সত্তৰসমো পৰিচ্ছেদো

১৭. দিট্ঠিসঙ্গহকথা

৫৯৩. যেৱাপনকনামেন, ধম্মা ছন্দাদযো তথা;

খন্ধাদযো চ কোট্ঠাসা, উদ্দিট্ঠা হি যথাৰহং.

৫৯৪. তত্থ ছন্দাদযো ধম্মা, ৱিভত্তাৱ যথাৰহং;

খন্ধাদিৰাসযো ৱাপি, ৱিঞ্ঞেয্যা দানি সম্ভৱা.

৫৯৫. ৱেদনা ৱেদনাক্খন্ধো, চক্খুসম্ফস্সজাদিকা;

সঞ্ঞা চ সঞ্ঞাক্খন্ধোতি, ছব্বিধাপি পকাসিতা.

৫৯৬. সঙ্খাৰক্খন্ধনামেন, সেসা চেতসিকা মতা;

ৱুত্তা ৱিঞ্ঞাণকাযা ছ, ৱিঞ্ঞাণক্খন্ধনামতো.

৫৯৭. ৰূপক্খন্ধো পুনেকোৱ, সম্পযুত্তাৱিযোগিনো;

অৰূপিনো চ চত্তাৰো, পঞ্চক্খন্ধা পৱুচ্চৰে.

৫৯৮. মনাযতননামং তু, চিত্তমেৱ তথাপৰা;

চক্খুৱিঞ্ঞাণধাতাদিসত্তৱিঞ্ঞাণধাতুযো.

৫৯৯. সব্বে চেতসিকা ধম্মা, ধম্মাযতনসঙ্গহা;

ধম্মধাতূতি চ ৱুত্তা, দ্ৱিপঞ্ঞাসাপি সব্বথা.

৬০০. সুখুমানি চ ৰূপানি, নিব্বানঞ্চেত্থ গয্হৰে;

ওড়াৰিকানি ৰূপানি, দসাযতনধাতুযো.

৬০১. চক্খুসোতঘানজিৱ্হা-কাযাযতননামকা;

ৰূপসদ্দগন্ধৰস-ফোট্ঠব্বাযতনানি চ.

৬০২. দ্ৱাদসাযতনা সব্বে, হোন্তট্ঠাৰসধাতুযো;

খন্ধা ঠপেত্ৱা নিব্বানং, নত্থি পণ্ণত্তি তীসুপি.

৬০৩. আহাৰাদি চ কোট্ঠাসা, পুব্বে ৱুত্তনযাৱ তে;

ইতি মিস্সকসঙ্খেপো, ৱিঞ্ঞাতব্বো ৱিভাৱিনা.

৬০৪. দ্ৱাদসাকুসলেস্ৱেৱ, চুদ্দসাপি ৱৱত্থিতা;

যে সাৱজ্জাৱ তেসম্পি, সঙ্গহো দানি নিয্যতে.

৬০৫. কামাসৱো ভৱাসৱো, দিট্ঠাৱিজ্জাসৱাতি চ;

চত্তাৰো আসৱা ৱুত্তা, তযো ধম্মা সৰূপতো.

৬০৬. আসৱা আসৱট্ঠেন,

ওঘা ৱুয্হনতো তথা;

যোজেন্তীতি চ যোগাতি,

তে চত্তাৰো চ দেসিতা.

৬০৭. কামব্ভৱো চ পটিঘো, মানো দিট্ঠি চ সংসযো;

সীলব্বতপৰামাসো, ভৱৰাগো তথাপৰো.

৬০৮. ইস্সা মচ্ছৰিযাৱিজ্জা, ইতি সংযোজনা দস;

অট্ঠ ধম্মা সৰূপেন, অভিধম্মে পকাসিতা.

৬০৯. ইস্সামচ্ছৰিযং হিত্ৱা, কত্ৱা মানুদ্ধৱং তহিং;

ভিন্দিত্ৱা ভৱৰাগঞ্চ, ৰূপাৰূপৱসা দ্ৱিধা.

৬১০. পঞ্চোৰম্ভাগিযা চেৱ, পঞ্চুদ্ধম্ভাগিযাতি চ;

দস সংযোজনা ৱুত্তা, সুত্তে সত্ত সৰূপতো.

৬১১. গন্থা ধম্মা চ চত্তাৰো, তযো ধম্মা সৰূপতো;

অভিজ্ঝাকাযগন্থো চ, ব্যাপাদো চ পৱুচ্চতি.

৬১২. সীলব্বতপৰামাসো, কাযগন্থো তথাপৰো;

ইদংসচ্চাভিনিৱেসো, ইতি দিট্ঠি ৱিভেদিতো.

