ৰূপঞ্চাৰূপমেৱ চ.

৩৩১. চিত্তেসু পন সব্বেসু, কতি চিত্তানি মে ৱদ;

অৰহত্তফলং মগ্গং, কাতুং সক্কোন্তি গোচৰং.

৩৩২. সব্বেসু পন চিত্তেসু, ছ চ চিত্তানি মে সুণ;

অৰহত্তফলং মগ্গং, কাতুং সক্কোন্তি গোচৰং.

৩৩৩. চত্তাৰো ঞাণসংযুত্তা, ক্ৰিযা ৱোট্ঠব্বনম্পি চ;

ক্ৰিযাভিঞ্ঞা মনোধাতু, ছ চ সক্কোন্তি গোচৰং.

৩৩৪. চত্তাৰো ঞাণসংযুত্তা-ভিঞ্ঞাচিত্তঞ্চ পুঞ্ঞতো;

নাৰহত্তং ফলং মগ্গং, কাতুং সক্কোন্তি গোচৰং.

৩৩৫. কস্মা অৰহতো মগ্গ-চিত্তং ৱা ফলমানসং;

পুথুজ্জনা ৱা সেক্খা ৱা, ন সক্কোন্তি হি জানিতুং.

৩৩৬. পুথুজ্জনো ন জানাতি,

সোতাপন্নস্স মানসং;

সোতাপন্নো ন জানাতি,

সকদাগামিস্স মানসং.

৩৩৭. সকদাগামী ন জানাতি, অনাগামিস্স মানসং;

অনাগামী ন জানাতি, অৰহন্তস্স মানসং.

৩৩৮. হেট্ঠিমো হেট্ঠিমো নেৱ, জানাতি উপৰূপৰি;

উপৰূপৰি জানাতি, হেট্ঠিমস্স চ মানসং.

৩৩৯. যো ধম্মো যস্স ধম্মস্স,

হোতি আৰম্মণং পন;

তমুদ্ধৰিত্ৱা একেকং,

পৱক্খামি ইতো পৰং.

৩৪০. কুসলাৰম্মণং কামে, কুসলাকুসলস্স চ;

অভিঞ্ঞামানসস্সাপি, কুসলস্স ক্ৰিযস্স চ.

৩৪১. কামাৱচৰপাকস্স, তথা কামক্ৰিযস্স চ;

এতেসং পন ৰাসীনং, ছন্নং আৰম্মণং সিযা.

৩৪২. ৰূপাৱচৰপুঞ্ঞানি, কামপাকং ততো ৱিনা;

পঞ্চন্নং পন ৰাসীনং, হোন্তি আৰম্মণানি হি.

৩৪৩. আৰুপ্পকুসলঞ্চাপি, তেভূমকুসলস্স চ;

তেভূমকক্ৰিযস্সাপি, তথেৱাকুসলস্সপি.

৩৪৪. অৰূপাৱচৰপাকানং, দ্ৱিন্নং পন চতুত্থদু;

ইমেসং অট্ঠৰাসীনং, হোতাৰম্মণপচ্চযো.

৩৪৫. অপৰিযাপন্নপুঞ্ঞম্পি, কামাৱচৰতোপি চ;

ৰূপতো পঞ্চমস্সাপি, কুসলস্স ক্ৰিযস্স চ.

৩৪৬. চতুন্নং পন ৰাসীনং, হোতি আৰম্মণং সদা;

তথেৱাকুসলং কাম-ৰূপাৱচৰতো পন.

৩৪৭. কুসলস্স ক্ৰিযস্সাপি, তথেৱাকুসলস্স চ;

কামাৱচৰপাকানং, ছন্নং ৰাসীনমীৰিতং.

৩৪৮. ৱিপাকাৰম্মণং কামে, কামাৱচৰতোপি চ;

ৰূপাৱচৰতো চেৱ, কুসলস্স ক্ৰিযস্স চ.

৩৪৯. কামাৱচৰপাকানং, তথেৱাকুসলস্স চ;

ছন্নঞ্চ পন ৰাসীনং, হোতাৰম্মণপচ্চযো.

৩৫০. ৱিপাকাৰম্মণং ৰূপে, কামাৱচৰতোপি চ;

ৰূপাৱচৰতো চেৱ, কুসলস্স ক্ৰিযস্স চ.

৩৫১. অপুঞ্ঞস্সাতি পঞ্চন্নং, ৰাসীনং হোতি গোচৰো;

অৰূপাৱচৰপাকেসু, অযমেৱ নযো মতো.

৩৫২. অপৰিযাপন্নপাকম্পি, কামতো ৰূপতোপি চ;

কুসলস্স ক্ৰিযস্সাপি, হোতি আৰম্মণং পন.

৩৫৩. ক্ৰিযচিত্তমিদং কামে, কামাৱচৰতোপি চ;

ৰূপাৱচৰতো চেৱ, কুসলস্স ক্ৰিযস্স চ.

৩৫৪. কামাৱচৰপাকস্স, তথেৱাকুসলস্স চ;

ছন্নং ৰাসীনমেতেসং, হোতাৰম্মণপচ্চযো.

৩৫৫. যং ক্ৰিযামানসং ৰূপে, কামপাকং ততো ৱিনা;

পঞ্চন্নং পন ৰাসীনং, হোতি আৰম্মণং পন.

৩৫৬. ক্ৰিযাচিত্তং পনাৰুপ্পে, তেসং পঞ্চন্নমেৱ চ;

আৰুপ্পস্স ক্ৰিযস্সাপি, ছন্নং হোতেৱ গোচৰো.

৩৫৭. ৰূপং চতুসমুট্ঠানং, ৰূপাৰম্মণসঞ্ঞিতং;

কামাৱচৰপুঞ্ঞস্স, তথেৱ কুসলস্স চ.

৩৫৮. অভিঞ্ঞাদ্ৱযচিত্তস্স, কামপাকক্ৰিযস্স চ;

ছন্নং ৰাসীনমেতেসং, হোতাৰম্মণপচ্চযো.

৩৫৯. নিব্বানাৰম্মণং কাম-ৰূপাৱচৰতো পন;

কুসলস্সুভযস্সাপি, কামৰূপক্ৰিযস্স চ.

৩৬০. অপৰিযাপন্নতো চেৱ, ফলস্স কুসলস্স চ;