৮. অট্ঠমো পৰিচ্ছেদো

কসিণাসুভৱিভাগো

৮৮০. ইতো পৰং পৱক্খামি, ভাৱনানযমুত্তমং;

নামৰূপং পৰিগ্গয্হ, পটিপজ্জিতুমীহতো.

৮৮১. ভাৱনা দুৱিধা তত্থ, সমথো চ ৱিপস্সনা;

সমথো দুৱিধো তত্থ, পৰিত্তো চ মহগ্গতো.

৮৮২. উপচাৰমনুপ্পত্তো, পৰিত্তোতি পৱুচ্চতি;

মহগ্গতপ্পনাপত্তো, সমথো লোকিযো মতো.

৮৮৩. কসিণানি দসাসুভা, দসধানুস্সতী তথা;

অপ্পমঞ্ঞা চ সঞ্ঞা চ, ৱৱত্থাৰুপ্পকানি চ.

৮৮৪. কম্মট্ঠানানি তত্থাহু, চত্তালীস ৱিচক্খণা;

যত্থানুযোগং কুব্বন্তা, ভাৱেন্তি সমথদ্ৱযং.

৮৮৫. তং পযোগৱিসুদ্ধেন, পত্ৱানোপাযসম্পদং;

অজ্ঝাসযং ৱিসোধেত্ৱা, ভাৱেতব্বন্তি ভাসিতং.

৮৮৬. কথং কৰোন্তো চাৰিত্তং, ৱাৰিত্তঞ্চ ৱিৱজ্জিয;

পাতিমোক্খং সমাদায, সদ্ধায পৰিপূৰযে.

৮৮৭. পটিসঙ্খায সোধেত্ৱা, ছদ্ৱাৰেসু মলাসৱং;

ছড়িন্দ্ৰিযানি মেধাৱী, সতাৰক্খেন গোপযে.

৮৮৮. পাপকাজীৱনিস্সঙ্গো, কুহকাচাৰনিস্সটো;

আজীৱং পৰিসোধেয্য, পহিতত্তেট্ঠিসুদ্ধিযা.

৮৮৯. ইদমত্থিতমাৰব্ভ, পটিসঙ্খায যোনিসো;

পঞ্ঞৱা সম্পজঞ্ঞেন, পৰিভুঞ্জেয্য পচ্চযে.

৮৯০. সংৱৰং পাতিমোক্খে চ, সীলমিন্দ্ৰিযসংৱৰং;

আজীৱপাৰিসুদ্ধিঞ্চ, তথা পচ্চযনিস্সিতং.

৮৯১. সমাদায চতুদ্ধেৱ-মধিট্ঠেয্য ততো পৰং;

তস্সেৱ পৰিৱাৰায, ধুতঙ্গানি যথাৰহং.

৮৯২. পংসুকূলিকমঙ্গং তি-চীৱৰং চীৱৰাযুগং;

পিণ্ডপাতিকমঙ্গঞ্চ, সপদানিকমুত্তমং.

৮৯৩. খলুপচ্ছাভত্তিকঙ্গং, ধুতঙ্গং পত্তপিণ্ডিকং;

একাসনিকমিচ্চেৱং, পঞ্চধা ভোজনে ঠিতং.

৮৯৪. আৰঞ্ঞিকং যথাসন্থ-

তিকঙ্গং ৰুক্খমূলিকং;

অব্ভোকাসিকসোসানি-

কঙ্গা নেসজ্জিকং তথা.

৮৯৫. ছ সেনাসনমাৰব্ভ, ধুতঙ্গানীতি তেৰস;

কপ্পিযেপি চ লোলুপ্প-সমাচাৰৱিমুত্তিযা.

৮৯৬. সামীচিপটিপত্তীতি, কত্ৱা সল্লেখৱুত্তিযা;

পচ্চযত্তযমাহচ্চ, পঞ্ঞত্তানি মহেসিনা.

৮৯৭. চতুপাৰিসুদ্ধিসীলং, ধুতঙ্গপৰিৱাৰিতং;

পূৰেত্ৱান ৱিসুদ্ধেৱং, পযোগপৰিসুদ্ধিযা.

৮৯৮. ততো পণিধিসম্পন্নো, ভাৱনায ৱিসাৰদো;

উপাযং পটিপাদেয্য, পৱিৱেকৰতো কথং?

৮৯৯. আৱাসো চ কুলং লাভো,

গণো কম্মঞ্চ পঞ্চমং;

অদ্ধানং ঞাতি আবাধো,

গন্থো ইদ্ধীতি তে দস.

৯০০. ছেত্ৱান নিপকো যোগী,

পলিবোধে যথাৰহং;

নিৰালযো নিৰাৰম্ভো,

পপঞ্চোপসমে ৰতো.

৯০১. পিযং গৰুং ভাৱনিযং, ৱত্তাৰং ৱচনক্খমং;

কত্তাৰমতিগম্ভীৰকথং ঠাননিযোজকং.

৯০২. বহুস্সুতং গুণৱন্ত-মাগম্মাচৰিযং বুধো;

খমো পদক্খিণগ্গাহী, নিয্যাতত্তুজু ভদ্ৰকো.