৬১৩. কামচ্ছন্দো চ ব্যাপাদো, থিনমিদ্ধমথাপৰং;

তথা উদ্ধচ্চকুক্কুচ্চং, কঙ্খাৱিজ্জাতি অট্ঠিমে.

৬১৪. ধম্মা নিৱৰণা নাম, ছধা চ পন দেসিতা;

মিচ্ছাদিট্ঠি পনেকাৱ, পৰামাসোতি ৱুচ্চতি.

৬১৫. উপাদানানি চত্তাৰি, কামুপাদাদিনামকা;

দিট্ঠিসীলব্বতং অত্ত-ৱাদুপাদানমেৱ চ.

৬১৬. লোভদিট্ঠিৱসা দ্ৱেৱ, তিৱিধা দিট্ঠি দেসিতা;

দিট্ঠি সীলব্বতমত্ত-ৱাদো চেতি মহেসিনা.

৬১৭. লোভো দোসো চ মোহো চ,

মানো দিট্ঠি চ সংসযো;

থিনমুদ্ধচ্চমেৱাথ,

লোকনাসযুগং তথা.

৬১৮. ইত্থং কিলেসৱত্থূনি, কিলেসাতি পকাসিতা;

দসেতে তু সমানাৱ, পৰতো চ সৰূপতো.

৬১৯. কামৰাগো চ পটিঘো, মানো দিট্ঠি চ সংসযো;

ভৱৰাগো অৱিজ্জাতি, ছ সত্তানুসযা মতা.

৬২০. গাহা চ পলিবোধা চ, পপঞ্চা চেৱ মঞ্ঞনা.

তণ্হা মানো চ দিট্ঠি চ, দিট্ঠি তণ্হা চ নিস্সযা.

৬২১. পৰামাসেককো দ্ৱেৱ, নিস্সযা মঞ্ঞনা তযো;

আসৱোঘযোগগন্থা, উপাদানা চ দুব্বিধা.

৬২২. অট্ঠ নীৱৰণা ৱুত্তা, সত্তধানুসযা কথা;

সংযোজনা কিলেসা চ, দসেৱ পৰতো ঠিতা.

৬২৩. একদ্ৱিতিছসত্তট্ঠদসকা তু যথাৰহং;

ধম্মা সৰূপতো হোন্তি, যথাৱুত্তেসু ৰাসিসু.

৬২৪. কামৰাগভৱৰাগা, কামাসৱভৱাসৱা;

ৰূপৰাগাৰূপৰাগ, ইতি লোভো ৱিভেদিতো.

৬২৫. ইদংসচ্চাভিনিৱেসো, দিট্ঠি সীলব্বতং তথা;

অত্তৱাদো পৰামাসো, ইতি দিট্ঠি পৱুচ্চতি.

৬২৬. দিট্ঠি পঞ্চদসৱিধা, লোভট্ঠাৰসধা তহিং;

সেসা সপৰৰাসীহি, সমানা দ্ৱাদসট্ঠিতা.

৬২৭. একাদসসমুট্ঠানে, দিট্ঠিলোভা ৱৱত্থিতা;

অৱিজ্জা সত্তসু ৱুত্তা, পটিঘো পন পঞ্চসু.

৬২৮. মানো চ ৱিচিকিচ্ছা চ, চতুট্ঠানেসু উদ্ধটো;

তীসু দ্ৱীসু চ থীনন্তি, অট্ঠেতে সৱিভত্তিকা.

৬২৯. ইস্সামচ্ছেৰকুক্কুচ্চমিদ্ধলোকৱিনাসকা;

ছাৱিভত্তিকধম্মাতি, অসম্ভিন্না চতুদ্দস.

৬৩০. ৰূপৰাগাৰূপৰাগ-কামাসৱভৱাসৱা;

হোন্তি দিট্ঠিৱিযুত্তেসু, পুব্বে ৱুত্তনযা পন.

৬৩১. ইতি সাৱজ্জসঙ্খেপং, ঞত্ৱা পুন ৱিচক্খণো;

বোধিপক্খিযধম্মানং, সঙ্গহম্পি ৱিভাৱযে.

৬৩২. যেসু সঞ্ঞাচিত্তদিট্ঠি-ৱিপল্লাসা যথাক্কমং;

সুভং সুখং নিচ্চমত্তা, ইতি দ্ৱাদসধা ঠিতা.

৬৩৩. তত্থ কাযে ৱেদনাসু, চিত্তে ধম্মেসু চক্কমা;

অসুভং দুক্খমনিচ্চমনত্তাতি উপট্ঠিতা.

