৩. ততিযো পৰিচ্ছেদো

চেতসিকৱিভাগনিদ্দেসো

৮৯. সব্বে চেতসিকা ৱুত্তা, বুদ্ধেনাদিচ্চবন্ধুনা;

নামসামঞ্ঞতোযেৱ, দ্ৱেপঞ্ঞাস ভৱন্তি তে.

সেয্যথিদং – ফস্সো ৱেদনা সঞ্ঞা চেতনা ৱিতক্কো ৱিচাৰো পীতি চিত্তেকগ্গতা ৱীৰিযং জীৱিতং ছন্দো অধিমোক্খো মনসিকাৰো তত্ৰমজ্ঝত্ততা সদ্ধা সতি হিৰী ওত্তপ্পং অলোভো অদোসো অমোহো কাযপ্পস্সদ্ধিআদীনি ছ যুগানি, তিস্সো ৱিৰতিযো, কৰুণা মুদিতা লোভো দোসো মোহো উদ্ধচ্চং মানো দিট্ঠি ইস্সা মচ্ছৰিযং কুক্কুচ্চং থিনং মিদ্ধং ৱিচিকিচ্ছা অহিৰিকং অনোত্তপ্পঞ্চাতি.

৯০. চতুপঞ্ঞাসধা কামে, ৰূপে পঞ্চদসেৰিতা;

তে হোন্তি দ্ৱাদসাৰূপে, চত্তালীসমনাসৱা.

৯১. একৱীসসতং সব্বে, চিত্তুপ্পাদা সমাসতো;

এতেসু তেসমুপ্পত্তিং, উদ্ধৰিত্ৱা পনেককং.

৯২. ফস্সাদীনং তু ধম্মানং, পৱক্খামি ইতো পৰং;

পাটৱত্থায ভিক্খূনং, চিত্তচেতসিকেস্ৱহং.

৯৩. একগ্গতা মনক্কাৰো, জীৱিতং ফস্সপঞ্চকং;

অট্ঠেতে অৱিনিব্ভোগা, একুপ্পাদা সহক্খযা.

৯৪. ফস্সো চ ৱেদনা সঞ্ঞা, চেতনা জীৱিতিন্দ্ৰিযং;

একগ্গতা মনক্কাৰো, সব্বসাধাৰণা ইমে.

৯৫. ৱিতক্কো পঞ্চপঞ্ঞাস-চিত্তেসু সমুদীৰিতো;

চাৰো ছসট্ঠিচিত্তেসু, জাযতে নত্থি সংসযো.

৯৬. একপঞ্ঞাসচিত্তেসু, পীতি তেসট্ঠিযা সুখং;

উপেক্খা পঞ্চপঞ্ঞাস-চিত্তে দুক্খং তু তীসু হি.

৯৭. হোতি দ্ৱাসট্ঠিচিত্তেসু, সোমনস্সিন্দ্ৰিযং পন;

দুক্খিন্দ্ৰিযং পনেকস্মিং, তথেকম্হি সুখিন্দ্ৰিযং.

৯৮. পঞ্চুত্তৰসতে চিত্তে, ৱীৰিযং আহ নাযকো;

চতুত্তৰসতে চিত্তে, সমাধিন্দ্ৰিযমব্ৰৱি.

৯৯. সব্বাহেতুকচিত্তানি, ঠপেত্ৱা চেকহেতুকে;

একুত্তৰসতে চিত্তে, ছন্দস্সুপ্পত্তিমুদ্দিসে.

১০০. ঠপেত্ৱা দস ৱিঞ্ঞাণে, ৱিচিকিচ্ছাযুতম্পি চ;

দসুত্তৰসতে চিত্তে, অধিমোক্খো উদীৰিতো.

১০১. সদ্ধা সতি হিৰোত্তপ্পং, অলোভাদোসমজ্ঝতা;

ছড়েৱ যুগড়া চাতি, ধম্মা একূনৱীসতি.

১০২. একনৱুতিযা চিত্তে, জাযন্তি নিযতা ইমে;

অহেতুকেসু চিত্তেসু, অপুঞ্ঞেসু ন জাযৰে.

১০৩. একূনাসীতিযা চিত্তে, পঞ্ঞা জাযতি সব্বদা;

অট্ঠৱীসতিযা চিত্তে, কৰুণামুদিতা সিযুং.

১০৪. কামাৱচৰপুঞ্ঞেসু, সব্বলোকুত্তৰেসু চ;

চত্তালীসৱিধে চিত্তে, সাট্ঠকে ৱিৰতিত্তযং.

১০৫. সদ্ধা সতি হিৰোত্তপ্পং, অলোভাদিত্তযম্পি চ;

যুগড়ানি ছ মজ্ঝত্তং, কৰুণামুদিতাপি চ.

১০৬. তথা ৱিৰতিযো তিস্সো, সব্বে তে পঞ্চৱীসতি;

কুসলাব্যাকতা চাপি, কুসলেন পকাসিতা.