৯০৩. আৰাধেত্ৱান গণ্হেয্য, তং কম্মট্ঠানদাযকং;

কম্মট্ঠানং পৰিক্খিত্ৱা, চৰিযাৰহমত্তনো.

৯০৪. ৰাগো দোসো চ মোহো চ,

চৰিযা তীহি পণ্ডিতা;

সদ্ধাবুদ্ধিৱিতক্কেহি,

ছব্বিধা চ ৱিভাৱযুং.

৯০৫. ৰাগুস্সন্নস্স সপ্পাযা, কোট্ঠাসাসুভভাৱনা;

দোসুস্সন্নস্সপ্পমঞ্ঞা, নীলাদি চ চতুব্বিধা.

৯০৬. ৱিতক্কং মোহুস্সন্নানং, আনাপানং পকাসিতং;

ছ সদ্ধাচৰিতস্সাহু, বুদ্ধানুস্সতিআদযো.

৯০৭. মৰণোপসমাসঞ্ঞাৱৱত্থানানি বুদ্ধিনো;

সেসানি পন সব্বেসং, তত্থাপি কসিণং বুধা.

৯০৮. ৱিতক্কপকতিকস্স, পৰিত্তং মোহচাৰিনো;

মহন্তমিতি সপ্পাযং, গহেত্ৱান ততো পৰং.

৯০৯. মহাৱাসং নৱং জিণ্ণং, পন্থসোণ্ডিকসন্তিকং;

পণ্ণপুপ্ফফলাকিণ্ণং, বহুসম্মানপত্থিতং.

৯১০. সীমন্তদাৰুনগৰ-ক্খেত্তপচ্চন্তনিস্সিতং;

ৱিসভাগমসপ্পাযং, পট্টনং মিত্তদুল্লভং.

৯১১. ঠানানিট্ঠাৰসেতানি, পৰিৱজ্জেয্য পণ্ডিতো;

সেৱেয্য ভাৱনাযোগ্গং, সেনাসনমতন্দিতো.

৯১২. নাতিদূৰং নাচ্চাসন্নং, অপ্পসদ্দমনাকুলং;

গমনাগমনসম্পন্নং, অপ্পডংসানুপদ্দৱং.

৯১৩. অকিচ্ছপচ্চযুপ্পাদং, লজ্জীভিক্খুগণোচিতং;

ৱিৱেকট্ঠানবহুলং, বহুস্সুতনিসেৱিতং.

৯১৪. অপ্পভযং নিৰাসঙ্কং, অপ্পদোসং মহাগুণং;

ৱিহাৰমনুসেৱন্তো, তত্থ নিস্সঙ্গচেতসা.

৯১৫. ততো কেসনখচ্ছেদ-ৰজনাদিমসেসতো;

খুদ্দকং পলিবোধঞ্চ, ছিন্দিত্ৱান যথাৰহং.

৯১৬. আৱাসং গোচৰং ভস্সং, পুগ্গলং ভোজনং তথা;

ৱজ্জেন্তোতুমসপ্পাযং, ইৰিযাপথমত্তনো.

৯১৭. সেৱন্তো সত্ত সপ্পাযে, তে এৱাতি পধানৱা;

ভাৱনূপাযসম্পন্নো, ৱূপকট্ঠো ৰহোগতো.

৯১৮. কামেস্ৱাদীনৱং দিস্ৱা, নেক্খম্মং দট্ঠু খেমতো;

পৰিযুট্ঠাননিব্বিন্দো, সোধেয্যজ্ঝাসযং কথং.

৯১৯. অপ্পস্সাদা মহাদুক্খা, কামা হি কটুকপ্ফলা;

দুস্সংহাৰা দুৰাৰক্খা, বহ্ৱাদীনৱসণ্ঠিতা.

৯২০. অট্ঠিকা খজ্জমানাৱ, ৱিঘাতায পভিজ্জিতা;

গয্হন্তত্তৱধাযেতে, মংসপেসীৱ পক্খিভি.

৯২১. পটিৱাতে তিণুক্কাৱ, পৰিগ্গাহকদাহিনো;

অঙ্গাৰকাসুসঙ্কাসা, সব্বঙ্গপৰিতাসকা.

৯২২. সুপিনে পৰিভুত্তাৱ, নালং কস্সচি তিত্তিযা;

ন তু কস্সচি অচ্চন্তা, অলঙ্কাৰাৱ যাচিতা.

৯২৩. ছজ্জন্তা ফলৰুক্খাৱ, পটিপন্নপভঞ্জিনো;

অসিসূনূপমা নিচ্চ-মধিকোট্টেন্তি পাণিনো.

৯২৪. সত্তিসূলূপমা দড়্হং, তণ্হাসল্লানুৱেধিনো;

ঘোৰানত্থৱিসাকিণ্ণা, কণ্হসপ্পসিৰূপমা.

৯২৫. সব্বাসৱপৰিক্লিট্ঠা, সব্বাসংক্লেসৱত্থুকা;

গম্মা চ চপলা নীচা, পুথুজ্জনমমাযিতা.

