১৫. ৰাসিসঙ্গহকথা

৫১৩. তেত্তিংস চেৱ দ্ৱত্তিংস, একতিংস চ তিংস চ;

একদ্ৱত্তিংসহীনা চ, তিংস ধম্মানৱজ্জকে.

৫১৪. দস ধম্মা তু সাৱজ্জে, ছপঞ্চচতুৰাধিকা;

একাদস দস নৱ, সত্তধাহেতুকে পন.

৫১৫. ইত্থং চুদ্দসধা ভিন্না, কোট্ঠাসা তু সৰূপতো;

ৱিভত্তা তেহি যুত্তা চ, চিত্তুপ্পাদা যথাক্কমং.

৫১৬. তিকট্ঠকা পঞ্চৱীস, দস পঞ্চাধিকা নৱ;

অট্ঠাৰসেতি সত্তেতে, অনৱজ্জা তথেতৰে.

৫১৭. দ্ৱে চত্তাৰো ছড়েকং দ্ৱে,

পঞ্চাথ দসধাপৰে;

সাৱজ্জাহেতুকা চেতি,

কোট্ঠাসা হোন্তি চুদ্দস.

৫১৮. নৱ চাপি ছ চত্তাৰো, চতুপঞ্চছসত্তকা;

নৱ দ্ৱে দ্ৱে তথেকো চ, যেৱাপনকসঙ্গহা.

৫১৯. তেহি যুত্তা পনট্ঠাথ, ৱীসেকতিংস মানসা;

দ্ৱে দ্ৱে দ্ৱে তীণি চেকং দ্ৱে, অট্ঠ দস যথাক্কমং.

৫২০. সত্ততিংসকতো যাৱ, একতিংসানৱজ্জকে;

তিকট্ঠকাদিকে সত্ত, ঠিতা নিযতসঙ্গহা.

৫২১. পাপেসু ৱীস চেকূন-ৱীসট্ঠাৰস সোড়স;

চতুধা দ্ৱীসু চতূসু, চতূসু দ্ৱীসু চট্ঠিতা.

৫২২. একদ্ৱিপঞ্চদসসু, চ দ্ৱিধাহেতুকেসু চ;

তিকদ্ৱেকাধিকা ধম্মা, দসট্ঠ চ যথাক্কমং.

৫২৩. পঞ্চদ্ৱেকদ্ৱিভিপঞ্চ, কোট্ঠাসা নিযতা ঠিতা;

তেহি যুত্তা পনট্ঠাথ, ৱীস দ্ৱে দ্ৱে তিকেককা.

৫২৪. পুব্বাপৰদ্ৱযাপুঞ্ঞে, কামপাকে অহেতুকে;

পঞ্চমানুত্তৰাৰুপ্পে, নত্থানিযতসম্ভৱো.

৫২৫. ছত্তিংসমানসেস্ৱেৱ, লব্ভন্তানিযতা ন ৱা;

তেপঞ্ঞাসাৱসেসা তু, সব্বে নিযতযোগিনো.

৫২৬. নিযতানিযতে কত্ৱা, লব্ভন্তোভযথা তথা;

সৰূপযেৱোভযকা, তিৱিধেৱং তু সঙ্গহা.

৫২৭. ঞেয্যা ৱুত্তানুসাৰেন, তেহি যুত্তাৱ মানসা;

ততো পুন ৱিভাৱেয্য, সব্বসঙ্গাহিকং নযং.

৫২৮. একূনতালীসকতো, যাৱেকত্তিংসকা ঠিতা;

নৱধা অনৱজ্জেসু, তেহি যুত্তা চ মানসা.

৫২৯. দ্ৱে চত্তাৰো দসেৱাথ, তিকপঞ্চাধিকা দস;

তেৱীস কমতো সত্ত, দ্ৱে চ পঞ্চদসাপৰে.

৫৩০. দ্ৱে চ দ্ৱে তিকদ্ৱে দ্ৱেকা, সাৱজ্জেসু চ সোড়স;

একূনৱীস ৱীসাথ, ৱীসেকদ্ৱিতযাধিকা.

৫৩১. অহেতুকে পনট্ঠাথ, দসেকদ্ৱিতযাধিকা;

দসপঞ্চ দ্ৱিকেকাতি, ভৱন্তেকূনৱীসতি.

৫৩২. লব্ভমানানুসাৰেন, ধম্মানং পন সঙ্গহো;

সক্কা ৱুত্তনযেনেৱ, ৱিঞ্ঞাতুং পন ৱিঞ্ঞুনাতি.

ইতি চেতসিকৱিভাগে ৰাসিসঙ্গহকথা নিট্ঠিতা.

পন্নৰসমো পৰিচ্ছেদো.