১০৭. অহিৰীকমনোত্তপ্পং, মোহো উদ্ধচ্চমেৱ চ;

দ্ৱাদসাপুঞ্ঞচিত্তেসু, নিযতাযেৱ জাযৰে.

১০৮. লোভো দোসো চ মোহো চ, মানো দিট্ঠি চ সংসযো;

মিদ্ধমুদ্ধচ্চকুক্কুচ্চং, থিনং মচ্ছৰিযম্পি চ.

১০৯. অহিৰীকমনোত্তপ্পং, ইস্সা চ দোমনস্সকং;

এতে অকুসলা ৱুত্তা, একন্তেন মহেসিনা.

১১০. লোভো অট্ঠসু নিদ্দিট্ঠো, ৱুত্তা চতূসু দিট্ঠিতু;

মানো দিট্ঠিৱিযুত্তেসু, দোসোদ্ৱীস্ৱেৱ জাযতে.

১১১. ইস্সামচ্ছেৰকুক্কুচ্চা, দ্ৱীসু জাযন্তি নো সহ;

ৱিচিকিচ্ছা পনেকস্মিং, থিনমিদ্ধং তু পঞ্চসু.

১১২. ফস্সো চ ৱেদনা সঞ্ঞা, চেতনা জীৱিতং মনো;

ৱিতক্কো চ ৱিচাৰো চ, পীতি ৱীৰিযসমাধি চ.

১১৩. ছন্দো চেৱাধিমোক্খো চ, মনসিকাৰো চ চুদ্দস;

কুসলাকুসলা চেৱ, হোন্তি অব্যাকতাপি চ.

১১৪. একূনতিংসচিত্তেসু, ঝানং পঞ্চঙ্গিকং মতং;

চতুঝানঙ্গযুত্তানি, সত্ততিংসাতি নিদ্দিসে.

১১৫. একাদসৱিধং চিত্তং, তিৱঙ্গিকমুদীৰিতং;

চতুতিংসৱিধং চিত্তং, দুৱঙ্গিকমুদীৰিতং.

১১৬. সভাৱেনাৱিতক্কেসু, ঝানঙ্গানি ন উদ্ধৰে;

সব্বাহেতুকচিত্তেসু, মগ্গঙ্গানি ন উদ্ধৰে.

১১৭. তীণি সোড়সচিত্তেসু, ইন্দ্ৰিযানি ৱদে বুধো;

একস্মিং পন চত্তাৰি, পঞ্চ তেৰসসুদ্ধৰে.

১১৮. সত্ত দ্ৱাদসচিত্তেসু, ইন্দ্ৰিযানি জিনোব্ৰৱি;

একেনূনেসু অট্ঠেৱ, চত্তালীসমনেসু চ.

১১৯. চত্তালীসায চিত্তেসু, নৱকং নাযকোব্ৰৱি;

এৱং ইন্দ্ৰিযযোগোপি, ৱেদিতব্বো ৱিভাৱিনা.

১২০. অমগ্গঙ্গানি নামেত্থ, অট্ঠাৰস অহেতুকা;

ঝানঙ্গানি ন ৱিজ্জন্তি, ৱিঞ্ঞাণেসু দ্ৱিপঞ্চসু.

১২১. একং চিত্তং দুমগ্গঙ্গং, তিমগ্গঙ্গানি সত্তসু;

চত্তালীসায চিত্তেসু, মগ্গো সো চতুৰঙ্গিকো.

১২২. পঞ্চদ্দসসু চিত্তেসু, মগ্গো পঞ্চঙ্গিকো মতো;

ৱুত্তো দ্ৱত্তিংসচিত্তেসু, মগ্গো সত্তঙ্গিকোপি চ.

১২৩. মগ্গো অট্ঠসু চিত্তেসু, মতো অট্ঠঙ্গিকোতি হি;

এৱং তু সব্বচিত্তেসু, মগ্গঙ্গানি সমুদ্ধৰে.

১২৪. বলানি দ্ৱে দ্ৱিচিত্তেসু, একস্মিং তীণি দীপযে;

একাদসসু চত্তাৰি, ছ দ্ৱাদসসু নিদ্দিসে.

১২৫. একূনাসীতিযা সত্ত, সোড়সেৱাবলানি তু;

চিত্তমেৱং তু ৱিঞ্ঞেয্যং, সবলং অবলম্পি চ.

১২৬. ঝানঙ্গমগ্গঙ্গবলিন্দ্ৰিযানি,

চিত্তেসু জাযন্তি হি যেসু যানি;

মযা সমাসেন সমুদ্ধৰিত্ৱা,

ৱুত্তানি সব্বানিপি তানি তেসু.

ইতি অভিধম্মাৱতাৰে চেতসিকৱিভাগনিদ্দেসো নাম

ততিযো পৰিচ্ছেদো.