৯২৬. বহুসাধাৰণা চেতে, সপত্তজনপত্থিতা;

মহোপদ্দৱুপযট্ঠা, বহ্ৱাযাসা ভযাৱহা.

৯২৭. মহাৰম্ভসমাৰদ্ধা, খিপ্পাকাৰৱিধংসিনো;

সোকসল্লং পৱেসেন্তা, ৱিগচ্ছন্তি সুৱে সুৱে.

৯২৮. নালং কস্সচি তাণায, নালমস্সাসনায চ;

অৱিসাসনিযাৱস্সং, কিতৱা মাৰকিংকৰা.

৯২৯. সত্তানমুপঘাতায, মধুৰাকাৰনিম্মিতা;

ৰক্খসী ৱিয সন্তান-মাৱিসন্তি মনোহৰা.

৯৩০. আৱিট্ঠা যেহি দুম্মেধা, ব্যসনাহিতসম্ভৱা;

ৱিপল্লাসপৰাভূতা, ব্যাপজ্জন্তা ৱিহঞ্ঞৰে.

৯৩১. চেতোসঙ্কপ্পৰচিতা, নন্দিৰাগোপসেৱনা;

মধুলিত্তাসিধাৰাৱ, ব্যাপাৰেনোপসেৱিতা.

৯৩২. মনোৰমসুভাকাৰা, পিযৰূপোপলম্ভিনো;

মিত্তমুখং সপত্তাৱ, ৱঞ্চযন্তি মহাজনং.

৯৩৩. ৱঞ্চিতা যেহি দুম্মেধা, সব্বসম্পত্তিধংসিতা;

খেমমগ্গা পৰিব্ভট্ঠা, ধাৰেন্তি ৱধমত্তনো.

৯৩৪. ৱিৰূপৰূপাকাৰেন, নিম্মথেন্তা পলোভিনো;

অভাৱিতানং বালানং, মানসং নিহনন্তিমে.

৯৩৫. যত্থ ৰাগসল্লৱিদ্ধা, সল্লেনেৱ ৱনে মিগা;

তত্থ তত্থানুধাৱন্তা, ৱিপ্ফন্দন্তি নিৰন্তৰং.

৯৩৬. মমংকাৰেন ৱুড্ঢন্তা, ঘোৰমাসীৱিসং যথা;

ৱিস্সট্ঠা ভোগধম্মেসু, অস্সাদেন্তি অৱিদ্দসু.

৯৩৭. অনযব্যসনাযেতে, ৱসী কুব্বন্তি পাণিনো;

ৱিচিত্তাকাৰসণ্ঠানা, পিসাচনগৰং যথা.

৯৩৮. অনত্থাৱহিতা বালা, ৱাগুৰং নাৱবুজ্ঝৰে;

তত্থেৱ পটিৱমন্তি, যথা হঞ্ঞন্তি মুচ্ছিতা.

৯৩৯. সীঘৱাহী মহোঘোযং, ক্লেসৱট্টং মহব্ভযো;

সকণ্টকঞ্চ গহনং, পঙ্কোৱ দুৰতিক্কমো.

৯৪০. চেতোসংমোহনট্ঠানং, পমাদপটিসন্ধিতং;

ওহাৰি সিথিলং চেতং, দুপ্পমুঞ্চঞ্চ বন্ধনং.

৯৪১. জালংৱ ৱিত্থতং লোকে,

মাৰপাসো সমোড্ডিতো;

পঞ্জৰং চাৰকো চেসো,

সত্তানমনযাৱহো.

৯৪২. যত্থানুৰাগসম্বদ্ধা, পলিগুণ্ঠিতসাযিনো;

মক্কটালেপবদ্ধাৱ, নিত্থুনন্তি ৱিঘাতিনো.

৯৪৩. বড়িসংৱামিসচ্ছন্নং, সৱিসং ৱিয ভোজনং;

মিগলুদ্দনিৱাপোৱ, ৱিনাসায সমোড্ডিতা.

৯৪৪. মীনকা ৱঙ্কগিদ্ধাৱ, যে গিলিত্ৱা পুথুজ্জনা;

ঘোৰং মচ্চুমুখং পত্ৱা, সোচন্তাপাযভাগিনো.

৯৪৫. পাপক্খেত্তমিদং ঠানং, মিচ্ছালোভনিসেৱনং;

দুচ্চৰীতঙ্কুৰাৰোহং, অপাযফলপূৰণং.

৯৪৬. অজ্ঝোসিতা পনেত্থ চ, লোভমুচ্ছাৱিদাহিনো;

কোধূপনাহজলিতা, ইস্সামচ্ছেৰধূপিতা.

৯৪৭. সাৰম্ভাযুধসন্নদ্ধা, ৱিপ্ফুৰন্তা মনোৰথা;

আবন্ধিচ্ছা মহাকচ্ছা, ঠন্তি লোকৱিপত্তিযা.

৯৪৮. অৱজ্জং নত্থি এতেস-মকত্তব্বং ন ৱিজ্জতি;

সম্মুট্ঠসচ্চতা তেসু, ন পতিট্ঠাতি সাধুতা.