১২. ৰাসিৱিনিচ্ছযকথা

৪১৬. তত্থ ৱিঞ্ঞাণকাযা ছ, সত্ত ৱিঞ্ঞাণধাতুযো;

ফস্সা চক্খাদিসম্ফস্সা, ছব্বিধা সত্তধাপি চ.

৪১৭. চক্খুসম্ফস্সজাদীহি, ভেদেহি পন ৱেদনা;

সঞ্ঞা চ চেতনা চেৱ, ভিন্না ছধা চ সত্তধা.

৪১৮. চিত্তুপ্পাদেসু ধম্মা চ, খন্ধাযতনধাতুযো;

আহাৰা চ যথাযোগং, ফস্সপঞ্চকৰাসিযং.

৪১৯. সব্বে সঙ্গহিতা হোন্তি, তস্মা নামপৰিগ্গহো;

মূলৰাসি চ সো সব্ব-সঙ্গহোতি পৱুচ্চতি.

৪২০. ঝানৰাসিম্হি পঞ্চেৱ, ধম্মা সত্তপ্পভেদতো;

ইন্দ্ৰিযানি চ বাৱীস, ধম্মতো পন সোড়স.

৪২১. নৱ মগ্গঙ্গধম্মা চ, ভিন্না দ্ৱাদসধাপি তে;

ছড়েৱ হেতুযো তত্থ, দেসিতা কঙ্খিতুদ্ধৱা.

৪২২. দস কম্মপথা ধম্মা, ছড়েৱ পন দেসিতা;

সেসাৱ দসধম্মেহি, সমানা চতুৰাসযো.

৪২৩. পঞ্ঞা দসৱিধা তত্থ, ৱেদনা নৱধা ঠিতা;

সমাধি সত্তধা হোতি, ৱীৰিযং পন পঞ্চধা.

৪২৪. সতি ভিন্না চতুধাৱ, ৱিতক্কো তিৱিধো মতো;

দ্ৱিধা চিত্তাদযো হোন্তি, দসপঞ্চেৱ সম্ভৱা.

৪২৫. সেসা দ্ৱত্তিংস সব্বেপি, ধম্মা একেকধাপি চ;

হিত্ৱা ৰূপিন্দ্ৰিযানেতে, ৱিভাগা অট্ঠধা কথং.

৪২৬. ফস্সো চ চেতনা সঞ্ঞা, ৱিচাৰো পীতি জীৱিতং;

নিৰৱজ্জা ছ যুগড়া, সাৱজ্জমোহকঙ্খিতা.

৪২৭. যেৱাপনকধম্মা চ, ৱিৰতুদ্ধচ্চৱজ্জিতা;

দ্ৱাদসা চেতি সব্বেপি, দ্ৱত্তিংসকেকধা তথা.

৪২৮. চিত্তং মনিন্দ্ৰিযং চিত্তং, সদ্ধা সদ্ধিন্দ্ৰিযং বলং;

বলেসু লোকিযা ৱুত্তা, লোকিযে চ দুকদ্ৱযে.

৪২৯. লোভালোভাদিকা দ্ৱে দ্ৱে,

চত্তাৰো হেতুৰাসিযং;

মিচ্ছাদিট্ঠি চ মগ্গঙ্গে,

পঞ্চকম্মপথেপি তে.

৪৩০. যেৱাপনকৰাসিম্হি, দেসিতা ৱিৰতুদ্ধৱা;

মগ্গহেতূসু চেৱেতি, দ্ৱিধা পঞ্চদস ঠিতা.

৪৩১. ৱিতক্কো ঝানমগ্গেসু, তিৱিধা নৱধা পন;

ৱেদনা মূলৰাসিম্হি, তথা ঝানিন্দ্ৰিযেসু চ.

৪৩২. ইন্দ্ৰিযমগ্গৰাসিম্হি, বলপিট্ঠিদুকত্তিকে;

চতুধা সতি তত্থেৱ, ৱীৰিযম্পি চ পঞ্চধা.

৪৩৩. সমাধি সত্তধা ৱুত্তো, ঝানঙ্গেসু চ তত্থ চ;

তত্থেৱ দসধা পঞ্ঞা, হেতুকম্মপথেসু চ.

৪৩৪. দসনৱসত্তপঞ্চচতুতিদ্ৱেকধা ঠিতা;

ছড়েককা পঞ্চদস, দ্ৱত্তিংস চ যথাক্কমং.

৪৩৫. অট্ঠ ৱিভাগসঙ্খেপা, পদানি দসধা সিযুং;

তেপঞ্ঞাসেৱ ধম্মা চ, অট্ঠাৰস চ ৰাসযো.

৪৩৬. ইতি ধম্মৱৱত্থানে, ধম্মসঙ্গণিযং পন;

চিত্তুপ্পাদপৰিচ্ছেদে, উদ্দেসনযসঙ্গহো.

৪৩৭. পদানি চতুৰাসীতি, দেসিতানি সৰূপতো;

যেৱাপনকনামেন, সোড়সেৱ যথাৰহং.

৪৩৮. তত্থানিযতনামানি, পদানেকাদসেৱ তু;

ৱুত্তানেকূননৱুতি, নিযতানেৱ সম্ভৱা.

৪৩৯. অসম্ভিন্নপদানেত্থ, তেপঞ্ঞাসেৱ সব্বথা;

চিত্তচেতসিকানং তু, ৱসেন পৰিদীপযে.

৪৪০. ৱিভাগপদধম্মানং, ৱসেনেৱং পকাসিতো;

চিত্তচেতসিকানং তু, কমতো ৰাসিনিচ্ছযোতি.

ইতি চেতসিকৱিভাগে ৰাসিৱিনিচ্ছযকথা নিট্ঠিতা.

দ্ৱাদসমো পৰিচ্ছেদো.