৬. ভূমিপুগ্গলচিত্তপ্পৱত্তিকথা

২৩২. কামসুগতিযং হোন্তি, মহাপাকা যথাৰহং;

মহগ্গতৱিপাকা চ, যথাসন্ধিৱৱত্থিতা.

২৩৩. ৱোট্ঠব্বকামপুঞ্ঞানি, ৱিযুত্তানি চ দিট্ঠিযা;

উদ্ধচ্চসহিতঞ্চেতি, হোন্তি সব্বত্থ চুদ্দস.

২৩৪. সন্তীৰণমনোধাতু-চক্খুসোতমনা পন;

দস চিত্তানি জাযন্তি, সব্বত্থাৰূপৱজ্জিতে.

২৩৫. দিট্ঠিগতসম্পযুত্তা, ৱিচিকিচ্ছাযুতা তথা;

পঞ্চ সব্বত্থ জাযন্তি, সুদ্ধাৱাসৱিৱজ্জিতে.

২৩৬. দোসমূলদ্ৱযঞ্চেৱ, ঘানাদিত্তযমানসা;

অট্ঠ সব্বত্থ জাযন্তি, মহগ্গতৱিৱজ্জিতে.

২৩৭. চতুত্থাৰুপ্পজৱনং, অনাগামিফলাদযো;

মহাক্ৰিযা চ জাযন্তি, তেৰসাপাযৱজ্জিতে.

২৩৮. হেট্ঠাৰুপ্পজৱা দ্ৱে দ্ৱে, ছাপাযুপৰিৱজ্জিতে;

সিতৰূপজৱা হোন্তি, অৰূপাপাযৱজ্জিতে.

২৩৯. সোতাপত্তিফলাদীনি, সুদ্ধাপাযৱিৱজ্জিতে;

পঠমানুত্তৰং সুদ্ধা-পাযাৰূপৱিৱজ্জিতে.

২৪০. অৱত্থাভূমিভূতত্তা, ন গয্হন্তি অনুত্তৰা;

একৱোকাৰভূমি চ, ৰূপমত্তা ন গয্হতি.

২৪১. সভুম্মা সব্বভুম্মা চ, একদ্ৱিত্তযৱজ্জিতা;

তথাৰূপসুদ্ধাৱাস-ব্ৰহ্মাপাযৱসাতি চ.

২৪২. মানসা পঞ্চ কোট্ঠাসা, সত্তৰস চতুদ্দস;

ছত্তিংসতেকৱীসা চ, একঞ্চেৱ যথাক্কমং.

২৪৩. অট্ঠাৰসাপি হোন্তেতে, নৱধাপি পুনেকধা;

চতুধা তিৱিধা চেৱ, একধাতি চ ভেদতো.

২৪৪. তেৰসাপি চ কোট্ঠাসা, ভৱন্তেকতিভূমকা;

ছসত্তেকাদসসত্ত-ৰসভূমকমানসা.

২৪৫. একদ্ৱযতিচতুক্কপঞ্চকাধিকৱীসজা;

ছব্বীসতিংসজা চেতি, যথানুক্কমতো ভৱে.

২৪৬. চত্তাৰি পুন চত্তাৰি, একমট্ঠট্ঠ চেককং;

চত্তাৰেকাদস দ্ৱে দ্ৱে, সত্ত তেৱীস চুদ্দস.

২৪৭. ক্ৰিযাজৱমহাপাকা, লোকুত্তৰমহগ্গতা;

দ্ৱেপঞ্ঞাস ন লব্ভন্তি, চতুৰাপাযভূমিযং.

২৪৮. কামাৱচৰদেৱেসু, ছসু ভুম্মে চ মানৱে;

কামসুগতিযং নত্থি, নৱ পাকা মহগ্গতা.

২৪৯. দোসমূলমহাপাকা, ঘানাদিত্তযমানসা;

নত্থাৰূপৱিপাকা চ, ৱীসতী ৰূপভূমিযং.

২৫০. কঙ্খাদিট্ঠিযুতা পঞ্চাৰূপপাকা চতুব্বিধা;

পঞ্চাদোনুত্তৰা চেৱ, সুদ্ধাৱাসে ন লব্ভৰে.

