৪. চতুত্থো পৰিচ্ছেদো

একৱিধাদিনিদ্দেসো

১২৭. ইতো পৰং পৱক্খামি, নযমেকৱিধাদিকং;

আভিধম্মিকভিক্খূনং, বুদ্ধিযা পন ৱুদ্ধিযা.

১২৮. সব্বমেকৱিধং চিত্তং, ৱিজাননসভাৱতো;

দুৱিধঞ্চ ভৱে চিত্তং, অহেতুকসহেতুতো.

১২৯. পুঞ্ঞাপুঞ্ঞৱিপাকা হি, কামে দস চ পঞ্চ চ;

ক্ৰিযা তিস্সোতি সব্বেপি, অট্ঠাৰস অহেতুকা.

১৩০. একসত্ততি সেসানি, চিত্তুপ্পাদা মহেসিনা;

সহেতুকাতি নিদ্দিট্ঠা, তাদিনা হেতুৱাদিনা.

১৩১. সৱত্থুকাৱত্থুকতো, তথোভযৱসেন চ;

সব্বং ৱুত্তপকাৰং তু, তিৱিধং হোতি মানসং.

১৩২. সব্বো কামৱিপাকো চ, ৰূপে পঞ্চদসাপি চ;

আদিমগ্গো সিতুপ্পাদো, মনোধাতু ক্ৰিযাপি চ.

১৩৩. দোমনস্সদ্ৱযঞ্চাপি, তেচত্তালীস মানসা;

নুপ্পজ্জন্তি ৱিনা ৱত্থুং, একন্তেন সৱত্থুকা.

১৩৪. অৰূপাৱচৰপাকা চ, একন্তেন অৱত্থুকা;

দ্ৱাচত্তালীস সেসানি, চিত্তানুভযথা সিযুং.

১৩৫. একেকাৰম্মণং চিত্তং, পঞ্চাৰম্মণমেৱ চ;

ছড়াৰম্মণকঞ্চেতি, এৱম্পি তিৱিধং সিযা.

১৩৬. ৱিঞ্ঞাণানি চ দ্ৱেপঞ্চ, অট্ঠ লোকুত্তৰানি চ;

সব্বং মহগ্গতঞ্চেৱ, ঠপেত্ৱাভিঞ্ঞমানসং.

১৩৭. তেচত্তালীস ৱিঞ্ঞেয্যা, একেকাৰম্মণা পন;

মনোধাতুত্তযং তত্থ, পঞ্চাৰম্মণমীৰিতং.

১৩৮. তেচত্তালীস সেসানি, ছড়াৰম্মণিকা মতা;

তথা চ তিৱিধং চিত্তং, কুসলাকুসলাদিতো.

১৩৯. অহেতুং একহেতুঞ্চ, দ্ৱিহেতুঞ্চ তিহেতুকং;

এৱং চতুব্বিধং চিত্তং, ৱিঞ্ঞাতব্বং ৱিভাৱিনা.

১৪০. হেট্ঠা মযাপি নিদ্দিট্ঠা, অট্ঠাৰস অহেতুকা;

ৱিচিকিচ্ছুদ্ধচ্চসংযুত্তং, একহেতুমুদীৰিতং.

১৪১. কামে দ্ৱাদসধা পুঞ্ঞ-ৱিপাকক্ৰিযতো পন;

দসধাকুসলা চাতি, বাৱীসতি দুহেতুকা.

১৪২. কামে দ্ৱাদসধা পুঞ্ঞ-ৱিপাকক্ৰিযতো পন;

সব্বং মহগ্গতঞ্চেৱ, অপ্পমাণং তিহেতুকং.

১৪৩. ৰূপীৰিযাপথৱিঞ্ঞত্তি-জনকাজনকাদিতো;

এৱঞ্চাপি হি তং চিত্তং, হোতি সব্বং চতুব্বিধং.

১৪৪. দ্ৱাদসাকুসলা তত্থ, কুসলা কামধাতুযা;

তথা দস ক্ৰিযা কামে, অভিঞ্ঞামানসং দ্ৱযং.

১৪৫. সমুট্ঠাপেন্তি ৰূপানি, কপ্পেন্তি ইৰিযাপথং;

জনযন্তি চ ৱিঞ্ঞত্তিং, ইমে দ্ৱত্তিংস মানসা.