৬৩৪. যথাৱুত্তৱিপল্লাসপহানায যথাৰহং;

ভিন্না ৱিসযকিচ্চানং, ৱসেন পন সম্ভৱা.

৬৩৫. চত্তাৰো সতিপট্ঠানা, কাযানুপস্সনাদযো;

ইতি ৱুত্তা পনেকাৱ, সম্মাসতি মহেসিনা.

৬৩৬. উপ্পন্নানুপ্পন্নপাপপহানানুপ্পন্নায চ;

অনুপ্পন্নুপ্পন্নেহি ৱা, নিব্বত্তি অভিৱুদ্ধিযা.

৬৩৭. পদহন্তস্স ৱাযামো, কিচ্চাভোগৱিভাগতো;

সম্মপ্পধানা চত্তাৰো, ইতি ৱুত্তা মহেসিনা.

৬৩৮. ছন্দো চ ৱীৰিযং চিত্তং, ৱীমংসাতি চ তাদিনা;

চত্তাৰো ইদ্ধিপাদাতি, ৱিভত্তা চতুৰাধিপা.

৬৩৯. সদ্ধিন্দ্ৰিযঞ্চ ৱীৰিযং, সতি চেৱ সমাধি চ;

পঞ্ঞিন্দ্ৰিযঞ্চ পঞ্চেৱ, বোধিপক্খিযসঙ্গহে.

৬৪০. ইন্দ্ৰিযানিন্দ্ৰিযট্ঠেন, বলট্ঠেন বলানি চ;

ইতি ভিন্না ৱিভত্তা চ, দুৱিধাপি মহেসিনা.

৬৪১. সতী চ ধম্মৱিচযো, তথা ৱীৰিযপীতিযো;

পস্সদ্ধি চ সমাধি চ, উপেক্খাতি চ তাদিনা.

৬৪২. দেসিতা সত্ত বোজ্ঝঙ্গা, বুজ্ঝন্তস্স সভাৱতো;

কাযচিত্তৱসা ভিন্নং, কত্ৱা পস্সদ্ধিমেককং.

৬৪৩. সম্মাদিট্ঠি চ সঙ্কপ্পো, ৱাযামো ৱিৰতিত্তযং;

সম্মাসতি সমাধী চ, মগ্গো অট্ঠঙ্গিকো মতো.

৬৪৪. ইতি সত্তেৱ সঙ্খেপা, সত্ততিংস পভেদতো;

একং কত্ৱান পস্সদ্ধিং, অসম্ভিন্না চতুদ্দস.

৬৪৫. নৱধা ৱীৰিযং ৱুত্তং, ছসু ৰাসীসু পঞ্চসু;

অট্ঠধা সতি সেসা তু, সমানপদৰাসিকা.

৬৪৬. পঞ্চস্ৱেৱ তু পঞ্ঞা চ, সমাধি চতুৰাসিকো;

সদ্ধা দ্ৱীসু ৱিভত্তাতি, পঞ্চেতে সৱিভত্তিকা.

৬৪৭. নৱা ৱিভত্তিকা সেসা, ছন্দো চিত্তমথাপৰং;

পীতি পস্সদ্ধিপেক্খা চ, সঙ্কপ্পো ৱিৰতিত্তযং.

৬৪৮. ইতি ৱুত্তনযা সব্বে, বোধিপক্খিযসঙ্গহা;

লোকুত্তৰেসু সম্ভোন্তি, সব্বথাপি যথাৰহং.

৬৪৯. পুব্বভাগে যথাযোগং, লোকিযেসু চ লব্ভৰে;

নিব্বেদভাৱনাকালে, ছব্বিসুদ্ধিপৱত্তিযং.

৬৫০. ইতি মিস্সকসাৱজ্জা, বোধিপক্খিযসঙ্গহা;

যেৱাপনকৰাসিম্হি, যথাসম্ভৱতো ঠিতা.

৬৫১. কম্মপথা তু সম্ভোন্তি, পুঞ্ঞাপুঞ্ঞেসু সব্বথা;

অপথা চ সুচৰিতা, তথা দুচ্চৰিতাপি চ.

৬৫২. তত্থ কম্মপথট্ঠানে, অনভিজ্ঝাদযো পন;

উপচাৰেন ৱুচ্চন্তি, ৱিপাকেসু ক্ৰিযেসু ৱাতি.

ইতি চেতসিকৱিভাগে দিট্ঠিসঙ্গহকথা নিট্ঠিতা.

সত্তৰসমো পৰিচ্ছেদো.

নিট্ঠিতো চ সব্বথাপি চেতসিকৱিভাগো.