২৫১. আদাৱজ্জনমগ্গা চ, পটিঘাৰূপমানসা;

কামপাকা সিতাৰূপে, তেচত্তালীস নত্থি তে.

২৫২. সত্ততিংস পৰিত্তা চ, লব্ভন্তাপাযভূমিযং;

মানসাসীতি লব্ভন্তি, কামসুগতিযং পন.

২৫৩. একূনসত্ততি ৰূপে, সুদ্ধে পঞ্ঞাস পঞ্চ চ;

ছচত্তালীস আৰুপ্পে, নত্থাসঞ্ঞীসু কিঞ্চিপি.

২৫৪. ইত্থমেকদ্ৱিতিচতুপঞ্চভুম্মানি সোড়স;

দস পঞ্চদসেৱাথ, চতুত্তিংস চতুদ্দস.

২৫৫. অপাযাহেতুকানং তু, মহাপাকক্ৰিযাজৱে;

হিত্ৱা সেসপৰিত্তানি, চিত্তানি পন লব্ভৰে.

২৫৬. দ্ৱিহেতুকাহেতুকানং, সেসানং কামমানসা;

লব্ভন্তি পন হিত্ৱান, ঞাণপাকক্ৰিযাজৱে.

২৫৭. তিহেতুকানং সত্তানং, তত্থ তত্থূপপত্তিযং;

তত্থ তত্থূপপন্নানং, লব্ভমানানি লব্ভৰে.

২৫৮. তিহেতুকানং সব্বেপি, মানসাপাযপাণিনং;

সত্ততিংসাৱসেসানং, একতালীস নিদ্দিসে.

২৫৯. পুথুজ্জনান সেক্খানং, ন সন্তি জৱনক্ৰিযা;

ন সন্তি ৱীতৰাগানং, পুঞ্ঞাপুঞ্ঞানি সব্বথা.

২৬০. কঙ্খাদিট্ঠিযুতা পঞ্চ, সেক্খানং নত্থি মানসা;

দোসমূলদ্ৱযঞ্চাপি, নত্থানাগামিনো পন.

২৬১. ৱৱত্থিতাৰিযেস্ৱেৱ, যথাসকমনুত্তৰা;

মগ্গট্ঠানং সকো মগ্গো, নত্থঞ্ঞং কিঞ্চি সব্বথা.

২৬২. পুথুজ্জনানং দ্ৱিন্নম্পি, ফলট্ঠানং যথাক্কমং;

ততিযস্স ফলট্ঠস্স, চতুত্থস্স চ সম্ভৱা.

২৬৩. তেসট্ঠি চেৱ চিত্তানি, লব্ভন্তেকূনসট্ঠি চ;

সত্তপঞ্ঞাস চিত্তানি, তেপঞ্ঞাস চ সব্বথা.

২৬৪. চতুপঞ্ঞাস পঞ্ঞাস, পঞ্ঞাসদ্ৱযহীনকা;

কামেসু তেসং সম্ভোন্তি, চতুতালীস চক্কমা.

২৬৫. তেচত্তালীস চেকূনচত্তালীস যথাক্কমং;

ভৱন্তেকূনতালীস, পঞ্চত্তিংস চ ৰূপিসু.

২৬৬. সত্তৱীস চ তেৱীস, তেৱীস চ যথাক্কমং;

আৰুপ্পেসুপি লব্ভন্তি, তেসমট্ঠাৰসেৱ চ.

২৬৭. পুথুজ্জনা চ চত্তাৰো, অপাযাহেতুকাদযো;

অৰিযা চেৱ অট্ঠাতি, দ্ৱাদসন্নং ৱসা সিযুং.

২৬৮. ছব্বিধা চিত্তকোট্ঠাসা, একপুগ্গলিকা তথা;

চতুপঞ্চছসত্তট্ঠ-পুগ্গলট্ঠাতি চক্কমা.

২৬৯. ছব্বীস চুদ্দসেৱাথ, তেৰস দ্ৱে চ মানসা;

দস সত্তাধিকা চেৱ, পুন সত্তাধিকা দসাতি.

ইতি চিত্তৱিভাগে ভূমিপুগ্গলচিত্তপ্পৱত্তিকথা নিট্ঠিতা.

ছট্ঠো পৰিচ্ছেদো.