১৪৬. কুসলা চ ক্ৰিযা চেৱ, তে মহগ্গতমানসা;

অট্ঠানাসৱচিত্তানি, ছব্বীসতি চ মানসা.

১৪৭. সমুট্ঠাপেন্তি ৰূপানি, কপ্পেন্তি ইৰিযাপথং;

চোপনং ন চ পাপেন্তি, দ্ৱিকিচ্চা নিযতা ইমে.

১৪৮. ঠপেত্ৱা দস ৱিঞ্ঞাণে, ৱিপাকা দ্ৱীসু ভূমিসু;

ক্ৰিযা চেৱ মনোধাতু, ইমানেকূনৱীসতি.

১৪৯. সমুট্ঠাপেন্তি ৰূপানি, ন কৰোন্তিতৰদ্ৱযং;

পুন দ্ৱেপঞ্চৱিঞ্ঞাণা, ৱিপাকা চ অৰূপিসু.

১৫০. সব্বেসং সন্ধিচিত্তঞ্চ, চুতিচিত্তঞ্চাৰহতো;

ন কৰোন্তি তিকিচ্চানি, ইমে সোড়স মানসা.

১৫১. একদ্ৱিতিচতুট্ঠান-পঞ্চট্ঠানপভেদতো;

পঞ্চধা চিত্তমক্খাসি, পঞ্চনিম্মললোচনো.

১৫২. কুসলাকুসলা সব্বে, চিত্তুপ্পাদা মহাক্ৰিযা;

মহগ্গতা ক্ৰিযা চেৱ, চত্তাৰো ফলমানসা.

১৫৩. সব্বেৱ পঞ্চপঞ্ঞাস, নিপ্পপঞ্চেন সত্থুনা;

জৱনট্ঠানতোযেৱ, একট্ঠানে নিযামিতা.

১৫৪. পুন দ্ৱেপঞ্চৱিঞ্ঞাণা, দস্সনে সৱনে তথা;

ঘাযনে সাযনে ঠানে, ফুসনে পটিপাটিযা.

১৫৫. মনোধাতুত্তিকং ঠানে, আৱজ্জনে পটিচ্ছনে;

অট্ঠসট্ঠি ভৱন্তেতে, একট্ঠানিকতং গতা.

১৫৬. পুন দ্ৱিট্ঠানিকং নাম, চিত্তদ্ৱযমুদীৰিতং;

সোমনস্সযুতং পঞ্চ-দ্ৱাৰে সন্তীৰণং সিযা.

১৫৭. তদাৰম্মণং ছদ্ৱাৰে, বলৱাৰম্মণে সতি;

তথা ৱোট্ঠব্বনং হোতি, পঞ্চদ্ৱাৰেসু ৱোট্ঠবো.

১৫৮. মনোদ্ৱাৰেসু সব্বেসং, হোতি আৱজ্জনং পন;

ইদং দ্ৱিট্ঠানিকং নাম, হোতি চিত্তদ্ৱযং পন.

১৫৯. পটিসন্ধিভৱঙ্গস্স, চুতিযা ঠানতো পন;

মহগ্গতৱিপাকা তে, নৱ তিট্ঠানিকা মতা.

১৬০. অট্ঠ কামা মহাপাকা, পটিসন্ধিভৱঙ্গতো;

তদাৰম্মণতো চেৱ, চুতিট্ঠানৱসেন চ.

১৬১. চতুট্ঠানিকচিত্তানি, অট্ঠ হোন্তীতি নিদ্দিসে;

কুসলাকুসলপাকং তু-পেক্খাসহগতদ্ৱযং.

১৬২. সন্তীৰণং ভৱে পঞ্চ-দ্ৱাৰে ছদ্ৱাৰিকেসু চ;

তদাৰম্মণতং যাতি, বলৱাৰম্মণে সতি.

১৬৩. পটিসন্ধিভৱঙ্গানং, চুতিট্ঠানৱসেন চ;

পঞ্চট্ঠানিকচিত্তন্তি, ইদং দ্ৱযমুদীৰিতং.

১৬৪. পঞ্চকিচ্চং দ্ৱযং চিত্তং, চতুকিচ্চং পনট্ঠকং;

তিকিচ্চং নৱকং দ্ৱে তু, দ্ৱিকিচ্চা সেসমেককং.

১৬৫. ভৱঙ্গাৱজ্জনঞ্চেৱ, দস্সনং সম্পটিচ্ছনং;

সন্তীৰণং ৱোট্ঠব্বনং, জৱনং ভৱতি সত্তমং.

১৬৬. ছব্বিধং হোতি তং ছন্নং, ৱিঞ্ঞাণানং পভেদতো;

সত্তধা সত্তৱিঞ্ঞাণ-ধাতূনং তু পভেদতো.

১৬৭. একেকাৰম্মণং ছক্কং, পঞ্চাৰম্মণভেদতো;

ছড়াৰম্মণতো চেৱ, হোতি অট্ঠৱিধং মনো.

১৬৮. তত্থ দ্ৱেপঞ্চৱিঞ্ঞাণা, হোন্তি একেকগোচৰা;

ৰূপাৰম্মণিকা দ্ৱে তু, দ্ৱে দ্ৱে সদ্দাদিগোচৰা.

১৬৯. সব্বং মহগ্গতং চিত্তং, পঞ্চাভিঞ্ঞাৱিৱজ্জিতং;

সব্বং লোকুত্তৰঞ্চেতি, একেকাৰম্মণং ভৱে.

১৭০. একেকাৰম্মণং ছক্ক-মিদং ঞেয্যং ৱিভাৱিনা;

পঞ্চাৰম্মণিকং নাম, মনোধাতুত্তযং ভৱে.

১৭১. কামাৱচৰচিত্তানি, চত্তালীসং তথেককং;

অভিঞ্ঞানি চ সব্বানি, ছড়াৰম্মণিকানিতি.

১৭২. চিত্তং নৱৱিধং হোতি, সত্তৱিঞ্ঞাণধাতুসু;

পচ্ছিমঞ্চ তিধা কত্ৱা, কুসলাকুসলাদিতো.

১৭৩. পুঞ্ঞাপুঞ্ঞৱসেনেৱ, ৱিপাকক্ৰিযভেদতো;

ছসত্ততিৱিধো ভেদো, মনোৱিঞ্ঞাণধাতুযা.

১৭৪. মনোধাতুং দ্ৱিধা কত্ৱা, ৱিপাকক্ৰিযভেদতো;

নৱধা পুব্বৱুত্তেহি, দসধা হোতি মানসং.

১৭৫. ধাতুদ্ৱযং তিধা কত্ৱা, পচ্ছিমং পুন পণ্ডিতো;

একাদসৱিধং চিত্তং, হোতীতি পৰিদীপযে.

১৭৬. মনোৱিঞ্ঞাণধাতুম্পি, কুসলাকুসলাদিতো;

চতুধা ৱিভজিত্ৱান, ৱদে দ্ৱাদসধা ঠিতং.

১৭৭. ভৱে চুদ্দসধা চিত্তং, চুদ্দসট্ঠানভেদতো;

পটিসন্ধিভৱঙ্গস্স, চুতিযাৱজ্জনস্স চ.

১৭৮. পঞ্চন্নং দস্সনাদীনং, সম্পটিচ্ছনচেতসো;

সন্তীৰণস্স ৱোট্ঠব্ব-জৱনানং ৱসেন চ.

১৭৯. তদাৰম্মণচিত্তস্স, তথেৱ ঠানভেদতো;

এৱং চুদ্দসধা চিত্তং, হোতীতি পৰিদীপযে.

১৮০. ভূমিপুগ্গলনানাত্ত-ৱসেন চ পৱত্তিতো;

বহুধা পনিদং চিত্তং, হোতীতি চ ৱিভাৱযে.

১৮১. একৱিধাদিনযে পনিমস্মিং,

যো কুসলো মতিমা ইধ ভিক্খু;

তস্সভিধম্মগতা পন অত্থা,

হত্থগতামলকা ৱিয হোন্তি.

ইতি অভিধম্মাৱতাৰে একৱিধাদিনিদ্দেসো নাম

চতুত্থো পৰিচ্ছেদো.